Kʼalal laj xaʼox xpoxtabe smoso bankilal soltaro li Jesuse lokʼ batel ta Kapernaum, bat ta Nain, taje jaʼ jun lum ti te xkom ta sureste ti te van 32 kilometrouk snamale. Pe mu stukuk bat, yuʼun te batik ek li yajchankʼoptake xchiʼuk epal krixchanoetik. Yikʼaluk van ch-ikʼub xa kʼalal te xa xlokʼik batel ta stsʼel Naine. Te la snupik ta be jmuklomaletik. Te spoyojbeik lokʼel tal sbekʼtal jun kerem sventa chbat smukik.

Li buchʼu mi jaʼuk x-echʼ chaʼi meʼonale jaʼ li smeʼe. Chamem smalal li antse xchiʼuk kʼajomal yuni kerem. Yuʼun kʼalal cham li smalale bal to xaʼi ti oy jun yuni kereme. Nopo xa noʼox avaʼi kʼu to yepal skʼanoj li skereme, yuʼun spatoj yoʼonton ta stojolal ti jaʼ chkʼelat ta mas tsʼakale. Pe cham xa ek un. ¿Buchʼu van chkoltaat xchiʼuk chpatbat yoʼonton?

Kʼalal laj yil Jesus ti mu x-echʼ chaʼi xchiʼuk ti chat tajek yoʼonton li antse, kʼuxubaj ta yoʼonton. Laj yakʼ ta ilel slekil yoʼonton ta stojolal xchiʼuk xi laj yalbe ta xkʼuxul yoʼontone: «Mu xa xa-okʼ». Pe maʼuk noʼox taje, yuʼun nopaj batel sventa tspikbe li svayeb animae (Lukas 7:13, 14). Toj labal sba laj yilbeik stalelal xchiʼuk kʼusi laj yal Jesus li krixchanoetike, jaʼ yuʼun pajik ta xanbal. Xi van la sjakʼbe sbaik ep krixchanoetike: «¿Kʼusi van skʼan xal leʼe xchiʼuk kʼusi van tspas tana?».

¿Kʼu van yelan laj yilik li buchʼutik yilojik xa onoʼox ti tspas kʼusitik labalik sba li Jesuse xchiʼuk ti chpoxta jchameletike? Xaval yaʼele muʼyuk bu yilojik-o ti oy buchʼu chchaʼkuxese. Veno, oy onoʼox buchʼutik ti chaʼkuxiik ta voʼnee, pe ¿mi oy van sjuʼel sventa xchaʼkuxesvan li Jesuse? (1 Reyes 17:17-23; 2 Reyes 4:32-37). Xi laj yal mantale: «Xi chkalbote kerem: ¡Likan!» (Lukas 7:14). Jaʼ jech kʼot ta pasel un, ¡choti li kereme xchiʼuk lik kʼopojuk! Vaʼun li Jesuse laj yakʼbe skerem li antse, labal tajek sba laj yil xchiʼuk xmuyubaj ta jyalel. Oy xa yuni kerem yan velta.

Kʼalal laj yilik krixchanoetik ti kuxul ta melel li kereme, la skʼupil kʼoptaik Jeova ti jaʼ yakʼoj jkuxlejaltike, yuʼun xi laj yalike: «Vul ta lokʼel jun mukʼul  j-alkʼop ta jtojolaltik». Xi laj yalik ek li buchʼutik laj yilik li kʼusi labal sba la spase: «Laj xa yakʼ tal sat Dios ta stojolal li steklumale» (Lukas 7:16). Li kʼusi labal sba la spas Jesuse ta anil noʼox puk batel skʼoplal li ta jteklumetik ta sjoylejale, kʼot kʼalal to ta slumal stuk Jesus, ta Nasaret ti te van lajunebuk kilometro snamale. Laj yaʼiik ek li krixchanoetik ta Judea ti te xkom ta sure.

Te tikʼil-o ta chukel li Juan J-akʼ-ichʼvoʼe, pe oy tajek ta yoʼonton chaʼibe skʼoplal li kʼusitik xuʼ yuʼun spasel li Jesuse. Vaʼun jaʼ chchapbat yuʼun li yajchankʼoptak li skʼelobiltak juʼelal tspase. ¿Kʼu yelan chaʼi Juan taje?