Kʼalal ay xaʼox 40 kʼakʼal ta takixokol balumil li Jesuse xchiʼuk ti mu to tsut batel ta Galileae, bat skʼel li Juan J-akʼ-ichʼvoʼe. Kʼalal yantik xnopaj batel li Jesuse, xi albatik yuʼun Juan li buchʼutik te oyike: «¡Kʼelo avil, li Xchʼiom Chij Dios ti chchʼay mulil ta balumile! Liʼe jaʼ li buchʼu xi laj kalbe skʼoplale: ‹Oy jun vinik ti te xtal ta jpat ti jaʼ jbabe kuʼune, yuʼun oy xa onoʼox kʼalal muʼyukun toʼoxe›» (Juan 1:29, 30). Akʼo mi jaʼ bankilal jutuk li Juane, jamal xvinaj ti snaʼoj lek ti te xa onoʼox kuxul ta vinajel li Jesuse.

Oy to ta jayibuk xemanae mu toʼox snaʼ lek Juan mi jaʼ Mesias ta melel li Jesus kʼalal tal yichʼ voʼe. Xi jamal laj yal li Juane: «Mi jaʼuk toʼox xkojtikin ek, pe ti kʼu yuʼun tal kakʼ ichʼvoʼ ta voʼe jaʼ sventa chichʼ ojtikinel li ta Israele» (Juan 1:31).

Lik xchapbe yan krixchanoetik kʼusi kʼot ta pasel kʼalal laj yakʼbe yichʼ voʼ Jesus li Juane: «Laj kil yal tal ta vinajel kʼuchaʼal jkot paloma li xchʼul espiritu Diose xchiʼuk te kom-o ta stojolal. Mi jaʼuk toʼox xkojtikin ek, pe xi laj yalbun li Buchʼu la stakun tal sventa chkakʼ ichʼvoʼ ta voʼe: ‹Li buchʼu chyal tal chʼul espiritu ta stojolal chavile xchiʼuk ti te chkom-o ta stojolale, jaʼ li buchʼu chakʼ ichʼvoʼ ta chʼul espiritue›. Kiloj maʼ voʼone xchiʼuk laj kal ti jaʼ li Xnichʼon Diose» (Juan 1:32-34).

Ta yokʼomal kʼalal jaʼo te oy xchiʼuk chaʼvoʼ yajchankʼoptak li Juan J-akʼ-ichʼvoʼe, jaʼo te nopaj tal yan velta li Jesuse. Xi laj yal li Juane: «¡Kʼelo avilik li Xchʼiom Chij Diose!» (Juan 1:36). Vaʼun kʼalal laj yaʼi li chaʼvoʼ yajchankʼoptak taje, jaʼ xa lik stsʼakliik batel li Jesuse. June Andres sbi. Li june Juan sbi, jaʼ ti buchʼu la stsʼibabe skʼoplal li kʼusi kʼot ta pasel liʼe. Li Juan chkalbetik skʼoplal taje jaʼ van li sprimo Jesuse, ti Salome sbi li smeʼe. Taje jaʼ li yajnil Sebedeoe, ti jaʼ van smuk xvix sbaik xchiʼuk li Mariae.

Kʼalal la skʼel spat li Jesuse, jaʼ to chile te xtalik li Andres xchiʼuk Juane, xi la sjakʼbee: «¿Kʼusi chasaʼik?».

Xi la stakʼbeike: «Rabi [...,] ¿bu chavay?».

Vaʼun xi albatike: «Laʼik, laʼ kʼelik» (Juan 1:37-39).

Poʼot xaʼox van chanib ora ta mal kʼakʼal ti vaʼ yelan kʼot ta pasele, jaʼ yuʼun te mal yuʼunik kʼakʼal xchiʼuk Jesus li Andres xchiʼuk Juane. Xmuyubaj tajek li Andrese, jaʼ yuʼun xi laj yalbe li sbankil ti Simon sbi kʼalal te la stae, ti Pedro sbi xtoke: «Laj xa jtakutik li Mesiase» (Juan 1:41). Vaʼun li Andrese laj yikʼ batel Pedro ti bu oy li Jesuse. Ta mas tsʼakal jutuk une, li Juane te la sta li Santiago ti sbankil yitsʼin sbaik eke, vaʼun laj yikʼ batel ta stojolal Jesus ek. Pe kʼuchaʼal chkiltike muʼyuk la stsʼibabe skʼoplal Juan li kʼusi kʼot ta pasel ta xkuxlejal stuke.

Vaʼun ta yokʼomale, li Jesuse te la sta Felipe ti likem ta Betsaidae, ti nopol xil snorteal tiʼ  Nab Galileae xchiʼuk ti jaʼ te slumalik ek li Andres xchiʼuk Pedroe. Xi albat yuʼun Jesus li Felipee: «Laʼ tsʼakliun» (Juan 1:43).

Vaʼun li Felipee te la sta li Natanael ti Bartolome yan sbie, xi laj yalbee: «Laj xa jtakutik li buchʼu laj yichʼ tsʼibabel skʼoplal yuʼun Moises li ta Mantale xchiʼuk li kʼusitik yaloj J-alkʼopetike, jaʼ li Jesuse, jaʼ li xnichʼon Jose ti likem ta Nasarete». Xi laj yal Natanael ta skoj ti mu xchʼun leke: «¿Mi oy van kʼusi lek chlik tal li ta Nasarete?».

Xmuyubaj xi laj yal li Felipee: «Laʼ kʼelo avil». Vaʼun kʼalal laj yil ti te xa xtal Natanael li Jesuse, xi laj yale: «Kʼelo avil, jun j-israel vinik ti mu snaʼ xloʼlavan ta melele».

Xi la sjakʼ li Natanaele: «¿Kʼuxi ti xavojtikinune?».

Xi la stakʼ li Jesuse: «Laj kilot kʼalal muʼyuk toʼox bu yikʼojot tal li Felipee, jaʼo kʼalal te oyot ta yolon teʼel igoe».

Toj labal sba laj yaʼi li Natanaele, xi laj yale: «Rabi, voʼot Xnichʼonot li Diose, voʼot li Ajvalilot ta Israele».

Xi la sjakʼ li Jesuse: «¿Mi jaʼ la achʼun-o ta skoj ti laj kalbot ti laj kilot ta yolon teʼel igoe? Oy to kʼusitik mas mukʼtik chavil». Vaʼun xi to laj yalbe ta melele: «Chkalboxuk avaʼiik ta batsʼi melel: chavilik ti jamal li vinajele xchiʼuk chavilik ti xyal xmuy li yaj-anjeltak Dios ti bu oy li Xnichʼon krixchanoe» (Juan 1:45-51).

Mu ta sjaliluk une lokʼik batel ta stenlejaltik Jordan xchiʼuk li achʼ yajchankʼoptak Jesuse, te batik ta Galilea.