Kʼalal jaʼ toʼox tajek akʼbat yichʼ voʼ yuʼun Juan li Jesuse, beiltasat batel yuʼun xchʼul espiritu Dios ta takixokol balumil ta Judea. Yuʼun toj ep kʼusitik skʼan snopbe skʼoplal. ¿Mi xvul ta ajol ti ‹jam vinajel› kʼalal laj yichʼ voʼ li Jesuse? (Mateo 3:16.) Jaʼ jech, vul ta sjol li kʼusitik la xchan xchiʼuk li kʼusitik la spas ta vinajele. Ta melel, ¡toj ep kʼusitik skʼan snopbe skʼoplal!

Ay 40 kʼakʼal xchiʼuk 40 akʼobal li ta takixokol balumile, pe muʼyuk kʼusi stakʼ slajes ti bu oye. Vaʼun kʼalal chviʼnaj xa tajek li Jesuse, te nopaj tal li Satanas ta stojolal sventa ch-akʼat ta prevae, xi albate: «Mi jaʼ xnichʼonot Diose, albo ti akʼo xkʼataj ta pan li tonetik liʼe» (Mateo 4:3). Pe snaʼoj lek Jesus ti mu lekuk ti jech stunes sjuʼel sventa xnoj xchʼute, jaʼ yuʼun la stsal li akʼel ta preva taje.

Pe muʼyuk xlaj yoʼonton ta akʼvanej ta preva li Satanase. Yuʼun oy to kʼusi la spas. Laj yikʼ batel Jesus ta jol templo sventa sjip sba yalel yuʼun. Pe mi jsetʼuk oy ta yoʼonton tspas Jesus li kʼusi toj labal xa noʼox sba taje. Vaʼun lik yalbe skʼoplal kʼusi chal Vivlia li Jesuse, sventa chalbe smelolal ti mu stakʼ jech xkakʼtik ta preva li Diose.

Vaʼun lik yakʼ ta preva ta yoxibal velta Jesus li Diabloe, yuʼun laj yakʼbe yil «skotol li mukʼtik lumetik ta balumile xchiʼuk li yutsilalike» xchiʼuk xi laj yalbee: «Skotol li kʼusitik liʼe chkakʼbot mi chakejan aba sventa chavichʼun ta mukʼ junuk veltae». Pe xi laj yal ta sjunul yoʼonton li Jesuse: «¡Batan Satanas!» (Mateo 4:8-10). Kʼuchaʼal chkiltike tsal yuʼun akʼel ta preva li Jesuse, muʼyuk la spas li kʼusi chopole. ¿Kʼu yuʼun? Yuʼun snaʼoj lek ti jaʼ noʼox skʼan spasbe xchʼul abtel li Jeovae. Ta melel, lokʼ ta yoʼonton ti tukʼ chakʼ sba ta stojolal Diose.

Oy kʼusi chakʼ jchantik ti kʼu yelan akʼat ta prevae xchiʼuk ti kʼu yelan la stsale. Ta skoj ti jech kʼot ta pasel ta melel taje, chakʼ ta ilel ti yuʼun kuxul ta melel li Satanase manchuk mi mu xkiltik, mu jaʼuk noʼox svinajeb choplejal kʼuchaʼal chal jlom krixchanoetike. Jech xtok, chakʼ kiltik ti jaʼ yuʼun Satanas skotol li ajvalilaletik oy ta balumile, jaʼ tspas ta mantal skotol. Ti maʼukuk yuʼune, ¿kʼuxi xa noʼox laj yal chakʼ sventa chakʼ-o ta preva Jesus ti jechuke?

Jech xtok, laj yalbe Jesus ti chakʼbe skotol li mukʼtik lumetik ta balumil mi ch-ichʼat ta mukʼ junuk velta li Diabloe. Xuʼ jaʼ jechtik xakʼutik ta preva ek li Satanase, xuʼ van xakʼ kiltik li kʼusitik chloʼlaj-o koʼontontik sventa jsaʼ jkʼulejaltik ta balumile, ti tsotsuk xa jkʼoplaltike o ti tsotsuk xa kabteltike. Toj tsots me skʼoplal ti jchanbetik stalelal li Jesuse, ti tukʼuk xkakʼ jbatik ta stojolal Dios manchuk mi ep ta tos jnuptantik li akʼel ta prevae. Jnaʼojtik ti muʼyuk ta jech noʼox laj yikta Jesus li Diabloe, yuʼun «la smalabe yan yorail» sventa chakʼ ta preva yan velta (Lukas 4:13). Jaʼ me jech tsaʼ kʼusi ora xuʼ skʼel koʼontontik ek li Satanase, jaʼ yuʼun skʼan vikʼiluk lek jsatik skotol ora.