Kʼalal yakal chcholik mantal ta Galilea li yajtakboltak Jesuse, te tikʼil-o ta chukel li buchʼu laj yakʼ ta ojtikinel Jesuse. Jaʼ jech, poʼot xa xlokʼ chib jabil ti te tikʼil ta chukel li Juan J-akʼ-ichʼvoʼe.

Jamal laj yal Juan ti mu lekuk li kʼusi la spas li ajvalil Erodes Antipase, yuʼun laj yikʼbe yajnil li Filipoe, ti jaʼ sbankile. Jaʼ yuʼun la sutes li sbaʼyel ajnil sventa xnupun xchiʼuk li Erodiase. Chal Erodes ti xchʼunoj tajek li kʼusi chal Smantal Moisese, akʼo mi jech, jech onoʼox kʼuchaʼal chal li Mantal taje jaʼ jun tsatsal mulil li kʼusi la spase xchiʼuk la spojbe yajnil xchiʼil. Toj chopol laj yaʼi Erodes li kʼusi albat yuʼun Juane, jaʼ yuʼun la stikʼ ta chukel, yikʼaluk van jaʼ ta smantal Erodias ti jech la spase.

Mu snaʼ kʼusi tspasbe Juan li Erodese, yuʼun «jaʼ jun j-alkʼop chilik» (Mateo 14:5). Pe snaʼoj lek kʼusi tspas maʼ Erodiase. Yuʼun «xtiʼet sjol ta stojolal» li Juane, maʼuk noʼox, yuʼun tsabe tajek smelolal sventa akʼo xichʼ milel (Markos 6:19). ¡Kʼot me yorail tsmil un!

Kʼalal jutuk xaʼox skʼan li kʼin Koltael ta sjabilal 32 ta jkʼakʼaliltike, la xchapan jun mukʼta kʼin sventa slokʼel ta jabil li Erodese. La stak ta ikʼel li sviniktak ti tsots yabtelike, li komandanteetik yuʼun soltaroetike xchiʼuk li viniketik ti lek ojtikinbilik ta Galileae. Kʼalal jaʼo yakal li kʼine bat akʼotajuk li stseb Erodias ti Salome sbie, sventa x-elovaj li krixchanoetike. Li stot tseb taje jaʼ li Filipoe, ti jaʼ toʼox smalal li Erodiase. ¡Toj labal xa noʼox sba laj yil krixchanoetik ti kʼu yelan akʼotaje!

Ta skoj ti toj echʼ xa noʼox lek laj yil kʼu yelan akʼotaj tseb li Erodese, xi laj yalbee: «Kʼanbun ti kʼusi chakʼane, vaʼun ta xkakʼbot». Xi laj yakʼ ye ta stojolal li tsebe: «Ti kʼusi chakʼanbune ta xkakʼbot, akʼo mi chakʼanbun j-oʼloluk ti kʼu yepal jventainoje». Vaʼun xi bat yalbe smeʼ li Salome kʼalal mu to chal ti kʼusi tskʼane: «¿Kʼusi ta jkʼan xanaʼ?» (Markos 6:22-24).

¡Kʼot xa me yorail un li kʼusi oy tajek ta yoʼonton tskʼan tspas Erodiase! Jaʼ yuʼun xi la stakʼ ta orae: «Jaʼ xakʼanbe li sjol Juan chakʼ ichʼvoʼe». Vaʼun ta anil noʼox och batel ti bu oy Erodes li Salomee xchiʼuk xi la skʼanbee: «Ta jkʼan xalechbun tal ta ora ta jun mukʼta plato sjol li Juan J-akʼ-ichʼvoʼe» (Markos 6:24, 25).

Batsʼi chopol tajek laj yaʼi Erodes li kʼusi kʼanbate. Akʼo mi jech, ta skoj ti laj yaʼi skotol li buchʼutik laj yikʼ ta veʼel kʼalal laj yakʼ yee, toj kʼexlal sba chaʼi ti jech mu spase. Jech oxal laj yakʼ ta milel li vinik ti muʼyuk smule. Jaʼ yuʼun la stak echʼel yajsoltarotak ta chukinab sventa xbat xtuchʼbeik tal sjol li Juane. Te une, ta ora noʼox laj yichʼbeik tal ta jun mukʼta plato li sjol Juane. Vaʼun li Erodese laj yakʼbe li Salomee, laje bat yakʼbe smeʼ li Salomee.

Kʼalal laj yaʼi yajchankʼoptak Juan li kʼusi kʼot ta pasele, bat xkuchbeik tal li sbekʼtale sventa xbat smukbeik. Vaʼun bat yalbeik Jesus li kʼusi kʼot ta pasel ta stojolal li Juane.

Ta mas tsʼakale, batsʼi xiʼ ta jyalel li Erodese, yuʼun laj yaʼi ti yakal chpoxta krixchanoetik li Jesuse xchiʼuk ti tslokʼes pukujetike. Tsnop ti yuʼun «laj xa [...] yichʼ chaʼkuxesel» li Juan J-akʼ-ichʼvoʼe, yuʼun yaloj mi jaʼ yakal ta spasel li kʼusitik yakal tspas Jesuse (Lukas 9:7). Jaʼ yuʼun tskʼopon tajek yaʼi Jesus li Erodese. Pe ta melel maʼuk sventa chchikinta li kʼusi chcholbe skʼoplal Jesuse. Moʼoj, li kʼusi oy ta yoʼontone jaʼ ti tskʼel yaʼi mi melel o mi jecheʼ li kʼusi tsnop ta stojolal Juane.