Kʼalal albat xaʼox yuʼun anjel Gabriel ti chil jun yuni kerem li Maria ti Jesus chakʼbe sbi xchiʼuk ti ch-och ta Ajvalil sbatel osile, xi la sjakʼe: «¿Kʼuxi xa noʼox chkʼot ta pasel taje, ti muʼyuk bu yakal ta jchiʼin ta vayel junuk vinike?» (Lukas 1:34).

Xi la stakʼ li Gabriele: «Ta xtal ta atojolal li chʼul espiritue xchiʼuk jaʼ chpixot ta yaxinal sjuʼel li Buchʼu toj toyol oye. Jech oxal, chʼul chichʼ albel skʼoplal xchiʼuk Xnichʼon Dios ch-albat li olol chvokʼe» (Lukas 1:35).

Sventa van xchʼun ta sjunul yoʼonton li Mariae, xi laj yal li Gabriele: «¡Kʼelo avil!, la xchiʼin yol ek li avutsʼ avalal ti Elisabet sbie, akʼo mi oy xa sjabilal, oy xa ta svakibal u xchiʼuk yol, jaʼ li buchʼu mu snaʼ x-alaj chalike; yuʼun muʼyuk kʼusi albil ti mu spas yuʼun li Diose» (Lukas 1:36, 37).

Jamal xvinaj ti ta sjunul yoʼonton la xchʼun li Mariae, yuʼun xi laj yale: «¡Kʼelo avil! ¡Jaʼ smosoun Jeova! Akʼo kʼotuk ta pasel ta jtojolal li kʼusi laj avale» (Lukas 1:38).

Vaʼun kʼalal bat li anjel Gabriele, lik xchapan sba Maria sventa chbat skʼel li Elisabet xchiʼuk smalal ti Sakarias sbie. Te nakalik ta svitstikaltik Judea, nopol xil Jerusalen. Nom to bu chbat li Mariae, yuʼun te van oxib o chanibuk kʼakʼal chanav batel.

Vaʼun kʼot ta sna Sakarias li Mariae. Kʼot skʼopon li Elisabet ti jaʼ li yutsʼ yalale. Vaʼun och chʼul espiritu ta yoʼonton li Elisabete, xi laj yalbee: «¡Voʼot toj ep ataoj bendision ti jaʼ mu sta li yan antsetike xchiʼuk ep bendision staoj ek li olol achiʼuke! ¿Kʼuxi xa noʼox ti jtaoj li matanal liʼe, ti jaʼ chtal ta jtojolal li smeʼ Kajvale? Yuʼun ¡kʼelo avil!, la xijulan sba ta muyubajel li kol jchiʼuk kʼalal kʼot ta jchikin li kʼusi laj aval kʼalal lavule» (Lukas 1:42-44).

Xmuyubaj tajek xi la stoj ta vokol li Mariae: «Ta jmukʼibtasbe skʼoplal Jeova li ta jkuxlejale, batsʼi xkuxet tajek koʼonton ta stojolal li Jkoltavanej Dios kuʼune, yuʼun laj yil ti pekʼel skʼoplal li smosoe. Yuʼun ¡kʼelo avil!, liʼ ta ora xchiʼuk ta jelavele ximuyubaj noʼox chlik yalik jkʼoplal skotol li jaykʼol kuxlejaletike, yuʼun toj mukʼtik kʼusi spasoj ta jtojolal li Buchʼu oy sjuʼele». Manchuk mi lek tajek albat skʼoplal li Mariae, jaʼ laj yakʼ ta ichʼel ta mukʼ li Diose. Xi laj yale: «Chʼul li sbie» xchiʼuk «oy-o xkʼuxul yoʼonton ta stojolal li buchʼutik chiʼtaike, jaʼ ti jaykʼol kuxlejal x-echʼe» (Lukas 1:46-50).

Xi laj yal jun albil kʼop sventa tskʼupil kʼopta yan velta Dios li Mariae: «Toj echʼ xa noʼox tsots kʼusitik spasoj ta skʼob, xchʼakoj li buchʼutik toyol skʼoplal chaʼi sbaik ta skoj li kʼusi oy ta yoʼontonike. Sjipoj lokʼel ta chotlebal sventa ajvalilal li viniketik ti oy yabtelike xchiʼuk stoyojbe skʼoplal li buchʼutik bikʼit chakʼ sbaike; snojesojbe xchʼut li buchʼutik chviʼnaje, yuʼun ep kʼusitik lek yakʼojbe; yan li jkʼulejetike jecheʼ smeyoj skʼob la stak batel. Tal skolta li yajtunel Israel sventa tsvulesbe ta sjol li xkʼuxul oʼontonale, jaʼ jech kʼuchaʼal laj yalbe jmoltotaktik ta voʼnee, li Abraan xchiʼuk li snitilulal ti chkʼuxubinvan sbatel osile» (Lukas 1:51-55).

Te van oxibuk u te oy ta sna Elisabet li Mariae, te la skolta jayibuk xemana ta skoj ti yual xa tajeke. ¡Toj lek tajek ti jmoj tskolta sbaik li chaʼvoʼ antsetik ti ta sjuʼel Dios la xchiʼin yolike!

Kʼuchaʼal chkakʼtik ventae, la skʼupil kʼoptaik Jesus kʼalal mu to chvokʼe. Yuʼun ‹Kajval› xi li Elisabet kʼalal laj yalbe skʼoplal li Jesuse xchiʼuk la «xijulan sba ta muyubajel» li yol xchiʼuk kʼalal te kʼot li Mariae. Pe kʼuchaʼal chkiltik ta mas tsʼakale, mu xa jechuk laj yichʼik kʼupil kʼoptael li Maria xchiʼuk yole.