Te kʼotik ta Betsaida xchiʼuk yajchankʼoptak li Jesuse. Vaʼun li krixchanoetike laj yikʼbeik tal jun maʼsat vinik xchiʼuk la skʼanbeik vokol ti akʼo spikbe sat sventa chpoxtae.

Vaʼun la snit batel vinik li Jesuse xchiʼuk laj yikʼ batel ta spat jteklum. Kʼalal laj xaʼox stubtabe sat li vinike, xi la sjakʼbee: «¿Mi xavil xa jutuk osil?». Xi laj yal li vinike: «Xkil krixchanoetik, pe koʼol xchiʼuk teʼetik yilel, jaʼ noʼox ti kʼusie xvaʼlajetik» (Markos 8:23, 24). La spikbe li sate, vaʼun lik yil osil, jaʼ yuʼun lek xa jamal osil chil. Laje la stak batel ta sna xchiʼuk laj yalbe ti akʼo mu x-och batel li ta jteklume.

Vaʼun batik ta norte li Jesus xchiʼuk yajchankʼoptake, ta Sesarea yuʼun Filipo. Vaʼaltik tajek ti bu muyik batele, te van 40 kilometrouk xanavik. Te van 350 metrouk xil yalel tiʼ nab ti bu muyik batele, jaʼ te oy li vits Hermón ti pixil ta taiv ti te oy ta norestee. Jalijik van chib oxibuk kʼakʼal sventa xkʼotik te.

Kʼalal ta be xa xlokʼik batele oy bu bat spas orasion stuk li Jesuse. Ta skoj ti kʼajomal xa noʼox baluneb o lajuneb u skʼan xcham li Jesuse chat tajek yoʼonton ta sventa li yajchankʼoptake. Yuʼun ep buchʼutik ti muʼyuk xa tstsʼakliate xchiʼuk ep buchʼutik ti mu xaʼibeik lek smelolale o ti chibajem yoʼontonike. Yikʼaluk van tsnopik kʼu yuʼun ti muʼyuk lek chaʼi Jesus ti chakʼik persa krixchanoetik sventa xtikʼat ta ajvalile xchiʼuk ti kʼu yuʼun muʼyuk tspasbe junuk senyail sventa xakʼ ta ilel ti buchʼu ta melele.

Kʼalal te kʼotik jchankʼopetik ti bu tspas orasion li Jesuse, xi jakʼbatike: «¿Buchʼu la jaʼ chalik li Xnichʼon krixchanoe?». Xi la stakʼike: «Jlome chalik ti voʼot la li Juan J-akʼ-ichʼvoʼe, yantike chalik ti voʼot la li Eliase, jlome chalik ti voʼot la li Jeremiase o voʼot la junuk j-alkʼop». Jaʼ jech ta melel, oy buchʼutik tsnopik ti jaʼ chaʼkuxi junuk li viniketik taje. Sventa tsnaʼ kʼusi tsnop yajchankʼoptak li Jesuse, xi la sjakʼe: «Pe li voʼoxuke, ¿buchʼuun avalojik?». Xi la stakʼ ta ora li Pedroe: «Voʼot li Kristoote, li Xnichʼon kuxul Diose» (Mateo 16:13-16).

Albat yuʼun Jesus ti akʼo xmuyubajuk noʼox li Pedroe, yuʼun jaʼ akʼbat snaʼ yuʼun li Diose xchiʼuk xi to albate: «Voʼot Pedroot, ta jvaʼan jtsobobbail li ta sba ton liʼe, vaʼun muʼyuk bu tstsalat yuʼun li yochebaltak Mukinale». Jaʼ jech, laj yal stuk Jesus ti tsvaʼan jun tsobobbail xchiʼuk ti mi jaʼuk te chukbilik-o yuʼun li mukinal mi tukʼ laj yakʼ sbaik liʼ ta balumil li buchʼutik te oyik li ta tsobobbail taje. Xi laj yalbe ta melel li Pedroe: «Voʼon chkakʼbot li syaveal Ajvalilal ta vinajele» (Mateo 16:18, 19).

