Ta ora laj yaʼiik judaetik ti te nakalik ta snoroesteal tiʼ Nab Galilea ti lokʼ xa tal ta Dekapolis li Jesuse. Ep buchʼutik laj yaʼiik yaʼel ti lajik ta ikʼaloʼe, ti la spajes ikʼ, ti la spajes voʼ xchiʼuk oy buchʼutik laj yaʼiik yaʼel xtok ti la xpoxta viniketik ti ochem pukuj ta yoʼontonike. Vaʼun «te la stsob sbaik tal epal krixchanoetik» ta tiʼ nab, xuʼ van jaʼ te ta yosilal Kapernaum sventa xbat snupik ta be li Jesuse (Markos 5:21). Kʼalal kʼot ta tiʼ nabe xmuyubajik tajek li krixchanoetike, yuʼun tskʼanik xa onoʼox ti xvule.

Jun ti buchʼu tskʼopon tajek yaʼi Jesuse jaʼ li Jairoe, jun bankilal jpasmantal ta nail tsobobbail, yikʼaluk van jaʼ li ta nail tsobobbail ta Kapernaume. La skejan sba ta stojolal li Jesuse xchiʼuk xi laj yalbe ep ta veltae: «Toj tsots ip li kuni kʼox tsebe. Avokoluk tajek, laʼ akʼo akʼob ta stojolal sventa x-echʼ yuʼun xchiʼuk sventa xkuxi» (Markos 5:23). ¿Kʼu yelan laj yaʼi Jesus ti xvokolet tajek ta stojolal sventa chpoxtabe li yuni tseb ti lajcheb jabil yichʼoje? Yuʼun kʼajomal jun yuni tseb xchiʼuk skʼanoj tajek (Lukas 8:42).

Kʼalal stamoj xa batel sbe sventa chbat ta sna Jairo li Jesuse oy buchʼu te la sta xtok ti chat tajek yoʼontone. Ep ti buchʼutik te xchiʼukik Jesuse xmuyubajik tajek xchiʼuk tsjakʼbe sbaik mi ta van staik ta ilel yan skʼelobil juʼelal. Pe oy jun ants ti jaʼ noʼox batem ta yoʼonton li svokol stuke, yuʼun toj tsots ip.

Oy xa ta lajcheb jabil ti chil tajek svokol li jun juda antse, yuʼun mu xmak xchamel. Ep xa tajek yakʼoj sba ta kʼelel ta doktoretik xchiʼuk slajesoj xa skotol stakʼin ta poxiletik. Pe muʼyuk bu xkol-o. Ta melel, «jaʼ noʼox tsatsaj-o mas li xchamele» (Markos 5:26).

Kʼuchaʼal chkakʼtik ventae maʼuk noʼox chkʼunib-o li chamel staoje, moʼoj, yuʼun toj kʼexlal sba xchiʼuk toj abol jbatik yuʼun. Yuʼun muʼyuk jamal xa chal ti jech staoj chamel li jun antse. Jech xtok, kʼuchaʼal chal li Smantal Moisese ibal sba li ants ti mu xmak xchamele. Ti buchʼu la sta ta tijel li antse o ti tspikbe li skʼuʼ ti yatinoj xchʼichʼele skʼan x-atin xchiʼuk ibal sba chkom-o kʼalal to ch-och akʼobal (Levítico 15:25-27).

«Kʼalal laj yaʼibe skʼoplal» Jesus li ants taje bat saʼ. Ta skoj ti ibal sba kʼuchaʼal chal Smantal Moisese, ta mukul la sjam batel sbe ta skoj ti toj ep krixchanoetike, xi laj yalbe sbae: «Manchuk mi jaʼ noʼox ta jpikbe li skʼuʼtak slapoj ta sbae ta xikol». Vaʼun kʼalal la spikbe stsitsimal skʼuʼ li Jesuse, ¡ta ora noʼox mak laj yaʼi li xchamele! Yuʼun «laj yaʼi ta sbekʼtal ti poxtaj xa li xchamel ti toj ep laj yil-o svokole» (Markos 5:27-29).

Vaʼun xi laj yal li Jesuse: «¿Buchʼu ti la spikune?». ¿Kʼu van yelan laj yaʼi sba xanaʼ li ants kʼalal laj yaʼi li kʼusi laj yal Jesuse? Xi ch-ilin xa laj yal li Pedroe: «Kakalot ta oʼlol yuʼun li epal krixchanoetike xchiʼuk solel tsnetʼoxuk». Vaʼun chaʼa, ¿kʼuxi ti xi tsjakʼ li Jesuse?: «¿Buchʼu ti la spikune?». Xi laj yalbe smelolale: «Oy buchʼu la spikun, yuʼun laj kaʼi ti lokʼ juʼele» (Lukas 8:45, 46). Melel onoʼox, kʼalal oy buchʼu chpoxta li Jesuse chjutukaj yipal.

Laj yakʼ venta ti vinaj xa li antse, jaʼ yuʼun xtʼeltʼun ta xiʼel la skejan sba ta stojolal li Jesuse. Akʼo mi te yiloj skotol krixchanoetik, laj yal ta jamal kʼusi chamelal staoj xchiʼuk ti poxtaj xae. Pe ta slekil yoʼonton xi la spatbe yoʼonton li antse: «Jtseb, lapoxtaj xa ta skoj li xchʼunel avoʼontone. Junuk avoʼonton batan, yuʼun kol xa li achamel ti toj ep laj avil-o avokol yuʼune» (Markos 5:34).

Ta melel, li Buchʼu tʼujbil yuʼun Dios sventa tsventain li Balumile maʼuk noʼox oy slekil yoʼonton, chkʼuxubinvan xchiʼuk ti oy ta yoʼonton tskoltautike, moʼoj, yuʼun oy sjuʼel xtok sventa spas yuʼun.