Kʼalal echʼ xaʼox kʼuk sjalil ti tsmil ox yaʼiik Jesus li krixchanoetik ta Nasarete, jaʼ xa te bat ta Kapernaum li Jesuse, ti nopol xil Nab Galilea ti «nab ta Jenesaret» sbi xtoke (Lukas 5:1). Jaʼ jech kʼot ta pasel jun albil kʼop yuʼun Isaias ti chal ti chilik xojobal lus li jnaklejetik ta Nab Galilea (Isaías 9:1, 2).

Jaʼ liʼ ta Galilea ti xi chal batel xtok li Jesuse: «Li Ajvalilal ta vinajele nopajem xa tal» (Mateo 4:17). Jaʼ te la sta chanvoʼ yajchankʼoptak. Jaʼ li buchʼutik laj xa onoʼox xchiʼinik ta xanbale, pe kʼalal lokʼik tal xchiʼuk Jesus ta Judeae, bat skʼel li yuni abtelik ta tsak choye (Juan 1:35-42). Pe liʼ une jaʼ xa yorail ti xbat xchiʼinik-o yoʼ xchanubtasatik ta xcholel mantal kʼalal mi bat xaʼox li Jesuse.

Kʼalal yakal chanav batel ta tiʼ nab li Jesuse, jaʼ to chile te oy li Simon Pedro xchiʼuk Andres ti sbankil yitsʼin sbaike xchiʼuk yan xchiʼiltakik ti yakal tsap snutiʼik sventa tsakob choye. Bat muyuk li ta svarko Simone, laj yalbe ti akʼo stikʼ ochel jutuk ta yut nabe. Vaʼun kʼalal nom xaʼox oye, te choti yoʼ xchanubtas ta sventa Ajvalilal yuʼun Dios li epal krixchanoetik ti te stsoboj sbaik ta tiʼ nabe.

Ta mas tsʼakale, xi laj yalbe Pedro li Jesuse: «Tikʼo ochel ta natil nab li avarkoe, vaʼun te xajipik yalel li anutiʼik sventa tsakob choye». Xi la stakʼ li Pedroe: «Jchanubtasvanej, sjunul akʼobal laj kakʼbekutik yipal ta saʼel, pe muʼyuk bu la jtakutik, pe ta skoj ti voʼot chavale ta jip yalel li nutiʼ sventa tsakob choye» (Lukas 5:4, 5).

Vaʼun kʼalal la sjip yalel li snutiʼike, batsʼi ep tajek la staik li choye. Jech, ¡solel lik jatuk li snutiʼike! Jaʼ yuʼun ta anil noʼox la svelkʼobta li xchiʼiltakik ta yan varko yoʼ xtal koltaatikuke. Ta ora noj xchaʼkotal li varkoe, vaʼun ta xa x-och yalel ta nab ta skoj ti noj ta jyalel ta choye. Kʼalal laj yil Pedro taje, la skejan sba ta stojolal li Jesuse, xi laj yale: «Chʼako aba ta jtojolal Kajval, yuʼun jpasmulil vinikun». Vaʼun xi laj yal li Jesuse: «Mu xa xaxiʼ. Yuʼun liʼ ta ora xchiʼuk ta jelavele jaʼ xa chasaʼ kuʼun li kuxul krixchanoetik jech kʼuchaʼal chasaʼ choye» (Lukas 5:8, 10).

Xi laj yalbe Pedro xchiʼuk Andres li Jesuse: «Laʼ tsʼakliikun, vaʼun krixchanoetik xa chatsakik kuʼun jech kʼuchaʼal chatsakik choye» (Mateo 4:19). Te tsakal skʼoplal chaʼvoʼ viniketik ti jtsakchoyetik eke, jaʼ li Santiago xchiʼuk Juan ti jaʼ xnichʼnab li Sebedeoe. Ta sjunul yoʼonton la xchʼunik ek li takel ta ikʼele. Laj yikta li yuni abtelik ta tsak choye, vaʼun jaʼ jech ochik ta baʼyel yajchankʼop Jesus ta tsʼakal ora.