Maʼuk laj yakʼ ta aʼyel Jesus ti jaʼ xa bankilal chkʼot yuʼun jtakboletik li Pedroe xchiʼuk maʼuk skʼan xal ti jaʼ li snakleb o yoyal tsobobbaile. Yuʼun li sba ton ti bu tsvaʼan stsobobbail li Jesuse jaʼ skʼoplal stuk (1 Korintios 3:11; Efesios  2:20). Pe jaʼ laj yichʼ yoxibal yave li Pedroe. Jaʼ la sta mukʼta matanal sventa tsjambe yochebal li Ajvalilal ta vinajel sventa x-ochik li buchʼutik oy ta yoʼontonike.

Ti kʼusi ora la stunes baʼyel yave li Pedroe jaʼ ta Pentekostes ta sjabilal 33 ta jkʼakʼaliltik, sventa chakʼbe yil kʼusi skʼan spas li judaetike xchiʼuk li buchʼutik ochemik xa ta srelijion judaetik yoʼ sta skolelike. Li xchibal yavee jaʼo la stunes kʼalal laj yalbe skʼoplal Ajvalilal yuʼun Dios li jsamariaetik ti oy xa onoʼox xchʼunel yoʼontonike. Vaʼun li yoxibal yavee jaʼo la stunes ta sjabilal 36 ta jkʼakʼaliltik, jaʼo kʼalal laj yichʼik cholbel mantal li jyanlumetik ti muʼyuk yichʼojik sirkunsisione, jech kʼuchaʼal li Kornelio xchiʼuk yantike (Echos 2:37, 38; 8:14-17; 10:44-48).

Kʼalal jaʼo jech yakal chale, chat tajek yoʼontonik yajtakboltak ta skoj ti laj yalbe skʼoplal ti poʼot xa xil svokol xchiʼuk ti poʼot xa xcham ta Jerusalen li Jesuse. Ta skoj ti muʼyuk xaʼibe smelolal Pedro ti chichʼ chaʼkuxesel ta vinajel li Jesuse, parte laj yikʼ batel sventa xi tsots chalbe mantale: «Oyuk slekil avoʼonton ta atojolal, Kajval; ta batsʼi melel mu jechuk chkʼot ta atojolal taje». Pe li Jesuse joypʼij, vaʼun xi laj yalbe li Pedroe: «¡Akʼo aba ta jpat Satanas! Chamakbun kok, yuʼun maʼuk chanop li snopben Diose, jaʼ chanop li snopben krixchanoetike» (Mateo 16:22, 23).

Vaʼun li Jesuse lik yalbe krixchanoetik xchiʼuk yajtakboltak ti mu kʼunuk ti jaʼik yajtsʼaklomtake. Xi laj yale: «Mi oy buchʼu tskʼan chtal ta jtojolale akʼo sten ta yoʼonton xkuxlejal, akʼo xkuch li jtel teʼ sventa vokolile xchiʼuk akʼo stsʼakliun-o batel. Yuʼun li buchʼu tspoj yaʼi xkuxlejale ta me xchʼay yuʼun, yan li buchʼu chchʼay xkuxlejal ta jkoj xchiʼuk ta skoj li lekil aʼyejetike jaʼ me tspoj» (Markos 8:34, 35).

Jaʼ jech, sventa xakʼik ta ilel ti staik-o ti lek x-ilatik yuʼun Jesus li yajchankʼoptake skʼan xakʼ ta ilel ti tsots yoʼontonike xchiʼuk ti muʼyuk chkʼuxubin sba stukike. Xi laj yal li Jesuse: «Li buchʼu chkʼexav ta jtojolal xchiʼuk ta sventa li kʼusi chkal li ta jkʼol kuxlejal ti muʼyuk tukʼ chakʼ sba ta stojolal Dios xchiʼuk ti jpasmulile, li Xnichʼon krixchanoe jaʼ jech ta xkʼexav ta stojolal ek kʼalal mi vul tal xchiʼuk smukʼulal Stot xchiʼuk skotol li xchʼul anjeltake» (Markos 8:38). Ta melel, kʼalal mi vul li Jesuse «jaʼ jech chakʼbe stojol li krixchanoetik ti kʼu yelan stalelalik ta jujuntale» (Mateo 16:27).