Kʼalal mu to tstak batel ta chaʼchaʼvoʼ yajtakboltak li Jesuse, la xchanubtas sventa xtojobik lek li ta cholmantale. Pe maʼuk noʼox taje, yuʼun xi laj yal ta slekil yoʼonton ti tsnuptanik kontrainele: «¡Kʼelo avilik! Ta jtakoxuk batel kʼuchaʼal chijetik ta stojolal okʼiletik [...]. Kʼelo me abaik lek ta stojolal li krixchanoetike, yuʼun chakʼoxuk ta kʼabal ta nail chapanobbailetik xchiʼuk ta stsitsoxuk ta snailtak stsobobbailik. Jech xtok voʼon ta jkoj chavichʼik ikʼel batel ta stojolal itsʼinal ajvaliletik xchiʼuk ta stojolal bankilal ajvaliletik» (Mateo 10:16-18).

Jaʼ jech, oy bu ti toj tsots tsnuptanik kontrainel li yajchankʼoptak Jesuse, pe xi la spatbe yoʼontone: «Mu me xavul avoʼontonik kʼuxi chatakʼavik o kʼusi chavalik kʼalal chavichʼik akʼel ta kʼabale, yuʼun li vaʼ orae te chavichʼik akʼbel anaʼik li kʼusi chavalike. Yuʼun maʼuk noʼox chakʼopojik li voʼoxuke, jaʼ chkʼopoj ta atojolalik li xchʼul espiritu Atotike». Xi to chale: «Li buchʼu xchiʼil noʼox sbaik ta vokʼele chakʼ ta kʼabal sventa xichʼ milel li xchiʼil ta vokʼele, jaʼ jech tspas ta stojolal xnichʼon ek li totile, li alab nichʼnabiletik eke chlik skontrain li stot smeʼike, vaʼun chakʼik ta milel. Chavichʼik pʼajel yuʼun skotol krixchanoetik ta jkoj, pe jaʼ chkol li buchʼu chkuch yuʼun kʼalal to ta slajebe» (Mateo 10:19-22).

Ta skoj ti toj tsots skʼoplal li cholmantale, albatik mantal yuʼun Jesus ti akʼo oyuk spʼijilik sventa mu x-ochik ta chukele, sventa jech spasbeik-o batel yabtel li Jeovae. Xi laj yal li Jesuse: «Kʼalal chavichʼik kontrainel ta junuk jteklume, jatavanik batel ta yan, yuʼun ta melel chkalboxuk avaʼiik ti mu toʼox bu chlaj xanavanik-o ta skotol li jteklumetik ta Israel kʼalal mi vul li Xnichʼon krixchanoe» (Mateo 10:23).

¡Toj labal xa noʼox sba li tojobtasel akʼbatik yuʼun Jesus li lajchaʼvoʼ jtakboletike, li pʼijubtasele xchiʼuk ti kʼu yelan patbat yoʼontonike! Pe kʼuchaʼal chkiltike, toj jtunel me yuʼunik ek li buchʼutik chcholik mantal kʼalal mi chamem xaʼox xchiʼuk mi chaʼkuxiem xaʼox li Jesuse. Li kʼusi laj yale jaʼ svinajeb ti maʼuk noʼox chkontrainat li jtakboletik ti takatik batel ta cholmantale, yuʼun chichʼik «pʼajel yuʼun skotol krixchanoetik» li yajchankʼoptak ta tsʼakal eke. Jech xtok, muʼyuk bu ta jtabetik skʼoplal ta Vivlia mi ikʼatik batel ta stojolal itsʼinal ajvaliletik xchiʼuk ta stojolal bankilal ajvaliletik li jtakboletik kʼalal la xcholik mantal kʼuk sjalil ta Galileae. Muʼyuk bu ta jtabetik skʼoplal xtok mi akʼatik ta kʼabal yuʼun yutsʼ yalalik sventa xlajik ta milel.

Jamal xvinaj chaʼa, li kʼusi laj yalbe yajtakboltak Jesuse jaʼ yakal tsnopbe skʼoplal li yajchankʼoptak ta tsʼakale. Yuʼun laj xa onoʼox yal Jesus ti muʼyuk to chlaj xcholik-o mantal li yajtakboltak «kʼalal mi vul li Xnichʼon krixchanoe». Li kʼusi laj yal  Jesuse jaʼ ti muʼyuk toʼox lajem yuʼunik xcholbel skʼoplal Ajvalilal yuʼun Dios li yajchankʼoptak kʼalal muʼyuk toʼox vulem ta jchapanvanej li Ajvalil Jesukristoe.

