Laj yil Jairo kʼalal poxtaat yuʼun Jesus li ants ti mu xmak xchamele. Ta melel, patbat van yoʼonton ti xuʼ xpoxtabat li stseb eke, pe chaʼi noʼoxe ‹cham xa› (Mateo 9:18). ¿Mi xuʼ to van skolta un chaʼa?

Kʼalal yakal to chchiʼin ta loʼil ants li Jesuse, jaʼo te vulik jayvoʼ viniketik ti likemik talel ta sna li Jairoe, xi vul yalbeike: «¡Cham xa maʼ li atsebe! Altik xa chavakʼbe svokol li Jchanubtasvaneje» (Markos 5:35).

¡Toj chopol xa noʼox laj yaʼi li kʼusi albate! Manchuk mi solel ichʼbil tajek ta mukʼ ta slumal li Jairoe, batsʼi mu xa noʼox x-echʼ chaʼi li svokole. Yuʼun cham li stseb ti kʼajomal noʼox june. Pe kʼalal laj yaʼi Jesus taje, xi la spatbe yoʼontone: «Mu xaxiʼ, jaʼ noʼox skʼan oyuk xchʼunel avoʼonton» (Markos 5:36).

Vaʼun li Jesuse bat xchiʼin Jairo kʼalal sut batel ta snae. Jaʼ to chil kʼalal kʼotike solel mu x-echʼ chaʼiik meʼonal li krixchanoetike, yuʼun x-avetik ta okʼel xchiʼuk tsmaj stiʼ yoʼontonik ta skoj ti chat tajek yoʼontonike. Vaʼun och batel li Jesuse xchiʼuk xi laj yale: «Muʼyuk chamem maʼ li uni tsebe, jaʼ noʼox chvay» (Markos 5:39). Pe lik stseʼintaik Jesus kʼalal laj yaʼiik krixchanoetik taje, yuʼun snaʼojik ti chamem ta melel li uni tsebe. Akʼo mi jech, li Jesuse tstunesbe sjuʼel Dios sventa chakʼ ta ilel ti xuʼ xkuxi yan velta li jun krixchano ti chamem xae, jech kʼuchaʼal kʼalal oy buchʼu ta jtijtik likel ti batem xchʼulel ta vayele.

Laje laj yal Jesus ti akʼo xlokʼik batel li krixchanoetik tee, jaʼ xa noʼox te komik li Pedro, Santiago, Juan xchiʼuk li stot smeʼ uni tsebe. Vaʼun ikʼatik batel yuʼun Jesus svoʼobalik ti bu telel li uni tsebe. La stsakbe skʼob li uni tsebe, vaʼun xi laj yalbee: «‹Tal·i·tha ku·mi›, taje xi smelolal kʼalal chichʼ jelubtasele: ‹Xi chkalbote uni kʼox tseb: «¡Likan!»›» (Markos 5:41). Ta ora noʼox tots li uni tsebe xchiʼuk lik xanavuk. ¡Nopo xa noʼox avaʼi kʼu to yelan xmuyubaj Jairo xchiʼuk yajnil kʼalal laj yil chaʼkuxi li yuni tsebike! Sventa chakʼ ta ilel Jesus ti yuʼun kuxul ta melel li uni tsebe laj yal mantal ti akʼo yakʼbeik sveʼele.

Jech onoʼox kʼuchaʼal nopem xaʼi chal Jesus ti akʼo mu xalik batel ti buchʼu poxtaatik li krixchanoetike, jaʼ jech laj yalbe mantal ek li Jairo xchiʼuk yajnile. Pe ta skoj ti xmuyubajik tajek li totil meʼil liʼe xchiʼuk li yan krixchanoetike la spukbeik batel «skʼoplal ta sjunul lum li kʼusi kʼot ta pasele» (Mateo 9:26). ¿Mi mu jechuk xamuyubaj tajek chavalbe skʼoplal ek ti xchaʼkuxi junuk avutsʼ avalale? Liʼe jaʼ xa xchibal velta chal Vivlia ti chaʼkuxesvan li Jesuse.