Kʼalal yakal chcholik mantal li Jesus xchiʼuk li chanvoʼ yajchankʼoptak li «ta snailtak stsobobbailik ta sjunul yosilal Galileae», puk batel skʼoplal li kʼusi labal sba la spase (Markos 1:39). Jaʼ yuʼun kʼot kʼalal to ta jun jteklum li lekil aʼyej taje, ti jaʼ te nakal jun vinik ti ip ta kʼaʼemal chamele. Xi laj yalbe skʼoplal li doktor Lukase: «Te oy jun vinik ti ip ta kʼaʼemal chamele» (Lukas 5:12). Kʼalal tstsatsaj batel li chamel taje, ta sokbe tajek sbekʼtal li jun krixchanoe.

Ta skoj ti toj echʼ xa noʼox ip li vinik taje, mu stakʼ xnopaj ta stojolal li yan krixchanoetike. Jech xtok, «chopolun, chopolun» xi skʼan x-avan kʼalal oy nopol krixchanoetik ti bu oye, sventa mu xnopajik tal ta stojolal yoʼ mu xkuchbeik li xchamele (Levítico 13:45, 46). Pe ¿kʼusi van tspas tana li vinike? Nopaj batel ta stojolal li Jesuse, la skejan sba ta stojolal xchiʼuk xi la skʼanbe tsots vokole: «Kajval, ti xakʼanuke, xuʼ xapoxtaun» (Mateo 8:2).

¡Toj echʼ xa noʼox tsots xchʼunel yoʼonton ta stojolal Jesus li vinik taje! Pe ¡batsʼi abol van sba tajek xvinaj ta skoj li mu chamel taje! ¿Kʼusi van tspas li Jesuse? ¿Kʼusi van la apas ti voʼotuk te kʼot ta atojolale? Kʼuxubaj ta yoʼonton li Jesuse, la syeʼ skʼob, vaʼun la skajan skʼob ta stojolal. Xi laj yalbee: «¡Ta jkʼan!, kolan» (Mateo 8:3). Manchuk mi ep buchʼutik ti batsʼi mu chʼunbaj chilike, ta ora noʼox poxtaj li skʼaʼemal chamele.

¿Mi chakʼan ti oyuk junuk ajvalil ti oy xkʼuxul yoʼonton ta jtojolaltik kʼuchaʼal li Jesuse xchiʼuk ti xuʼuk yuʼun skoltautike? Ti kʼu yelan la skolta li vinik ti ip ta kʼaʼemal chamele, chakʼ jchʼuntik ta melel ti jaʼ jech chkʼot ta pasel li albil kʼop kʼalal mi lik sventain spʼejel Balumil li Jesuse, jech kʼuchaʼal xi chal li albil kʼop liʼe: «Jaʼ chcʼuxubin li bochʼotic toj biqʼuit ch-ilatique, xchiʼuc tscolta cʼu chaʼal mu xlajic ta milel» (Salmo 72:13). Jaʼ jech, ta onoʼox me spas skotol Jesus li kʼusi oy ta yoʼontone, ti tskolta skotol li buchʼutik chil svokolike.

Jvules ta joltik ti toj labal xa onoʼox sba chilik krixchanoetik li cholmantal tspas Jesus kʼalal mu toʼox chpoxta li vinik ti ip ta kʼaʼemal chamele. Li avi une chaʼibeik skʼoplal li kʼusi naka to labal sba la spas Jesuse. Pe mu skʼan ti jaʼuk noʼox xakʼ-o xchʼunel yoʼontonik ta skoj li kʼusi yabinojike. Yuʼun snaʼojbe skʼoplal li albil kʼop ti xi chal ta sventae: «Muʼyuc ch-avan ta xoraltic», taje jaʼ skʼan xal ti mu yolbajuk xa chakʼ ta ilel li kʼusitik labalik sba tspase (Isaías 42:1, 2). Jech oxal xi laj yalbe li vinik ti la xpoxtabe li skʼaʼemal chamele: «Aʼio avaʼi, mu me buchʼu xavalbe; batan, bat akʼo aba ta ilel ta stojolal li palee xchiʼuk akʼo li matanal jech kʼuchaʼal yaloj Moisese» (Mateo 8:4).

Jnoptik avaʼi, xmuyubaj tajek li vinik taje, jaʼ yuʼun mu xmuk yuʼun chaʼi ti naka to poxtaje. Jech oxal lik spukbe batel skʼoplal ta butikuk noʼox li kʼusi kʼot ta pasele. Vaʼun mas to oy ta yoʼonton tskʼan tsnabeik skʼoplal li krixchanoetike. Toj echʼ xa noʼox puk batel skʼoplal li Jesuse, yuʼun mi jaʼuk xa stakʼ bu xanav ta junuk jteklum, jaʼ yuʼun jaʼ xa noʼox te oy ti bu chʼabal jnakleje. Akʼo mi jech, ep buchʼutik te chtalik ta stojolal sventa xichʼik chanubtasel xchiʼuk poxtael.