Kʼalal yakal chcholik batel mantal li jtakboletike skʼan me mu labaluk xaʼiik mi laj yichʼik kontrainele, yuʼun xi laj yal li Jesuse: «Maʼuk mas jelavem skʼoplal ta stojolal yajchanubtasvanej li jchankʼope, jech xtok, maʼuk mas jelavem skʼoplal ta stojolal yajval li mosoile». Jamal ta aʼibel smelolal li kʼusi laj yale. Yuʼun laj ta utilanel li stuke xchiʼuk laj yichʼ kontrainel ta skoj ti chcholbe skʼoplal li Ajvalilal yuʼun Diose, jaʼ yuʼun jaʼ jech tsnuptanik ek. Xi laj yal mantale: «Mu me xaxiʼtaik li buchʼutik tsmil abekʼtalike, pe ti mu xmil yuʼun li akuxlejalike; mas lek jaʼ xiʼtaik li buchʼu xmil yuʼun abekʼtalik xchiʼuk ti xmil yuʼun akuxlejalik ta Jeenae» (Mateo 10:24, 28).

Toj lek ta chanbel stalelal Jesus ta sventa taje, yuʼun li stuke tsots yoʼonton kuch yuʼun ti kʼu sjalil kuxi ta Balumile, yuʼun mu skʼan xakʼ ta vokol li stukʼil yoʼonton ta stojolal li Buchʼu skotol xuʼ yuʼune, li Jeovae. Ta skoj ti Skotol xuʼ yuʼun li Diose, xuʼ yuʼun tslajesbe skʼoplal xkuxlejal li jun krixchanoe (jaʼ xkaltik, ti kʼu yelan spatoj yoʼonton chkuxi ta tsʼakale) o xuʼ xchaʼkuxes sventa chakʼbe xkuxlejal sbatel osil. ¡Batsʼi xpatet van tajek yoʼonton jtakboletik kʼalal laj yaʼiik taje!

Xi chalbe skʼoplal Jesus ti kʼu yelan ta slekil yoʼonton chchabiutik li Diose: «Mi mu xmanuk-o chaʼkot saktarin [«chʼipchʼip»] li jsep takʼin ti jutuk sbalile? Manchuk mi jech, mi jkotuk bu chyal ta lum mi muʼyuk snaʼoj li Atotike [...]. Jech oxal chaʼa, mu xaxiʼik; yuʼun voʼoxuk mas tsots akʼoplalik, jaʼ xkom to li epal saktarine» (Mateo 10:29, 31).

Li mantal chalik batel yajchankʼoptak Jesuse chchʼak li utsʼ alaliletike, yuʼun oy junantik ti chchʼamik li mantale, pe li yantike muʼyuk. Jaʼ yuʼun xi chale: «Mu xanopik ti tal kakʼ jun oʼontonal ta balumile». Jaʼ yuʼun, ta skoj ti chkontrainat yuʼun yutsʼ yalal li buchʼu chlik xchan melel mantale skʼan me tsotsuk yoʼonton. Xi chale: «Mu sta-o xkʼot ta kajchankʼop buchʼuuk ti mas skʼanoj stot o smeʼe, ti jaʼ mu sta li voʼone». Xi to chal xtoke: «Xchiʼuk mu sta-o xkʼot ta kajchankʼop buchʼuuk ti mas skʼanoj skerem o stsebe, ti jaʼ mu sta li voʼone» (Mateo 10:34, 37).

Jech, oy onoʼox bu ti lek chichʼik chʼamel li yajchankʼoptak Jesuse. Xi chale: «Li buchʼu chakʼbe yuchʼ jbochuk sikil voʼ junuk li buchʼutik bikʼit skʼoplalik ta skoj ti jaʼ jchankʼope, ta melel chkalboxuk avaʼiik, ta onoʼox me xichʼ ta persa li smotone» (Mateo 10:42).

Vaʼun kʼalal lek xa chanubtasbilik li jtakboletike, ti pʼijubtasatik xchiʼuk ti patbat yoʼontonike «batik ta jujun bikʼit lumetik, la xcholik batel li lekil aʼyejetike xchiʼuk ta buyuk noʼox poxtavanik» (Lukas 9:6).