Lubem xa tajek Jesus li vaʼ kʼakʼale. Kʼalal ch-ikʼub xa osile, xi laj yalbe li yajchankʼoptake: «Jelavkutik batel ta jot», jaʼ xkaltik, li ta jot yosilal Kapernaume (Markos 4:35).

Li ta slokʼeb Kʼakʼal ta tiʼ Nab Galileae jaʼ te xkom yosilalik li jerasaetike. Ojtikinbil kʼuchaʼal Dekapolis xtok. Li ta lumetik ta Dekapolise jaʼ te ti bu jamal xvinaj kʼu yelan stalel xkuxlejal li jgresiaetike, pe ep judaetik te nakalik xtok.

Ep buchʼutik laj yil ti lokʼ batel ta Kapernaum li Jesuse. Jaʼ yuʼun oy yan varkoetik ti lik xa xtuchʼik ek li nabe (Markos 4:36). Ta melel, muʼyuk onoʼox bu nat ti chtuchʼike. Yuʼun li Nab Galileae xkoʼolaj noʼox smukʼul kʼuchaʼal junuk nab ti stakʼ uchʼele, yuʼun te van 21 kilometrouk snatil xchiʼuk te van 12 kilometrouk sjamlej. Pe nat xyal.

Akʼo mi jaʼ jun tukʼil vinik li Jesuse, ta onoʼox xlub ek kʼalal chchol mantale. Jaʼ yuʼun kʼalal la stam echʼel sbe li svarkoike, bat vayuk ta chak varko, laj yakʼ lek jpʼej xon sjol, vaʼun och svayel.

Oy jayvoʼuk jtakboletik ti lek xtojobik ta sbeiltasel varkoe, pe li avi une toj tsots tajek li kʼusi tsnuptanike. Oy vitsetik ta jujujot xchiʼuk kʼixintik jutuk li ta Nab Galileae. Pe jaʼo oy tajek ikʼ ti sik tajek chyal tal li ta vitstike, vaʼun kʼalal chvul skap sba xchiʼuk li kʼixyaman osil ta nabe batsʼi sututet tajek yuʼun li ikʼ ta nabe. Jaʼ yuʼun oy kʼusi kʼot ta pasel. Ta ora noʼox lik smajilan varko ti xyukʼlajet tajek li nabe. Jech oxal «lik nojuk [...] ta voʼ li svarkoike xchiʼuk lik yil svokolik» (Lukas 8:23). ¡Pe yokel-o chvay li Jesuse!

Batsʼi tsots tajek ch-abtej li jtsʼotvarkoetik sventa sbeiltasik li varkoe, yuʼun oy xa onoʼox sbeiltasik jech kʼalal tsnuptanik ikʼaloʼe. Pe li avi une mu xkoʼolaj kʼuchaʼal snuptanojik xa onoʼoxe. Ta skoj ti chiʼ mi xchamike la stijik likel li Jesuse, xi laj yalbeike: «¡Kajval, koltaunkutik, yuʼun chichamkutik xa!» (Mateo 8:25). Jaʼ jech, chiʼik mi xjikʼavik li jchankʼopetike.

Kʼalal julav li Jesuse, xi laj yalbe li jtakboletike: «¿Kʼu yuʼun chaxiʼik, viniketik ti jutuk xchʼunel avoʼontonike?» (Mateo 8:26). Vaʼun xi la spas ta mantal li ikʼ xchiʼuk nabe: «¡Anchan! ¡Tsʼijlan!» (Markos 4:39). Vaʼun tsʼij xi likel li ikʼ ti xkoʼolaj kʼuchaʼal kapem sjole xchiʼuk tsʼij xi li nab eke. (Li Markos xchiʼuk Lukase chalbeik skʼoplal li kʼusi labal sba kʼot ta pasel taje, baʼyel chalbeik skʼoplal ti ta skʼelobil juʼelal la spajes ikʼaloʼ li Jesuse, laje chalbeik skʼoplal ti jutuk xchʼunel yoʼonton li jchankʼopetike.)

¡Nopo xa noʼox avaʼi kʼu to yelan kʼot ta yoʼonton jchankʼopetik li kʼusi kʼot ta pasele! Laj yilik ti tsʼij xi likel li ikʼaloʼ ta nab ti xkoʼolaj kʼuchaʼal kapem sjole. Jaʼ yuʼun xiʼik ta jyalel li jchankʼopetike. Xi laj yalbe sbaike: «¿Buchʼu xa noʼox ta melel leʼe? Yuʼun kʼalal ta ikʼ xchiʼuk ta nab chchʼunbat smantal». Vaʼun kuxul kʼotik ta jot tiʼ nab (Markos 4:41–5:1). Yikʼaluk van lek kʼotik ta jot tiʼ nab li yan varkoetik ti te tijilik batel eke.

¡Batsʼi tspat tajek koʼontontik ti oy sjuʼel li Xnichʼon Dios sventa tspas ta mantal li ikʼe, li voʼe xchiʼuk li yan kʼusitike! Jun xa me koʼontontik chijnaki kʼalal mi kʼot skʼakʼalil chakʼ tal sat liʼ ta Balumil kʼalal yakal xaʼox ch-ajvalilaj li Jesuse, yuʼun muʼyuk xa kʼusi chakʼ xiʼel jech kʼuchaʼal li tsatsal ikʼaloʼe.