Ep xa kʼusitik kʼot ta pasel yuʼun Jesus ti kʼu xa sjalil la xchol mantal ta Galileae. Pe maʼuk noʼox oy ta yoʼonton chcholbe mantal li krixchanoetik ta Galileae, jaʼ yuʼun xi laj yale: «Jech xtok persa skʼan ta jchol li lekil aʼyejetik ta sventa Ajvalilal yuʼun Dios li ta yan jteklumetik eke». Vaʼun bat «[xchol] mantal li ta nail tsobobbailetik ta Judeae» (Lukas 4:43, 44). Oy srasonal ti jeche, yuʼun primavera xa xchiʼuk chnopaj xa tal jun kʼin li ta Jerusalene.

Toj ep chichʼ albel skʼoplal li cholmantal la spas Jesus ta Galileae, pe jaʼ jutuk chalbe skʼoplal Evanjelioetik li cholmantal la spas ta Judeae. Pe maʼuk chibaj-o Jesus ti mu skʼanik lek mantal li krixchanoetik ta Judeae, yuʼun laj yakʼbe yipal cholmantal xchiʼuk ep kʼusitik lek la spas te.

Vaʼun li Jesuse bat noʼox ta Jerusalen, ti jaʼ jun jteklum ti mas tsots skʼoplal li ta Judeae. ¿Kʼu yuʼun? Jaʼ sventa chbat li ta kʼin Koltael ta sjabilal 31 ta jkʼakʼaliltike. Li ta jpʼej kotkot nae te oy jun tanke ti Betsata sbie, jaʼ te nopol xil li Yocheb Chij sbi yuʼunike, batsʼi toj ep krixchanoetik te. Te chtalik ta tanke li buchʼutik ip chaʼiike, li maʼsatetike xchiʼuk li koxoetike. ¿Kʼu yuʼun? Yuʼun jutuk mu skotolikuk xchʼunojik ti ta la xkolik mi ochik ta tanke kʼalal tsyukʼilan sba li voʼe.

Savado xa li avi une, jaʼ to chil li Jesuse te oy jun vinik ta stsʼel tanke. Oy xa ta 38 jabil ti ip li vinik taje. Xi jakʼbat yuʼun li Jesuse: «¿Mi chakʼan chakol?». Xi la stakʼ li vinike: «Bankilal, muʼyuk buchʼu xuʼ stikʼun ochel ta tanke kʼalal tsyukʼilan sba li voʼe; yuʼun oy xaʼox buchʼu ochem kʼalal chibate» (Juan 5:6, 7).

Vaʼun oy kʼusi laj yal Jesus ti toj labal van sba laj yaʼi li vinike xchiʼuk li buchʼutik te chaʼiike, xi laj yale: «¡Vaʼlan! Tamo batel li avayebe, vaʼun xanavan batel» (Juan 5:8). Jaʼ jech, ¡vaʼi ta ora! Ta ora noʼox poxtaj li vinike, la stam batel li svayebe, vaʼun xanav batel.

Pe muʼyuk bu maʼ ti xmuyubajik xa li judaetik ta skoj li kʼusi labal sba kʼot ta pasele, kʼajomal noʼox xi tsots laj yalbeik li vinike: «Savado li avie, jech oxal mu stakʼ xatam batel avayeb». Pe xi la stakʼ li vinike: «Batsʼi jaʼ xi laj yalbun stuk li buchʼu la xpoxtaune: ‹Tamo batel li avayebe, vaʼun xanavan batel›» (Juan 5:10, 11). Jaʼ jech la xchopol kʼoptaik li buchʼu laj yichʼ poxtael ta skʼakʼalil Savadoe.

Pe tskʼan tsnaʼik ti buchʼu poxtavane, jaʼ yuʼun xi la sjakʼike: «¿Buchʼu ti ‹Tamo batel, vaʼun xanavan batel›, xayute?». Pe «lokʼ xaʼox batel li Jesuse, yuʼun oy epal krixchanoetik te» xchiʼuk mu snabe sbi Jesus li vinik laj yichʼ poxtaele (Juan 5:12, 13). Pe te la snup ta be ta templo Jesus li vinik taje, vaʼun jaʼ to te laj yaʼi buchʼu ti poxtaat te ta stsʼel tankee.

Laj une, te la snup ta be yan velta judaetik li vinike, ti tsjakʼik buchʼu ti poxtavane. Vaʼun laj yalbe ti jaʼ poxtavan li Jesuse. Kʼalal laj yaʼiike bat saʼik. ¿Mi yuʼun van tskʼan tsnaʼik ta melel ti kʼuxi spas yuʼun Jesus li kʼusitik labalik sba taje? Moʼoj. Yuʼun ti kʼusie jaʼ noʼox tskʼan tsabeik smul ta skoj ti oy kʼusi lek la spas ta skʼakʼalil Savadoe. Maʼuk noʼox taje, yuʼun lik skontrainik li Jesuse.