Ta yan skʼakʼalil Savado xtoke, och batel ta nail tsobobbail li Jesuse, jaʼ te yaʼel ta Galilea. Te la sta jun vinik ti xmochʼoj sba sbatsʼikʼobe (Lukas 6:6). Bat skʼelik lek ta nopol kʼusi tspas Jesus li jchanubtasvanejetik ta Mantal xchiʼuk li jfariseoetike. ¿Kʼu yuʼun? Yuʼun oy kʼusi tskʼan tsnaʼik, jaʼ yuʼun xi la sjakʼik sventa chakʼik ta ilel li kʼusi oy ta yoʼontonike: «¿Mi stakʼ ti xijpoxtavan ta Savadoe?» (Mateo 12:10).

Chalik jbabeetik ta relijion yuʼun judaetik ti jaʼ noʼox la stakʼ xpoxtavanik ta skʼakʼalil Savado mi solel chcham xa li jun krixchanoe. Jaʼ yuʼun, chalik ti mu la stakʼ tsʼakbel sbakil xchiʼuk ti mu la stakʼ pixbel syayijemal li jun krixchano ta skʼakʼalil Savadoe, yuʼun la mu xijcham-o maʼ taje. Jamal xvinaj chaʼa, ti kʼalal jech tsjakʼilanbeik li Jesuse mu yuʼunuk oy ta yoʼontonik ta melel li povre vinik taje. Moʼoj, yuʼun ti kʼusie jaʼ noʼox tsabeik spaltail li Jesuse.

Pe xil lek Jesus li kʼusi toj chopol tsnop ta yoʼontonike. Xil ti chbatik xa ta mas li jchanubtasvanejetik ta Mantal xchiʼuk li jfariseoetike, ti mu xa jechuk tsnopik kʼuchaʼal chal Vivlia ta sventa ti kʼu yelan skʼan xichʼ chabiel li Savadoe (Éxodo 20:8-10). Maʼuk to sba velta ti chchopol kʼoptaat Jesus ta skoj ti lek kʼusi tspase. Jaʼ yuʼun oy kʼusi la spas sventa xil skotolik, xi laj yalbe li vinik ti xmochʼoj sba skʼobe: «Likan, laʼ vaʼano aba ta oʼlol» (Markos 3:3).

Vaʼun la skʼel batel li jchanubtasvanejetik ta Mantal xchiʼuk li jfariseoetike, xi laj yalbee: «¿Buchʼu van junukal avuʼunik ti muʼyuk chbat skʼel xchiʼuk ti muʼyuk chbat slokʼes li jkotkot xchij ti chbalchʼuj ochel ta yut chʼen ta Savadoe?» (Mateo 12:11). Ta skoj ti tsta-o stakʼinik li jkot uni chij taje, muʼyuk te chiktaik sjunul akʼobal li ta yut chʼene, yuʼun xuʼ xcham, vaʼun jaʼ jech chchʼay stakʼinik xkaltik. Xchiʼuk xi onoʼox chal li Tsʼibetike: «Li bochʼo tucʼ yoʼntone oy ta yoʼnton chcʼuxubin li stsʼunub yovole» (Proverbios 12:10).

Vaʼun jaʼ jech la skoʼoltas li Jesuse, xi laj yale: «¡Mas to toj tsots skʼoplal li jun krixchanoe, jaʼ mu sta li jkot chije! Jaʼ yuʼun stakʼ pasel ta Savado li kʼusi toj leke» (Mateo 12:12). Jech oxal chaʼa, maʼuk skʼan xal ti muʼyuk chchabi Savado Jesus mi la xpoxta li vinik ti ip chaʼie. Ta skoj ti oy lek srasonal li kʼusi laj yale, mu xa kʼusi stakʼ xalik li jbabeetik ta relijione. Jecheʼ xa te tsʼijil komik.

Li Jesuse chopol chaʼi xchiʼuk chat yoʼonton ta skoj ti muʼyuk stukʼil li kʼusi tsnopike. La skʼel spat xokon, vaʼun xi laj yalbe li vinike: «Xachʼo li akʼobe» (Mateo 12:13). Te une la xachʼ li skʼob ti xmochʼoj sbae, ta anil noʼox poxtaj. Xmuyubaj tajek li vinik ta skoj ti poxtaj xae. Pe ¿kʼu van yelan laj yilik li buchʼutik tskʼan tstsakik li Jesuse?

Muʼyuk maʼ ti xmuyubajik xa ta skoj ti kol xa skʼob li vinike, moʼoj, yuʼun solel «lik skomon nopik ta anil xchiʼuk sviniktak Erodes sventa tskʼelik kʼu yelan xuʼ tsmilik» Jesus li jfariseoetike (Markos 3:6). Jamal xvinaj ti te kapal skʼoplalik ek li jvokʼ relijion ti jsaduseoetik sbiike. Akʼo mi skontra sbaik li jsaduseoetik xchiʼuk li jfariseoetike, jmoj xa sjolik tskontrainik li Jesuse.