Kʼalal jaʼo yakal chchanubtas krixchanoetik ta yosilal Sesarea yuʼun Filipo li Jesuse, ti te van 25 kilometrouk xil li vits Hermone, oy kʼusi toj labal sba xi laj yalbe li yajtakboltake: «Ta melel chkalboxuk avaʼiik ti oy jlom li buchʼutik liʼ vaʼalik ti muʼyuk bu tspasik preva ta jyalel li lajelale, jaʼ to me mi baʼyel laj yilik chtal ta Ajvalilal yuʼun li Xnichʼon krixchanoe» (Mateo 16:28).

Tskʼan van tsnaʼ jchankʼopetik kʼusi smelolal li kʼusi laj yal Jesuse. Te van junuk xemana ta mas tsʼakale laj yikʼ batel ta jun tayal vits li Pedro, Santiago xchiʼuk Juane. Yikʼaluk van akʼobal xa, jech oxal chvay xa yaʼiik li oxvoʼ jtakboletike. La skʼatajes sba kʼalal jaʼo yakal tspas orasion li Jesuse. Xojobaj kʼuchaʼal xojobal Kʼakʼal laj yilik xchiʼuk sakub kʼuchaʼal xojobal lus li skʼuʼtak slapoj ta sbae, batsʼi sak tajek.

Vaʼun oy buchʼu chaʼvoʼ te laj yilik xtok, «jaʼ li Moises xchiʼuk Eliase». Te lik yalbeik skʼoplal ti chbat sventa oy kʼusi xkʼot ta pasel ta stojolal ta Jerusalene (Lukas 9:30, 31). Kʼalal chbat xie jaʼ onoʼox skʼoplal ta melel ti chcham xchiʼuk ti chchaʼkuxie, jaʼ jech kʼuchaʼal yaloj xa onoʼoxe (Mateo 16:21). Ti kʼusi la sloʼiltaike mu xkoʼolaj kʼuchaʼal li kʼusi laj yal Pedroe, yuʼun mu stakʼ pajesel ti kʼu yelan kʼexlal sba chchame.

Vaʼun vikʼ xa lek satik li oxvoʼ jtakboletike, chʼayal yoʼonton chchikintaik xchiʼuk tskʼelik li kʼusi yakal chkʼot ta pasele. Taje jaʼ noʼox laj yilik, akʼo mi jech, batsʼi jech xa tajek yakal chkʼot ta pasel chil li Pedroe, jech oxal xi laj yale: «Rabi, toj lek ti liʼ oyunkutike. Jaʼ yuʼun akʼo jvaʼankutik oxpʼej karpana, jpʼej avuʼun, jpʼej yuʼun Moises xchiʼuk jpʼej yuʼun Elias» (Markos 9:5). ¿Mi yuʼun van tskʼan akʼo to xjalij li kʼusi yakal chil Pedro kʼalal laj yal ti tsvaʼanik oxpʼej karpanae?

Vaʼun pixatik tal ta tok kʼalal jaʼo yakal chkʼopoj li Pedroe xchiʼuk laj yaʼiik ti oy buchʼu xi chkʼopoj tal li ta toke: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj yuʼune. Chikintaik li kʼusi chale». Xiʼ tajek jtakboletik kʼalal jech laj yaʼiike, jech oxal la spatan sbaik ta lum. Pe xi tsots albatik mantal yuʼun li Jesuse: «Likanik, mu xaxiʼik» (Mateo 17:5-7). Vaʼun stuktuk xa te oy Jesus laj yilik kʼalal likike, yuʼun laj xaʼox skʼatajes sba li Jesuse. Xi albatik mantal yuʼun Jesus kʼalal sakub xaʼox osile xchiʼuk kʼalal jaʼo xa yakal chyalik tal ta vitse: «Mu me buchʼu xavalbeik li kʼusi laj avilike jaʼ to me mi laj yichʼ chaʼkuxesel li Xnichʼon krixchanoe» (Mateo 17:9).

Kʼalal laj xaʼox yilik li Eliase oy kʼusitik lik sjakʼik li jtakboletike. Xi laj yalike: «¿Kʼu yuʼun chalik li jchanubtasvanejetik ta Mantal ti baʼyel chtal li Eliase chaʼa?». Vaʼun xi la stakʼ li Jesuse: «Chkalboxuk avaʼiik ti ay xa li Eliase, akʼo mi jech, li stukike muʼyuk laj yakʼik venta» (Mateo 17:10-12). Jaʼ yakal chalbe skʼoplal Juan J-akʼ-ichʼvoʼ li Jesuse, yuʼun jaʼ jechtik la spas yabtel kʼuchaʼal la spas li Eliase. Yuʼun li Eliase la sjambe sbe li Eliseoe, jech kʼuchaʼal la sjambe sbe Kristo li Juane.

Patbat tajek yoʼonton Jesus xchiʼuk jtakboletik li kʼusi laj yilike. Yuʼun kak xa laj yilik ti kʼu to yutsil li Ajvalilal yuʼun Kristoe. Vaʼun li jchankʼopetike laj yilik ti «chtal ta Ajvalilal yuʼun li Xnichʼon krixchanoe», jech kʼuchaʼal albilik onoʼox yuʼun Jesuse (Mateo 16:28). Xi laj yalik ta sventa li kʼusi laj yilik ta vitse: «Laj kilbekutik li yutsil slekilale». Akʼo mi tskʼanik tajek jfariseoetik ti akʼo spas junuk senyail Jesus ti jaʼ tʼujbil yuʼun Dios sventa x-och ta Ajvalile, muʼyuk bu x-akʼbat yilik mi junuk. Pe li yajchankʼoptak Jesus ti lek xil sba xchiʼuke laj yakʼbe yil ti la skʼatajes sbae, sventa chakʼ ta ilel ti melel kʼusi chal li albil kʼopetik ta sventa li Ajvalilale. Jaʼ yuʼun xi la stsʼiba ta mas tsʼakal li Pedroe: «Mas to xuʼ jpat koʼontontik yuʼun li albil kʼope» (2 Pedro 1:16-19).