Ta skoj ti jelel kʼu yelan yoʼonton li krixchanoetike, jelajtik kʼu yelan chilik li kʼusi chal xchiʼuk li kʼusi tspas Jesuse. Jaʼ jech jamal vinaj te ta jpʼej na ta Galilea. Oy jun jfariseo vinik ti Simon sbie, laj yikʼ ta veʼel Jesus ta sna, yuʼun van tskʼan tskʼel yaʼi buchʼu ti la spas li skʼelobil juʼelal ti toj labal xa noʼox sbae. La xchʼam li Jesuse, yuʼun xuʼ xcholbe mantal laj yil li buchʼutik te chbatik eke. Jaʼ onoʼox jech la spas jun velta xtok, bat ta veʼel xchiʼuk li jtsobpatanetik xchiʼuk jpasmuliletike.

Pe muʼyuk bu jech lek laj yichʼ chʼamel Jesus kʼuchaʼal nopem onoʼox xaʼiike. Ta skoj ti pukuktik tajek li bebetik ta Palestinae xchiʼuk ti naka varach snaʼ slapike, solel balom pukuk tajek li yokike xchiʼuk chkʼakʼub tajek. Jaʼ yuʼun nopem xaʼi tspokbeik yok ta sikiloʼ yajvulaʼalik sventa chakʼ ta ilel slekil yoʼontonik. Pe muʼyuk bu xpokbat yok li Jesuse. Nopem xaʼi tstsʼutsʼ yajvulaʼalik xtok, pe muʼyuk bu jech xchʼamik li Jesuse. Jtos ti kʼusi nopem xaʼiik xtoke, jaʼ ti tsmalbeik aseite ta sjol li yajvulaʼalike sventa chakʼ ta ilel slekil yoʼontonik xchiʼuk ti lek chchʼamvan ta snaike. Muʼyuk bu jech la spasbeik xtok li Jesuse. Yuʼun ta melel, muʼyuk la xchʼamik.

Te lik veʼikuk ta mexa li buchʼutik takbilik ta ikʼele. Kʼalal yakalik ta veʼele, te kʼun xa och tal jun ants ti muʼyuk bu ikʼbil ta veʼele. Li ants taje «ojtikinbil kʼuchaʼal jpasmulil» ta jteklum (Lukas 7:37). Melel onoʼox ti jkotoltik jpasmulilutike, pe li ants taje naka mulivajel tspas, yikʼaluk van jaʼ jun jchonbail ants. Pe yabinoj van li chanubtaseletik chakʼ Jesuse, ti te tsakal skʼoplal ti xi laj yale: ‹Laʼik ta jtojolal ti buchʼutik ol avikatsike, voʼon ta jsikubtas avoʼontonik› (Mateo 11:28, 29). Vaʼun ta skoj li kʼusi chal xchiʼuk li kʼusi tspas Jesuse, jaʼ tijbat-o yoʼonton yaʼel sventa xtal skʼopon Jesus li ants taje.

Te vul ta spat li Jesus ti bu chveʼ ta mexae xchiʼuk te la skejan sba ta yok. Te une, la xtʼuxubtasbe yok ta yaʼlel sat, vaʼun la skusbe ta stsotsil sjol. Maʼuk noʼox, yuʼun la skʼunil tsʼutsʼbe li xchibal yoke xchiʼuk yichʼoj tal muil aseite sventa chjaxbe ta yok. Muʼyuk lek laj yil Simon taje, xi laj yalbe sbae: «Ti j-alkʼopuk ta melel li vinik liʼe, xojtikin jechuk buchʼu li antse xchiʼuk snaʼoj jechuk ti kʼu yelan stalelal li buchʼu la spik okile, ti jaʼ jun jpasmulile» (Lukas 7:39).

Laj yil kʼusi tsnop Simon li Jesuse, jaʼ yuʼun xi laj yale: «Oy kʼusi chkalbot, Simon». Xi la stakʼe: «Alo kaʼitik, Jchanubtasvanej». Vaʼun xi lik yal li Jesuse: «Oy chaʼvoʼ viniketik ti oy yilik ta stojolal jun vinik ti chakʼ ta chʼamunel stakʼine; li june oy 500 ta sep denario yil, pe li june 50 ta sep. Kʼalal mu xa sut yilik li viniketik taje, ta sjunul yoʼonton la xchʼaybe yil xchaʼvoʼalik. Jaʼ yuʼun chaʼa, ¿buchʼu junukal mas skʼanoj?». Mu ta sjunuluk yoʼonton xi la stakʼ li Simone: «Ta jnope jaʼ ti buchʼu mas ep chʼaybat yile» (Lukas 7:40-43).

«Jech avaʼuk», xi li Jesuse. Vaʼun xi laj yalbe Simon kʼalal la skʼel batel li antse: «¿Mi xavil li ants liʼe? Kʼalal li-och ta yut anae muʼyuk laj avakʼbun voʼ sventa li koke. Yan li ants liʼe la xtʼuxubtasbun kok ta yaʼlel sat xchiʼuk la skus ta stsotsil sjol. Muʼyuk bu la atsʼutsʼun maʼ voʼote, jaʼuk li ants liʼe muʼyuk bu lajem-o yoʼonton ta skʼunil tsʼutsʼel kok ti kʼu xa sjalil li-och tale. Muʼyuk bu la amalbe aseite li jole, jaʼuk li ants liʼe la smalbe muil aseite li koke». Laj yil Jesus ti ta sjunul yoʼonton chakʼ ta ilel ti sutesoj yoʼonton ta skoj li mulivajel tspas li ants taje. Jaʼ yuʼun xi la stsutses sloʼile: «Chkalbot avaʼi ti pasbil xa perton li smultake manchuk mi toj ep, yuʼun toj echʼ noʼox kʼanvan; yan li buchʼu jutuk noʼox chkʼanvane jutuk noʼox chichʼ pasbel perton» (Lukas 7:44-47).

 Pe maʼuk chakʼ ta aʼiel ti lek chil mulivajel li Jesuse. Moʼoj, ti kʼusie chakʼ ta ilel xkʼuxul yoʼonton ta stojolal li buchʼutik tsots spasoj smulike, pe ti chakʼ ta ilel ti chopol chaʼiik ta melel xchiʼuk ti chtal saʼ siketel yoʼontonik ta stojolale. Jaʼ yuʼun siket van tajek laj yaʼi yoʼonton ants kʼalal xi albat yuʼun li Jesuse: «Pasbil xa perton li amultake [...]. Laj xa skoltaot li xchʼunel avoʼontone; junuk avoʼonton batan» (Lukas 7:48, 50).