Ta smilal noʼox krixchanoetik la smakʼlin te ta Nab Galilea ta slokʼeb Kʼakʼal li Jesuse, pe jatav talel ta skoj ti tskʼan chtikʼat ta ajvalile. Li vaʼ akʼobale jaʼo xanav ta ba nab ti jaʼo yakal tajek tsatsal ikʼe xchiʼuk ti la snit lokʼel Pedroe, yuʼun lik xanavuk ta ba voʼ ek, pe och yalel ta skoj ti kʼunib xchʼunel yoʼontone. Vaʼun la spajes ikʼ li Jesuse, jaʼ van jech la skolta yajchankʼoptak sventa mu x-ochik yalel ta nab.

Vaʼun tsut xa batel ta smaleb Kʼakʼal li Jesuse, ta xokon nab ta yosilal Kapernaum. Xi la sjakʼik li buchʼutik la smakʼlin ta skʼelobil juʼelale: «¿Kʼusi ora lavul liʼe?». Pe lajik ta utel yuʼun Jesus, yuʼun la tskʼanik makʼlinel yan velta ti tsaʼike. Jaʼ yuʼun xi albatike: «Abtejanik, pe maʼuk sventa chasaʼik li veʼlil ti snaʼ xlaje, jaʼ ta sventa li veʼlil ti te oy-o sventa kuxlejal sbatel osile». Pe xi la sjakʼike: «¿Kʼusi skʼan jpaskutik sventa ta jpasbekutik li yabtel Diose?» (Juan 6:25-28).

Li stukike jaʼ van yakal tsnopbeik skʼoplal li abtelaletik chal Mantale, pe li Jesuse jaʼ yakal chal li kʼusi mas to tsots skʼoplale, xi laj yale: «Jaʼ yabtel Dios liʼe: akʼo xchʼunel avoʼontonik ta stojolal ti buchʼu stakoj tal Stuke». Pe muʼyuk bu jech yakʼoj xchʼunel yoʼontonik ta stojolal Jesus li krixchanoetik taje, manchuk mi ep xa kʼusitik yilojik tspas. Tskʼanik to ti akʼo spas junuk senyail sventa xakʼ xchʼunel yoʼontonik ta stojolale. Jaʼ yuʼun xi la sjakʼike: «¿Kʼusi abtelal chapas?», xutik. Yuʼun «la sveʼik mana ta takixokol balumil li jmoltotakutik ta voʼnee, jech onoʼox kʼuchaʼal xi tsʼibabile: ‹Akʼbat pan sveʼik ti likem tal ta vinajele›» (Juan 6:29-31; Salmo 78:24).

Ta sventa ti la skʼanbeik Jesus ti akʼo spas junuk senyaile, xi albatik yuʼun Jesus ti buchʼu chakʼ ta melel li veʼlil ta skʼelobil juʼelale: «Chkalboxuk avaʼiik ta batsʼi melel: li Moisese maʼuk laj yakʼboxuk li pan ti likem tal ta vinajele, yan li Jtote jaʼ chakʼboxuk li batsʼi pan likem tal ta vinajele. Yuʼun li pan ti likem tal ta stojolal Diose jaʼ li buchʼu likem tal ta vinajele xchiʼuk ti chakʼbe xkuxlejal li krixchanoetike». Muʼyuk xaʼibeik smelolal li kʼusi albatike, jaʼ yuʼun xi la skʼanike: «Kajval, jaʼ akʼbunkutik skotol kʼakʼal li pan taje» (Juan 6:32-34). Pe ¿kʼusi van panil chalbe skʼoplal li Jesuse?

