Te svolojik ta yosilal Dekapolis Jesus li epal krixchanoetike, te ta slokʼeb Kʼakʼal ta Nab Galilea. Tal yaʼibeik li kʼusi chale xchiʼuk tal saʼik sventa tskʼanik poxtael xchiʼuk yichʼojik tal ta mukʼtik moch li kʼusi tslajesike.

Xi laj yalbe yajchankʼoptak Jesus ta mas tsʼakale: «Kʼux ta koʼonton li epal krixchanoetike, yuʼun oy xa ta oxib kʼakʼal liʼ xchiʼinojikune xchiʼuk muʼyuk kʼusi slajesik. Mi muʼyuk veʼem ta jtak batel ta snaike, ta xlaj yipalik ta be, yuʼun oy jlom ti nom likemik tale». Pe xi laj yal li yajchankʼoptake: «¿Buchʼu xa noʼox xuʼ tsta epal pan sventa tsmakʼlin li epal krixchanoetik liʼe, ti stuktuk bu chʼikil ti bu oyutike?» (Markos 8:2-4).

Xi la stakʼ li Jesuse: «¿Jayib pan oy avuʼunik?». Xi la stakʼike: «Vukub xchiʼuk oy jaykot bikʼtal choy» (Mateo 15:34). Vaʼun laj yakʼ akʼo xchotiik ta yaxaltik krixchanoetik li Jesuse. Laje la stsak li pan xchiʼuk choye, la skʼopon Dios xchiʼuk laj yakʼbe yajchankʼoptak ti akʼo spukik batele. ¡Toj labal xa noʼox sba, yuʼun noj xchʼut kom skotolik! Komenaj to, yuʼun noj lek vukub mukʼtik moch li skomenal la stsobbeike, akʼo mi chanmil to viniketik veʼ ti parte li antsetik xchiʼuk ololetike.

Kʼalal laj xaʼox yalbe krixchanoetik li Jesus ti akʼo xa xbatike, la xtuchʼik nab xchiʼuk yajchankʼoptak, batik ta tiʼ nab ta Magadan, ta smaleb Kʼakʼal ta Nab Galilea. Te oyik jfariseoetik xchiʼuk jayvoʼ krixchanoetik ti jaʼik li ta jvokʼ yuʼun jsaduseoetike sventa tskʼelbeik yoʼonton li Jesuse, yuʼun tal yalbeik ti akʼo spas junuk senyail ti likem tal ta vinajele.

Xi la stakʼ Jesus kʼalal laj yakʼ venta ti kʼusi oy ta yoʼontonike: «Xi chavalik kʼalal ch-och xa akʼobale: ‹Lek kʼepel, yuʼun lek tsoj li vinajele›, xi chavalik li ta sobe: ‹Chtal voʼ xchiʼuk oy sik maʼ tanae, yuʼun lek tsoj li vinajele pe limil›. Xanaʼik skʼelel kʼu yelan li vinajele, pe li senyailtak kʼakʼale mu xanabeik smelolal» (Mateo 16:2, 3). Vaʼun laj yalbe jfariseoetik xchiʼuk jsaduseoetik ti muʼyuk ch-akʼbat yilik junuk senyaile, jaʼ noʼox li senyail Jonase.

Vaʼun bat ochuk ta varko xchiʼuk yajchankʼoptak li Jesuse, batik ta Betsaida, ta snoresteal nab. Kʼalal ta be xa xlokʼike te laj yakʼik venta ti muʼyuk bu ep xkuch batel spanik li yajchankʼoptake. Kʼajomal jun yichʼojik batel. Ta skoj ti te oy ta sjol Jesus ti jaʼ to la stsak sbaik ta loʼil xchiʼuk li jfariseoetik xchiʼuk li jsaduseoetik ti jaʼ jmoj sjolik xchiʼuk li Erodese, xi pʼijubtasvane: «Vikʼiluk me lek asatik; kʼelo me abaik ta skoj slevadurail jfariseoetik xchiʼuk ta skoj slevadurail li Erodese». Kʼalal laj yaʼiik jech chal ta sventa levadura Jesus li jchankʼopetike la snopik mi jaʼ jech chal ta skoj ti chʼay ta sjol spanike. Pe laj yakʼ venta ti yan-o kʼusi tsnop li yajchankʼoptake, jaʼ yuʼun xi laj yale: «¿Kʼu yuʼun chavulilan abaik ta skoj ti chʼabal apanike?» (Markos 8:15-17).

 Mu to jaluk yechʼel ti ta smilal noʼox krixchanoetik la smakʼlin li Jesuse, yuʼun laj yakʼbe sveʼ pan. Jaʼ yuʼun snaʼojik jchankʼopetik jechuk ti muʼyuk tsvul yoʼonton Jesus ta sventa li batsʼi pane. Xi la sjakʼe: «¿Mi mu xvul ta ajolik kʼalal la jvokʼ voʼob pan ti lek noj-o xchʼutik voʼmil viniketike? ¿Jayib moch lek noj la atsobbeik li skomenale?». Xi la stakʼike: «Lajcheb moch». Vaʼun xi to laj yal li Jesuse: «¿Jayib to mukʼtik moch noj avuʼunik kʼalal la atsobbeik skomenal kʼalal la jvokʼ vukub pan ti veʼik-o chanmil viniketike?». Xi laj yalike: «Vukub moch» (Markos 8:18-20).

Xi la sjakʼ li Jesuse: «¿Kʼuxi ti mu xavakʼik venta ti maʼuk laj kalbe skʼoplal pane?». Xi to laj yale: «Kʼelo me abaik ta skoj slevadurail li jfariseoetik xchiʼuk jsaduseoetike» (Mateo 16:11).

Vaʼun laj xa yaʼibeik smelolal kʼusi yakal chalbe skʼoplal Jesus li jchankʼopetike. Li kʼusi tstunesik-o li levadurae jaʼ sventa tsʼitesik o chepajesik li kʼusi tsvotsʼike. Li kʼusi yakal chal Jesuse, jaʼ senyail ti tsokesvan li levadurae. Jaʼ yuʼun laj yalbe yajchankʼoptak ti akʼo skʼel sbaik ta sventa «li chanubtasel chakʼ jfariseoetik xchiʼuk jsaduseoetike», yuʼun tsokesvan (Mateo 16:12).