Oy xa van ta vakib u chchol mantal li Juan J-akʼ-ichʼvoʼe, vaʼun yichʼoj xa 30 jabil li Jesuse, te tal ta stojolal Juan ta Ukʼum Jordan. ¿Kʼu yuʼun? Maʼuk sventa tal svulaʼan li yutsʼ yalale. Jech xtok, maʼuk noʼox sventa chtal skʼel kʼu yelan xbat yabtel li Juane. Moʼoj, yuʼun tal skʼan ti akʼo x-akʼbat yichʼ voʼe.

Xkaʼibetik lek smelolal chaʼa ti kʼu yuʼun xi laj yal li Juane: «Voʼon chavakʼbun kichʼ voʼ ti jechuke, ¿mi jech smelolal ti voʼot chatal ta jtojolale?» (Mateo 3:14). Yuʼun snaʼoj lek Juan ti muʼyuk yan Xnichʼon Jeova kʼuchaʼal li Jesuse. Jvules ta joltik ti oy kʼusi kʼot ta pasel kʼalal ay svulaʼan Elisabet li Maria kʼalal jaʼo xchiʼuk li Jesuse. ¿Kʼusi kʼot ta pasel? Jaʼ ti la xijulan sba ta muyubajel kʼalal chiʼukbil toʼox li Juan kʼalal jaʼo te kʼot ta vulaʼal li Mariae. Ta melel, chapbat onoʼox yuʼun smeʼ kʼusi kʼot ta pasel li Juane. Jech xtok, laj onoʼox van yaʼibe skʼoplal ti ay yal jun anjel ti chvokʼ li Jesuse xchiʼuk laj van yaʼibe skʼoplal xtok li anjeletik ti laj yakʼ sba ta ilel ta stojolal li jchabichijetik kʼalal vokʼ li Jesuse.

Snaʼoj lek Juan ti jaʼ sventa chakʼ ta ilel krixchanoetik ti sutesoj yoʼontonik ta sventa smulik kʼalal chichʼik voʼe. Pe muʼyuk smul maʼ li Jesuse. Manchuk mi laj yal Juan ti moʼoje, xi laj yal li Jesuse: «Mu xapajesun, yuʼun jaʼ jech skʼan jpastik lek skotol li kʼusitik tukʼe» (Mateo 3:15).

¿Kʼu yuʼun skʼan xichʼ voʼ li Jesuse? Veno, maʼuk sventa chakʼ ta ilel ti sutesoj xa yoʼonton ta sventa smule, yuʼun mu snaʼ saʼ smul. Ti kʼusi laj yakʼ ta ilel kʼalal laj yichʼ voʼe jaʼ ti chakʼ xkuxlejal ta stojolal Stot sventa tspasbe li kʼusi tskʼan yoʼontone (Evreos 10:5-7). Akʼo mi ch-abtej ta karpinteroal, kʼot xa yorail sventa tslikes spasel li abtelal akʼbil yuʼun Stot ta vinajel ti jaʼ sventa takat tal ta Balumile. ¿Mi oy van kʼusi labal sba smalaoj chkʼot ta pasel Juan xanaʼ kʼalal chakʼbe yichʼ voʼ li Jesuse?

Xi laj yal Juan ta tsʼakale: «Xi laj yalbun li Buchʼu la stakun tal sventa chkakʼ ichʼvoʼ ta voʼe: ‹Li buchʼu chyal tal chʼul espiritu ta stojolal chavile xchiʼuk ti te chkom-o ta stojolale, jaʼ li buchʼu chakʼ ichʼvoʼ ta chʼul espiritue›» (Juan 1:33). Jaʼ  jech, smalaoj xa tskʼelbe xchʼul espiritu Dios kʼalal oy buchʼu chakʼbe yichʼ voʼ li Juane. Jaʼ yuʼun kʼalal lokʼ ta voʼ li Jesuse, mu labaluk sba laj yil Juan ti «yal tal xchʼul espiritu Dios [ta stojolal Jesus] ti xkoʼolaj kʼuchaʼal palomae» (Mateo 3:16).

Pe oy to kʼusi kʼot ta pasel kʼalal laj yichʼ voʼ li Jesuse. ‹Jam li vinajel› ti bu oye. ¿Kʼusi smelolal taje? Jaʼ ti kʼalal laj yichʼ voʼe jaʼo van vul ta sjol ta melel ti kʼu toʼox yelan xkuxlejal kʼalal mu toʼox chtal ta Balumile. Vaʼun vul xa ta sjol ti jaʼ toʼox jun kuxlejal ti mu xvinaj ta kʼelele, ti jaʼ Stot li Jeovae xchiʼuk vul ta sjol li kʼusitik melel akʼbat xchan yuʼun Dios ta vinajel kʼalal mu toʼox chtal ta Balumile.

Maʼuk noʼox taje, yuʼun oy buchʼu kʼopoj tal ta vinajel kʼalal laj yichʼ voʼe, xi laj yale: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj yuʼune» (Mateo 3:17). ¿Buchʼu ti kʼopoje? Maʼuk li Jesuse, yuʼun te xchiʼuk li Juane. Jaʼ kʼopoj tal li Diose. Jamal xvinaj chaʼa ti jaʼ Xnichʼon Dios li Jesuse. Maʼuk Dios li stuke.

Kʼuchaʼal chkiltike, kʼot ta Xnichʼon Dios liʼ ta Balumil li Jesus jech kʼuchaʼal echʼ li baʼyel vinik ti Adan sbie. Kʼalal laj xaʼox yal kʼu yelan laj yichʼ voʼ Jesus li Lukase, xi la stsʼibae: «Kʼalal la slikes yabtel li Jesuse yichʼoj van 30 jabil, chalike jaʼ la xnichʼon Jose, xnichʼon Eli, [...] xnichʼon David, [...] xnichʼon Abraan, [...] xnichʼon Noe, xnichʼon Adan, xnichʼon Dios» (Lukas 3:23-38).

Jaʼ jech kʼuchaʼal kʼot ta «xnichʼon Dios» ta balumil li Adane, jaʼ jech kʼot li Jesus eke. Kʼalal laj yichʼ voʼ li Jesuse, jaʼ jech kʼot ta Xnichʼon Dios ti tʼujbil ta chʼul espiritue. Jaʼ yuʼun li Jesuse xuʼ xakʼ ta chanel li kʼusi melel ta sventa li Diose xchiʼuk ti chakʼ ta ilel kʼuxi ta tael li kuxlejale. Te une jaʼ xa lik spas Jesus li kʼusi chakʼ-o xkuxlejal ta tsʼakal ta sventa li krixchanoetike.