Xi chalbe smelolale: «Voʼon li panun sventa kuxlejale. Li buchʼu chtal ta jtojolale mi jaʼuk xa bu chaʼi viʼnal xchiʼuk li buchʼu chakʼ xchʼunel yoʼonton ta jtojolale mi jaʼuk xa bu chaʼi takitiʼil. Pe jech kʼuchaʼal kalojboxuke: akʼo mi avilojikun, mi jaʼuk xachʼunik [...]. Yuʼun likemun tal ta vinajel, pe maʼuk sventa tal jpas li kʼusi tskʼan koʼonton jtuke, jaʼ li kʼusi tskʼan yoʼonton li buchʼu la stakun tale. Liʼe jaʼ li kʼusi tskʼan yoʼonton li buchʼu la stakun tale: jaʼ ti akʼo mu xchʼay kuʼun mi junuk li buchʼutik yakʼojbune, moʼoj, jaʼ ti akʼo jchaʼkuxes ta slajebal kʼakʼale. Yuʼun li kʼusi tskʼan yoʼonton Jtote jaʼ liʼe: jaʼ ti tsta xkuxlejal sbatel osil li buchʼu xojtikin lek li Nichʼonile xchiʼuk ti chakʼ xchʼunel yoʼonton ta stojolale» (Juan 6:35-40).

Lik-o kʼop taje, jaʼ yuʼun lik xchopol kʼoptaik Jesus li judaetike. Xi tsnopike: «¿Kʼuxi xa noʼox ti chal Jesus ti jaʼ li ‹[pan] ti likem tal ta vinajele›?» (Juan 6:41). Yuʼun li stot smeʼ Jesuse jaʼik noʼox krixchanoetik chilik ti te likemik ta Nasaret ta yosilal Galileae. Jaʼ yuʼun xi tsjakʼbe sbaik li krixchanoetike: «¿Mi mu jaʼuk xnichʼon Jose li Jesus liʼe, ti xkojtikinbetik li stot smeʼe?» (Juan 6:42).

Xi la stakʼ li Jesuse: «Iktao abaik ta bikʼtal kʼopojel». Yuʼun «muʼyuk buchʼu xuʼ yuʼun chtal ta jtojolal mi muʼyuk bu ikʼbil tal yuʼun li Totil ti la stakun tale, vaʼun ta jchaʼkuxes ta slajebal kʼakʼal. Xi tsʼibabil yuʼun li J-alkʼopetike: ‹Chchanubtasatik yuʼun Jeova skotolik›. Li buchʼu chaʼi kʼusi chal li Totile xchiʼuk ti xchanoj xae chtal ta jtojolal. Mi junuk krixchano yiloj li Totile, jaʼ noʼox li  buchʼu likem tal ta stojolal Diose; leʼe yiloj li Totile. Chkalboxuk avaʼiik ta batsʼi melel ti buchʼu chchʼun li kʼusi chkale tsta xkuxlejal sbatel osil» (Juan 6:43-47; Isaías 54:13).

Kʼalal la xchiʼin ta loʼil Nikodemo li Jesuse te laj yalbe skʼoplal kuxlejal sbatel osil xchiʼuk laj yal ti skʼan xkakʼ xchʼunel koʼontontik ta stojolal li Xnichʼon krixchano sventa jtatike, yuʼun xi laj yale: «Laj yakʼ li jun noʼox Xnichʼon sventa mu xichʼ lajesel li buchʼu chakʼ xchʼunel yoʼonton ta stojolale, moʼoj, yuʼun jaʼ sventa tsta-o xkuxlejal sbatel osil» (Juan 3:15, 16). Pe li avie, mas xa ep buchʼutik chchiʼin ta loʼil Jesus ta sventa ti kʼusi yabtel yoʼ staik li kuxlejal sbatel osile, ti maʼuk chakʼ li mana la slajesik ta voʼnee mi jaʼuk li pan xojtikinik ta Galileae. Vaʼun chaʼa, ¿kʼuxi xuʼ staik li kuxlejal sbatel osile? Xi laj yal yan veltae: «Voʼon li panun sventa kuxlejale» (Juan 6:48).

Jech-o tsvulilan sbaik ta sventa li pan likem tal ta vinajele, jaʼ to te chkʼot ta tsutsel kʼalal chchanubtasvan ta nail tsobobbail ta Kapernaum li Jesuse.