Batsʼi mu xokobik tajek li Jesus xchiʼuk li chanvoʼ yajchankʼoptak kʼalal jaʼo te oyik ta Kapernaume. Yuʼun laj yikʼ tal yajchamelik ta akʼobaltik li krixchanoetik ta Kapernaum sventa xichʼik poxtaele. Jaʼ yuʼun jlikel noʼox mi xokobe.

Vaʼun sob tajek lik ta yokʼomal li Jesuse, jaʼo kʼalal ikʼ to osile, lokʼ batel. Jaʼ te kʼot ti bu stuktuk tajek bu chʼikile, te lik skʼopon ta stuk li Stote. Pe muʼyuk bu jal ti te stuk oye, yuʼun kʼalal laj yakʼik venta ti chʼabal te oye, «li Simon xchiʼuk li buchʼutik te xchiʼuke bat saʼik». Jaʼ van laj yal Pedro ti akʼo xichʼ saʼel ta skoj ti te toʼox oy ta snae (Markos 1:36; Lukas 4:38).

Xi laj yal Pedro kʼalal la staike: «Skotol krixchanoetik yakal tsaʼoxuk» (Markos 1:37). Li krixchanoetik ta Kapernaume tskʼanik tajek ti teuk xchiʼukik-o li Jesuse. Ta melel, toj lek tajek chilik li kʼusi tspase, jaʼ yuʼun «laj ox spajesik sventa mu xbat» (Lukas 4:42). Pe ¿mi poxtavanej van yabtel tal ta Balumil li Jesuse? Xchiʼuk ¿mi jaʼ noʼox van te tspas yabtel ta Kapernaum? ¿Kʼusi laj yal ta sventa taje?

Xi la stakʼbe li yajchankʼoptake: «Batik ta yan lum, batik li ta jteklumetik ti nopolik noʼoxe, sventa ta jchol mantal te xtok, yuʼun jaʼ sventa ti lokʼemun tale». Jaʼ jech, xi albatik li krixchanoetik ti mu skʼanik xbat li Jesuse: «Jech xtok persa skʼan ta jchol li lekil aʼyejetik ta sventa Ajvalilal yuʼun Dios li ta yan jteklumetik eke, yuʼun jaʼ ta sventa ti takbilun tale» (Markos 1:38; Lukas 4:43).

Jaʼ jech ta melel, ti kʼu yuʼun tal ta Balumil li Jesuse jaʼ sventa xcholbe skʼoplal li Ajvalilal yuʼun Diose. Chchʼultajesbe sbi Jeova li Ajvalilal taje xchiʼuk jaʼ chchʼaybe skʼoplal skotol li chameletike. Kʼalal chpoxta jchameletik ta skʼelobil juʼelal li Jesuse, jaʼ jech chakʼ ta ilel ti yuʼun jaʼ takbil tal yuʼun li Diose. Jaʼ jechtik la spas ek li Moises kʼalal skʼan toʼox jayibuk sien jabil xtal li Kristoe, yuʼun ep skʼelobil juʼelal la spas sventa xakʼ ta ilel ti akʼbil yabtel yuʼun Diose (Éxodo 4:1-9, 30, 31).

Vaʼun lokʼ batel ta Kapernaum li Jesus xchiʼuk li chanvoʼ yajchankʼoptak sventa xbat xchol mantal ta yantik lume. Taje jaʼ li Pedro xchiʼuk Andres ti sbankil yitsʼin sbaike, te oyik ek li Juan xchiʼuk Santiago ti sbankil yitsʼin sbaik eke. Jaʼik li buchʼutik baʼyel laj yichʼik takel ta ikʼel yuʼun Jesus echʼ xemana sventa xchiʼinik ta abtele.

¡Toj lek kʼusitik kʼot ta pasel yuʼunik li Jesus xchiʼuk li chanvoʼ yajchankʼoptak kʼalal la xcholik manta ta sjunul Galileae! Jech ta melel, puk batel ta buyuk noʼox skʼoplal li Jesuse. «Puk batel skʼoplal ta sjunul slumal Siria», kʼalal to ta yosilal lajuneb lum ti Dekapolis chalbeike xchiʼuk li ta jot Ukʼum Jordane (Mateo 4:24, 25). Ep buchʼutik li ta jteklumetik taje xchiʼuk li ta Judeae la stsʼakliik batel li Jesus xchiʼuk yajchankʼoptake. Ep jchameletik laj yikʼbeik tal sventa xpoxta. Jun yoʼonton kom skotolik, yuʼun poxtaatik li buchʼutik ip chaʼiike xchiʼuk lokʼesbat pukuj ta stojolalik li buchʼutik uʼuninbilike.