Kʼalal yalik xaʼox tal ta vits li Jesus, Pedro, Santiago xchiʼuk Juane, te tsobol vul staik epal krixchanoetik. Oy kʼusi muʼyuk lek yakal chkʼot ta pasel. Yuʼun te stsoboj sbaik li jchanubtasvanejetik ta Mantal sventa tstsakik ta kʼop li yajchankʼoptak Jesuse. Xmuyubajik tajek li krixchanoetik kʼalal laj yilik ti te xa xtal li Jesuse, jaʼ yuʼun bat snupik ta be ta ora. Vaʼun xi jakʼbatike: «¿Kʼusi ti yakal chatsak-o abaik ta kʼope?» (Markos 9:16).

Oy jun vinik ti te kapal ta epal krixchanoetike, tal skejan sba ta stojolal li Jesuse xchiʼuk xi laj yale: «Jchanubtasvanej, laj kikʼbot tal li jnichʼone, yuʼun ochem jun pukuj ta yoʼonton ti pasem ta umaʼ yuʼune. Kʼalal tstsakate chjipat ta lum, chvokan ye xchiʼuk chkʼux stanal ye, vaʼun chʼabal xa yip chkom. La jkʼanbe avajchankʼoptak ti akʼo slokʼesbeike, pe muʼyuk bu xuʼ yuʼunik» (Markos 9:17, 18).

Yileluke yakal tslabanbeik yajchankʼoptak Jesus li jchanubtasvanejetik ta Mantal ta skoj ti muʼyuk xpoxtaj yuʼunik li kereme, yikʼaluk van ch-akʼvanik xa ta kʼexlal. Pe li Jesuse muʼyuk kʼusi xalbe li totil ti mu snaʼ kʼusi tspase, moʼoj, jaʼ xi laj yalbe li epal krixchanoetike: «¡Ay, jkʼol kuxlejal ti chʼabal xchʼunel yoʼonton xchiʼuk ti jpasmulile!, ¿kʼu to van sjalil liʼ ta jchiʼinoxuke? ¿Kʼu to van sjalil ta jtsʼikboxuk xkal?». Ta melel, li kʼusitik toj tsots laj yal Jesuse jaʼ chalbe li jchanubtasvanejetik ta Mantal ti laj yakʼbeik svokol li yajchankʼoptak kʼalal chʼabal toʼox tee. Vaʼun la skʼel batel li totil ti chat tajek yoʼontone, xi laj yalbee: «Ikʼbeikun tal liʼe» (Mateo 17:17).

Kʼalal nopaj tal ta stojolal Jesus li kereme, ta ora noʼox jipat ta lum xchiʼuk tsots likesbat stupʼ-ikʼ yuʼun li pukuje. Jech xtok, la sbalalin sba ta lumtik xchiʼuk lik vokanuk ye. Xi la sjakʼbe totil li Jesuse: «¿Kʼu xa sjalil ti jech tspasbate?». Xi la stakʼe: «Ta sbikʼtal onoʼox, xchiʼuk ep ta velta chjipat ta kʼokʼ xchiʼuk chtikʼat ta voʼ sventa chmilat». Vaʼun xi la skʼan vokol li vinike: «Mi oy kʼusi  xuʼ avuʼun spasele, kʼuxubinunkutik xchiʼuk koltaunkutik» (Markos 9:21, 22).

Mu xa snaʼ kʼusi tspas li totile, yuʼun kʼalal ta yajchankʼoptak Jesus muʼyuk bu xpoxtaj yuʼunik li kereme. Vaʼun sventa tspatbe yoʼonton li vinik ti chat tajek yoʼontone, xi laj yal li Jesuse: «¿Kʼu yuʼun ti ‹Mi oy kʼusi xuʼ avuʼun spasel› xachie?, skotol xuʼ yuʼun spasel li buchʼu oy xchʼunel yoʼontone». Te une, ta anil noʼox xi tsots avan li vinike: «¡Oy xchʼunel koʼonton! ¡Koltaun ti bu skʼan oyuk xchʼunel koʼontone!» (Markos 9:23, 24).

Laj yakʼ venta Jesus ti te xtal ta anil epal krixchanoetik ta stojolale. Vaʼun kʼalal te xa tsobol skotolike, xi la stsak ta utel pukuj li Jesuse: «Voʼot ti chapasvan ta umaʼ xchiʼuk ti chapasvan ta pakʼchikine, tsots chkalbot mantal ti akʼo xalokʼ ta stojolal xchiʼuk ti mu xa me xa-och yan veltae». Kʼalal lokʼ batel li pukuje, tsots avan yuʼun li kereme xchiʼuk ep ta velta la slikesbe stupʼ-ikʼ. Vaʼun jecheʼ xa te telel kom li uni kereme. Jaʼ yuʼun xi laj yalik ep krixchanoetike: «¡Cham xa!» (Markos 9:25, 26). Pe kʼalal la snitbe likel ta skʼob kerem li Jesuse tots likel, «jech oxal li vaʼ ora taje jaʼo poxtaj» (Mateo 17:18). Ta melel, ¡toj labal to sba laj yil krixchanoetik li kʼusi la spas Jesuse!

Kʼalal la stak batel ta cholmantal ta slikebal yajchankʼoptak li Jesuse, laj toʼox slokʼesik pukujetik. Jaʼ yuʼun kʼalal kʼotik ta nae, xi la sjakʼbeik ta stuk li Jesuse: «¿Kʼu yuʼun ti muʼyuk bu xlokʼ kuʼunkutik li pukuje?». Albatik yuʼun Jesus ti jaʼ ta skoj ti chʼabal lek xchʼunel yoʼontonike xchiʼuk xi albatike: «Yuʼun li jtos pukuj liʼe jaʼ noʼox ta orasion xuʼ xlokʼ» (Markos 9:28, 29). Skʼan tsots lek xchʼunel yoʼontonik xchiʼuk ti skʼanbeik sjuʼel Dios ta orasion sventa xuʼ slokʼesik li tsatsal pukuje.

Xi la stsutses sloʼil li Jesuse: «Chkalboxuk avaʼiik ta melel ti jechuk smukʼul xchʼunel avoʼontonik kʼuchaʼal bekʼ mostasae, xi chavalbeik jechuk li vits liʼe: ‹Lokʼan batel liʼe, batan leʼe›, vaʼun chbat, xchiʼuk chʼabal kʼusi ti mu xuʼ avuʼunik spasele» (Mateo 17:20). ¡Batsʼi toj tsots sjuʼel maʼ li xchʼunel koʼontontike!

Li kʼusitik tsmak ta be li kabteltik ta stojolal Jeovae xchiʼuk li vokoliletik ta jnuptantike, bakʼintike xkoʼolaj van kʼuchaʼal batsʼi mukʼta vits ti mu stakʼ jbalchʼuntik lokʼele o ti jlilintik lokʼele. Akʼo mi jech, mi ta jtsatsubtas lek li xchʼunel koʼontontike, ta me jtsaltik li makel ta bee xchiʼuk li vokoliletik ti xkoʼolaj kʼuchaʼal mukʼta vitse.