Batik ta norte ta Galilea li Jesus xchiʼuk li yajchankʼoptake. Primavera xa un, jaʼ yuʼun oy xa sat li trigoe. Ta skoj ti chviʼnajik xa li yajtsʼaklomtak Jesuse lik xtuchʼik trigo sventa chkʼuxik. Pe jaʼo skʼakʼalil Savado un, jech oxal li jfariseoetike te skʼelojik ti kʼusi tspasike.

Jvules ta joltik ti jaʼtik to ti tsmil ox yaʼiik Jesus jlom judaetik ta Jerusalen ta skoj ti muʼyuk la la xchabi Savadoe. Li avi une jaʼ xa chopol laj yilik li kʼusi la spas yajchankʼoptak Jesus li jfariseoetike, xi laj yalike: «¡Kʼelo avil! Li avajchankʼoptake jaʼ yakalik spasel li kʼusi mu stakʼ pasel ta Savadoe» (Mateo 12:2).

Kʼuchaʼal chkiltike, abtel xa la chilik li jfariseoetik ti kʼalal chtuchʼik trigo xchiʼuk ti tsjuʼ ta skʼobik sventa chkʼuxike (Éxodo 34:21). Ta skoj ti tsatsal abtel xa chilik li kʼusi jsetʼjuteb chichʼ pasele toj tsots xa chilik jujun Savado li krixchanoetike, pe ti jechuk une jaʼ sventa xkuxetuk noʼox yoʼontonik xchiʼuk ti xpatetuk noʼox yoʼontonik ta mantale. Vaʼun lik yalbe skʼoplal Jesus jayibuk loʼiletik ta Vivlia sventa chakʼ ta ilel ti mu jaʼuk jech oy ta yoʼonton Jeova ti mu xa ta smeloluk xichʼ chabiel li Savado yakʼoje.

Jaʼ yuʼun lik yalbe skʼoplal li kʼusi la spasik David xchiʼuk sviniktake. Kʼalal chviʼnajik xae, te kʼotik ta chʼulna pasbil ta nukul xchiʼuk la sveʼik li pan ti akʼbil ta stojolal Diose. Li pan ti laj yichʼ akʼbel ta stojolal Jeova taje laj xaʼox xkʼextaik ta panetik ti jaʼ to laj yichʼ pasele, pe taje jaʼ noʼox xuʼ sveʼik li paleetike. Akʼo mi jech, ta skoj ti vaʼ yelan chviʼnajik li David xchiʼuk sviniktake muʼyuk bu la sta smulik ti la sveʼik li pane (Levítico 24:5-9; 1 Samuel 21:1-6).

Li xchibal loʼil ta Vivlia laj yalbe skʼoplal li Jesuse, jaʼ liʼe: «¿Mi muʼyuk akʼelojik ta Mantal ti  ch-abtejik ta jujun Savado ta templo li paleetike, pe ti muʼyuk bu staoj-o smulike?». Li kʼusi skʼan xale jaʼ ti ta onoʼox smilik chonbolometik ta skʼakʼalil Savado li paleetik sventa chakʼik li chikʼbil matanal ta temploe xchiʼuk ti tspasik yan abtelaletike. Jaʼ yuʼun xi albatik yuʼun li Jesuse: «Pe voʼon chkalboxuk avaʼiik ti oy buchʼu liʼ oy ti mas mukʼ skʼoplale, ti jaʼ mu sta li temploe» (Mateo 12:5, 6; Números 28:9).

Xi to laj yalbe skʼoplal kʼusi chal Tsʼibetik sventa chalbe lek smelolal li Jesuse: «Ti lajuk avaʼibeik smelolal kʼusi skʼan xal liʼe: ‹Jaʼ ta jkʼan li kʼuxubinele, maʼuk li milbil matanale›, muʼyuk la sabeik smul jechuk li buchʼutik chʼabal smulike». Xi la stsutses li sloʼile: «Yuʼun jaʼ Yajval Savado li Xnichʼon krixchanoe». Kʼalal jech laj yale, jaʼ laj yalbe skʼoplal li Ajvalilal tspas ta jmil jabil ti naka xa lekilal oye (Mateo 12:7, 8; Oseas 6:6).

Voʼne xa ti toj abol sba yuʼun krixchanoetik ta mosoinel li Satanase, yuʼun naka jaʼ li majbaile xchiʼuk li paskʼope. Mi jaʼuk xa onoʼox xkoʼolaj xchiʼuk li lekilal chakʼbutik li Ajvalilal tspas Kristo ti xkoʼolaj kʼuchaʼal skʼakʼalil Savado ti mas to tsots skʼoplale. Yuʼun jaʼ noʼox Jesus xuʼ xakʼ jkux koʼontontik ti chtun tajek kuʼuntike.