Te tal jayvoʼ viniketik ti likemik tal ta slokʼeb Kʼakʼale. Jaʼik jkʼelkʼanaletik, jaʼ chalbeik smelolal kʼusi skʼan xal ti kʼu yelan oy li kʼanaletike, vaʼun jaʼ jech chalbeik kʼusi chkʼot ta pasel ta xkuxlejalik li krixchanoetike (Isaías 47:13). Kʼalal te toʼox oy ta snaik ta slokʼeb Kʼakʼale laj yilik tal jpʼej kʼanal, vaʼun ta sienal xa noʼox kilometro xanavik tal sventa xtalik ta Jerusalen, maʼuk ta Belen.

Xi vul sjakʼik li jkʼelkʼanaletike: «¿Bu oy li buchʼu vokʼ ti ch-och ta ajvalil yuʼun judaetike? Yuʼun laj kilbekutik skʼanalil kʼalal te toʼox oyunkutik ta slokʼeb Kʼakʼale, jaʼ yuʼun tal kichʼkutik ta mukʼ» (Mateo 2:1, 2).

Ilin tajek ajvalil Erodes ta Jerusalen kʼalal laj yaʼi taje. Vaʼun la stak ta ikʼel li bankilal paleetik xchiʼuk li jchanubtasvanejetik ta Mantal sventa tsjakʼbe bu chvokʼ li Kristoe. Ta Vivlia la slokʼesik tal li kʼusi la stakʼike, xi laj yalike: «Ta Belen» (Mateo 2:5; Miqueas 5:2). Vaʼun ta mukul la stak ta ikʼel jkʼelkʼanaletik li Erodese, xi laj yalbee: «Batanik, lek me xasaʼik bu oy li uni olole, vaʼun xtal avalbeikun mi la ataike, sventa xbat kichʼ ta mukʼ ek» (Mateo 2:8). Pe jecheʼ tsjut li Erodese, yuʼun li kʼusi oy ta yoʼontone jaʼ ti tsmil yaʼie.

Oy kʼusi labal sba kʼot ta pasel kʼalal lokʼik batel li jkʼelkʼanaletike. Jaʼ jbabe bat yuʼunik li kʼanal ti laj yilik kʼalal te toʼox oyik ta slokʼeb Kʼakʼale. Jamal xvinaj ti mu jechuk kʼuchaʼal yan kʼanaletik li kʼanal taje, yuʼun jaʼ tukʼ takbil tal sventa xbeiltasatik batel li jkʼelkʼanaletike. Vaʼun jaʼ to te pajik ta xanbal ti bu paj li kʼanale, jaʼ te paj ta stukʼil sjol snaik li Jose, Maria xchiʼuk li yuni keremike.

Kʼalal ochik ta yut na li jkʼelkʼanaletike, jaʼ to yilike te oy li uni Jesus xchiʼuk Mariae. Vaʼun la skejan sbaik ta yichʼel ta mukʼ. Jech xtok, laj yakʼbeik smoton, laj yakʼbeik oro, sakil pom xchiʼuk mirra. Ta mas tsʼakal une, kʼalal tsutik xa batel ti bu oy li Erodese, pʼijubtasatik yuʼun Dios ta vaychil ti mu sutik batel tee. Jaʼ yuʼun, la stamik batel yan be kʼalal sut batel ta slumalike.

¿Buchʼu laj yakʼ xanaʼ li kʼanal sventa xbeiltasatik li jkʼelkʼanaletike? Jvules ta joltik ti muʼyuk bu tukʼ x-ikʼatik batel ta Belen yoʼ bu oy li Jesuse. Moʼoj, yuʼun ti bu ikʼatik batel baʼyuke jaʼ ta Jerusalen ti bu la xchiʼinik ta loʼil li ajvalil Erodes ti tskʼan tsmil yaʼi Jesuse. Xuʼ ox van jech spas, pe la smak ta be li Diose, yuʼun laj yalbe jkʼelkʼanaletik ti akʼo mu xbat yalbeik Erodes bu oy li Jesuse. Jamal xvinaj chaʼa, ti jaʼ laj yakʼ kʼanal li Satanase, li yajkontra Diose, yuʼun tskʼan tsmil yaʼi li Jesuse. Jaʼ yuʼun, jaʼ la stunes li kʼanal sventa tspas yaloj li kʼusi oy ta yoʼontone.