Vaʼun kʼalal mu toʼox jaluk yechʼel ti laj yalbe skʼoplal Jesus li perton te ta sna Simon ti jaʼ jun jfariseoe, bat xchibal velta sventa chchol mantal ta Galilea. Stsakoj xa chib jabil chchol mantal, pe li avi une mu stukuk bat. Bat chiʼinatuk yuʼun li lajchaʼvoʼ yajtakboltake xchiʼuk junantik antsetik «ti laj yichʼik lokʼesbel pukujetik ti toj chopolike xchiʼuk ti poxtaatike» (Lukas 8:2). Te oy Maria Magdalena, Susana xchiʼuk Juana, ti jaʼ li yajnil jun yajtunel ajvalil Erodes Antipase.

Yantik x-epaj batel li krixchanoetik ti lek chaʼiik li kʼusi chakʼ ta chanel Jesuse, pe jech xtok un yantik xlik-o mas kʼop li cholmantal tspase. Jaʼ jech chakʼ ta ilel kʼalal te ikʼbat tal jun vinik sventa chpoxta ti uʼuninbil yuʼun pukuje. Li vinik taje maʼsat xchiʼuk umaʼ. Li avi une, xil xa osil xchiʼuk xkʼopoj xa, yuʼun lokʼesbat yuʼun Jesus li pukuje. Labal to sba laj yil li krixchanoetike, xi laj yalike: «¿Mi mu jaʼuk van li xnichʼon David leʼe?» (Mateo 12:23).

Batsʼi noj ta krixchanoetik li spat xokon na ti bu oy li Jesuse, jaʼ yuʼun mi jaʼuk xakʼ ora xveʼik xchiʼuk li yajchankʼoptake. Pe mu skotoluk krixchanoetik xchʼunojik ti jaʼ «xnichʼon David» kʼuchaʼal albil onoʼox skʼoplale. Jech xtok, te talik jlom jchanubtasvanejetik ta Mantal xchiʼuk jfariseoetik ti ta Jerusalen to likemik tale, pe maʼuk sventa tal yaʼiik li kʼusitik chakʼ ta chanel Jesuse o ti tal skoltaike. Moʼoj, yuʼun xi chalbeik li krixchanoetike: «Ochem Beelsebub ta yoʼonton». Jaʼ yuʼun, «jaʼ ta stsatsal ajvalil yuʼun pukujetik ti tslokʼes pukujetike» (Markos 3:22). Kʼalal laj yaʼi yutsʼ yalal Jesus ti kʼusitik chal li krixchanoetike, bat snit tal yalojik. ¿Kʼu yuʼun?

Jaʼ jech, li yitsʼinabe muʼyuk bu xchʼunojik mi jaʼ Xnichʼon Dios li Jesuse (Juan 7:5). Kʼuchaʼal chkiltike  mu xa jechuk chilik Jesus kʼalal jmoj chʼiik tal ta Nasarete, yuʼun ep xa buchʼutik chkap-o sjolik li avie. Jaʼ yuʼun lik snopik ti ip ta sjole, xi laj yalike: «Likem xchuvaj» (Markos 3:21).

Pe ¿kʼusi chakʼ ta ilel li kʼusi kʼot ta pasele? Veno, li Jesuse naka to la xpoxta jun vinik ti ochem toʼox pukuj ta stojolale, pe ti xil xa osil avie xchiʼuk ti xkʼopoj xae. Muʼyuk buchʼu xuʼ xal ti mu jechuke. Pe li jchanubtasvanejetik ta Mantal xchiʼuk li jfariseoetike oy kʼusitik lik yalik sventa chopol skʼoplal xkom yuʼunik li Jesuse. Jaʼ yuʼun xi laj yalike: «Li vinik leʼe ta stsatsal Beelsebub tslokʼes li pukujetike, ti jaʼ li ajvalil yuʼun pukujetike» (Mateo 12:24).

Snaʼoj Jesus li kʼusi yakalik snopele, jaʼ yuʼun xi laj yale: «Skotol li ajvalilal ti xchʼakoj skontrainoj sba stuke ta xlaj, xchiʼuk skotol li jteklum o li jpʼej na ti xchʼakoj skontrainoj sba stuke mu me teuk vaʼal-o. Jaʼ noʼox jech ek, mi Satanas tslokʼes li Satanase, xchʼakoj skontrainoj sba stuk un bi; mi jaʼ jeche, ¿kʼuxi vaʼal chkom li ajvalilal yuʼune?» (Mateo 12:25, 26).

¡Batsʼi jech yaʼuk maʼ Jesuse! Snaʼoj jfariseoetik ti oy judaetik ti tslokʼesik pukuje (Echos 19:13). Jaʼ yuʼun xi la stakʼe: «Mi ta stsatsal Beelsebub ta jlokʼes li pukujetike, ¿buchʼu ta stsatsal tslokʼes pukujetik li anichʼnabike chaʼa?». Jaʼ xkaltik, jaʼ noʼox jech albatik yuʼun Jesus li kʼusi laj yalik ta stojolale. Vaʼun xi to la sjambe lek smelolale: «Pe mi jaʼ ta stsatsal xchʼul espiritu Dios ta jlokʼes li pukujetike, ta melel liʼ xa me chʼayal avoʼonton la staoxuk li Ajvalilal yuʼun Diose» (Mateo 12:27, 28).

Laj yal jun lokʼolkʼop sventa chakʼ ta ilel ti oy sjuʼel sventa tspas ta mantal Satanas kʼalal tslokʼes pukujetik li Jesuse, xi laj yale: «¿O buchʼu xuʼ yuʼun ch-och ta sna jun tsatsal vinik sventa xelkʼanbe kʼusitik oy yuʼun mi muʼyuk baʼyel chchuke? Jaʼ to me jech xuʼ xelkʼanbe li kʼusitik oy ta sna mi baʼyel la xchuke. Buchʼuuk noʼox ti muʼyuk oy ta jtojolale skontrainojun, jech xtok buchʼuuk noʼox ti mu skoltaun ta stsobele ta stani batel» (Mateo 12:29, 30). Ta skoj ti skontrainojik Jesus li jchanubtasvanejetik ta Mantal xchiʼuk li jfariseoetike, jamal xvinaj ti jaʼik sviniktak Satanase. Vaʼun jaʼ jech tsnamajesik krixchanoetik ta stojolal li Xnichʼon Diose, ti koltabil yuʼun Jeovae.

Xi tsots laj yalbe mantal li sviniktak Satanase: «Skotol chichʼ pasbel perton li xnichʼnab krixchanoetike, kʼusiuk mulil xchiʼuk kʼusiuk chopol kʼopojel ti chopol chichʼ alele. Pe buchʼuuk noʼox ti chchopol kʼopoj ta stojolal chʼul espiritue muʼyuk me chichʼ pasbel perton sbatel osil, moʼoj, oy-o smul sbatel osil» (Markos 3:28, 29). ¡Toj chopol kʼusi tsnuptanik li buchʼutik laj yalik ti jaʼ ta sjuʼel Satanas li kʼusi jamal xvinaj ti jaʼ ta sventa li xchʼul espiritu Diose!