Kʼalal laj xaʼox yal Jesus ti mu xa stukʼiluk kʼusi nopem xaʼi tspas li jfariseoetike, bat xchiʼuk li yajchankʼoptake. Jaʼ jbabe bat ta yosilal Tiro xchiʼuk ta Sidon ta Fenisia, ti oy jayibuk kilometro xil noroestee.

Vaʼun te la sta jpʼej na li Jesus sventa te chvaye, pe mu skʼan akʼo xaʼi krixchanoetik ti te oye. Akʼo mi jech, vinaj onoʼox ti te oye. Oy jun ants ti jgresia stsʼunbal ti te vokʼem li ta lum bu bat Jesuse, vaʼun te la sta li Jesuse xchiʼuk xi xvokolet laj yalbee: «Kajval, Xnichʼon David, oyuk xkʼuxul avoʼonton ta jtojolal. Yuʼun toj chopol kʼu yelan uʼuninbil yuʼun pukuj li jtsebe» (Mateo 15:22; Markos 7:26).

Mu ta sjaliluke, xi albat yuʼun yajtsʼaklomtak li Jesuse: «Tako xa batel li antse, yuʼun tsots xvokolet tal ta jpatik». Vaʼun xi la stakʼ Jesus sventa chalbe srasonal ti kʼu yuʼun muʼyuk tstsak ta mukʼe: «Muʼyuk buchʼu yan ta stojolal takbilun tal, jaʼ noʼox takbilun tal ta stojolal li chʼayemal chijetik ta sna Israele». Pe muʼyuk bu slubtsaj-o li antse. Nopaj batel ta stojolal Jesus xchiʼuk la skejan sba ta stojolal, xi la skʼanbe vokole: «¡Koltaun, Kajval!» (Mateo 15:23-25).

Sventa chakʼbe ta preva xchʼunel yoʼontone, laj yalbe skʼoplal li judaetik ti muʼyuk lek chilik li jyanlumetike, jaʼ yuʼun xi laj yale: «Mu lekuk mi ta jpojbetik span li ololetik sventa chkakʼbetik li uni neneʼ tsʼiʼetike» (Mateo 15:26). Laj yalbe skʼoplal «neneʼ [tsʼiʼetik]» sventa chakʼ ta ilel ti kʼux chaʼi Jesus li buchʼu maʼuk judaetike. Ta melel, ta sat xchiʼuk ta skʼopojel laj yakʼ ta ilel ti kʼu yelan chaʼi sba ta stojolal li yantike.

Muʼyuk bu chopol xaʼi kʼusi albat li antse, moʼoj, yuʼun ti kʼusie laj yal ti jech onoʼox ti chopol ch-ilvan li judaetike xchiʼuk xi laj yal sventa chakʼ ta ilel ti bikʼit yakʼoj sbae: «Jech avaʼuk Kajval, pe li uni neneʼ tsʼiʼetike ta to slajesik ek li xchʼuchʼulil chlilij yalel ta xmexa yajvalike». Laj yakʼ venta Jesus ti oy kʼusi lek ta yoʼonton li antse, jaʼ yuʼun xi laj yalbee: «Toj mukʼ chkil li xchʼunel avoʼontone ants; jaʼ jech akʼo kʼotuk ta pasel ta atojolal jech kʼuchaʼal chakʼane» (Mateo 15:27, 28). Jaʼ onoʼox jech kʼot ta pasel un, akʼo mi muʼyuk bu te oy li stsebe. Vaʼun kʼalal sut batel ta sna li antse te puchʼul la sta ta stem li stsebe, pe kolem xa, ¡«lokʼem xa li pukuje»! (Markos 7:30.)

Likik tal ta yosilal Fenisia li Jesus xchiʼuk yajchankʼoptake, la xtuchʼik li lume, vaʼun batik ta yakʼol Ukʼum Jordan. Yaʼeluke la xtuchʼik li Ukʼum Jordan te van bu ta snorteal Nab Galileae, vaʼun batik ta yosilal Dekapolis. Kʼalal te xaʼox oyike muyik batel ta vits. Pe te taatik yuʼun li epal krixchanoetike, te laj yikʼbeik tal koxoetik, tunkoetik, maʼsatetik, umaʼetik xchiʼuk yantik, te la stelanbeik ta yok Jesus, vaʼun la xpoxtaan. Labal to sba laj yilik li krixchanoetike, jaʼ yuʼun la skʼupil kʼoptaik li Dios yuʼun Israele.

Vaʼun oy jun vinik ti mas laj yakʼ ta yoʼonton li Jesuse, li vinik taje pakʼchikin xchiʼuk vokol chkʼopoj. ¡Nopo xa onoʼox avaʼi kʼu yelan chaʼi sba ti te joyol epal krixchanoetik ta stojolale! Yikʼaluk van laj yakʼ venta Jesus ti chiʼ tajek li vinike, jech oxal laj yikʼ lokʼel. Kʼalal stuk xaʼox bu oyike, laj yakʼbe yil kʼusi tspasbe li vinike. Vaʼun la stikʼ ochel sniʼ skʼob li ta jujun xchikin li vinike xchiʼuk kʼalal laj xaʼox stubta li skʼobe la spikbe li yokʼe. Vaʼun la skʼel muyel vinajel li Jesuse, xi laj yale: «Efata», ti xi skʼan xale: «Akʼo jamuk». Vaʼun jam xchikin li vinike xchiʼuk meltsaj li skʼopojele. Pe mu skʼan Jesus ti xpuk batel skʼoplal taje, jaʼ oy ta yoʼonton ti akʼo xakʼ xchʼunel yoʼonton krixchanoetik ta skoj li kʼusi chil ta sat stukike xchiʼuk li kʼusi chaʼi stukike (Markos 7:32-36).

Toj labal sba laj yilik li skʼelobiltak juʼelal la spas Jesus kʼalal poxtavane, «chʼayal tajek kʼot yoʼontonik», jech oxal xi laj yalike: «Lek la spas skotol li kʼusitike. Xaʼi xa yuʼun kʼalal ta pakʼchikinetik xchiʼuk xkʼopoj xa yuʼun kʼalal ta umaʼetik» (Markos 7:37).