Te xa van junuk jabil ochem ta chukel li Juan J-akʼ-ichʼvoʼe. Akʼo mi jech, chaʼibe skʼoplal li kʼusitik labalik sba tspas Jesuse. Nopo xa noʼox avaʼi kʼu to yelan laj yaʼi Juan kʼalal albat yuʼun yajchankʼoptak ti la xchaʼkuxesbe skerem jun meʼon ants ta Nain li Jesuse. Pe tskʼan chaʼibe mas skʼoplal, ti jaʼuk xal stuk Jesus kʼusi smelolal li kʼusitik tspase. Jaʼ yuʼun la stak ta ikʼel chaʼvoʼ yajchankʼoptak li Juane. ¿Kʼu yuʼun? Sventa xi xbat sjakʼbeik li Jesuse: «¿Mi voʼot li Buchʼu chtale, o mi yan-o buchʼu ta jmalakutik?» (Lukas 7:19).

¿Kʼu yuʼun ti jech la sjakʼ li Juane? Veno, jaʼ jun vinik ti yichʼoj ta mukʼ Diose, yuʼun kʼalal laj yakʼbe yichʼ voʼ Jesus ti poʼot xa xlokʼ chib jabile, laj yil yal tal xchʼul espiritu Dios ta stojolal li Jesuse xchiʼuk laj yaʼi kʼalal laj yal Dios ti xmuyubaj ta stojolale. Jech oxal, muʼyuk srasonal kuʼuntik sventa ta jnoptik ti kʼunib xa xchʼunel yoʼonton li Juane. Yuʼun ti jechuke muʼyuk bu kʼupil kʼoptaat yuʼun Jesus. Vaʼun chaʼa, mi muʼyuk xchibet yoʼontone, ¿kʼu yuʼun ti jech la sjakʼe?

Yikʼaluk van li kʼusi oy ta yoʼonton Juane jaʼ ti akʼo yal stuk Jesus ti jaʼ li Mesiase. Jaʼ van chpatbat-o yoʼonton ti abol sba ti te tikʼil-o ta chukele. Pe oy kʼusi yan smakojbe skʼoplal yaʼel li kʼusi la sjakʼe. Yuʼun xojtikin li albil kʼopetik ta Vivlia ti chalbe skʼoplal ti ch-och ta ajvalil xchiʼuk tspojutik li Buchʼu Tʼujbil yuʼun Diose. Pe kʼalal oy xaʼox ta sjayibal u ti laj yichʼ voʼ li Jesuse, och ta chukel li Juane. Snaʼoj ti oy to jayibuk albil kʼopetik ta sventa Mesias ti skʼan to xkʼot ta pasele. Jaʼ yuʼun, kʼalal jech la sjakʼe jaʼ sventa xaʼi lek mi oy to buchʼu chtal ta xkʼexol Jesus ti jaʼ chkʼot ta pasel ta stojolal li albil kʼopetik taje.

Pe mu xiuk noʼox laj yal li Jesuse: «Jaʼ jech ta melel, voʼon li Buchʼu chtale». Moʼoj, yuʼun laj yakʼbe sprevail ti koltabil yuʼun Dios kʼalal chpoxta epal krixchanoetik ti jeltos kʼusitik kʼux chaʼiike xchiʼuk ti jeltos xchamelike. Vaʼun xi laj yalbe li yajchankʼoptak Juane: «Batanik, bat albeik Juan li kʼusi yakal chavilik xchiʼuk li kʼusi yakal chavaʼiike: li maʼsatetike chilik xa osil, li koxoetike chanavik xa, li buchʼutik ipik ta kʼaʼemal chamele kolik xa, li pakʼchikinetike chaʼiik xa kʼoponel, li buchʼutik chamemike chchaʼkuxiik xa xchiʼuk li buchʼutik abol sbaike chichʼik xa cholbel li lekil aʼyejetike» (Mateo 11:4, 5).

Kʼalal oy kʼusi la sjakʼ li Juane, xuʼ van jaʼ tskʼan chakʼ ta aʼiel ti oy to kʼusi skʼan spas li Jesuse, ti maʼuk noʼox li kʼusitik labalik sba tspase, jaʼ xkaltik, ti xuʼuk xlokʼesat ta chukele. Pe li Jesuse laj yalbe Juan ti muʼyuk tspas li skʼelobil juʼelal taje, jaʼ noʼox li kʼusitik yakal tspase.

Kʼalal lokʼik xaʼox batel li yajchankʼoptak Juane, li Jesuse laj yalbe epal krixchanoetik ti maʼuk noʼox jun j-alkʼop li Juane. Yuʼun jaʼ li «jʼalmantal» yuʼun Jeova ti laj yichʼ albel skʼoplal ta Malaquías 3:1. Jaʼ xtok li j-alkʼop Eliase, jech kʼuchaʼal albil skʼoplal ta Malaquías 4:5, 6. Xi laj yalbe smelolal li Jesuse: «Ta melel chkalboxuk avaʼiik ti muʼyuk buchʼu mas jelavem skʼoplal vokʼem tal ta stojolal junuk ants jech kʼuchaʼal li Juan J-akʼ-ichʼvoʼe, pe li buchʼu mas bikʼit skʼoplal li ta Ajvalilal ta vinajele jaʼ mas to jelavem skʼoplal ti jaʼ mu sta li Juane» (Mateo 11:11).

 Xi laj yal li Jesuse: «Li buchʼu mas bikʼit skʼoplal li ta Ajvalilal ta vinajele jaʼ mas to jelavem skʼoplal ti jaʼ mu sta li Juane». Taje jaʼ laj yakʼ ta aʼiel ti muʼyuk ch-och ta Ajvalilal ta vinajel li Juane. Jaʼ jech, li Juane jaʼ la xchapanbe sbe li Jesuse, pe ta skoj ti cham noʼoxe muʼyuk xa laj yil kʼalal la sjam be sventa vinajel li Jesuse (Evreos 10:19, 20). Pe jaʼ jun tukʼil yaj-alkʼop Dios echʼ li Juane, jaʼ yuʼun liʼ chnaki ta balumil ti chventainat yuʼun li Ajvalilal yuʼun Diose.