Kʼalal jaʼ toʼox tajek laj yichʼ voʼ li Jesuse, tal jun yajkontra ti oy tajek ta yoʼonton chjipat ta lum yoʼ to mu slikes li yabtel ta cholmantale. Jaʼ jech, ep ta velta laj yakʼ persa Diablo sventa tsmak ta be li Jesuse. Ta mas jelavel une xi laj yalbe skʼoplal Diablo li Jesuse: «Chtal xa li ajvalil ta balumile, akʼo mi jech, muʼyuk bu sventainojun» (Juan 14:30).

Laj xa onoʼox yil jtakbol Juan kʼusi tsnuptan «li mukʼta dragone, li voʼneal chone, ti Diablo xchiʼuk Satanas akʼbil sbie». Chichʼ jipel yalel tal li yajkontra krixchanoetik ti muʼyuk xa noʼox xkʼuxul yoʼontone, ti «oy tajek skʼakʼal yoʼonton ta skoj ti snaʼoj ti toj komkom xa li yoraile» (Apokalipsis 12:9, 12). Li yajtsʼaklomutik Kristoe jnaʼojtik lek ti jaʼ avi li ‹komkom ora› taje. Jech xtok, poʼot xa tajek xichʼ jipel ochel ta xab «li mukʼta dragone, li voʼneal chone», vaʼun mu xa kʼusi stakʼ spas jmil jabil kʼalal jaʼo yakal ch-ajvalilaj Jesus li ta Ajvalilal yuʼun Diose (Apokalipsis 20:1, 2).

¿Kʼusi chkʼot ta pasel ta Balumil li ta jmil jabile? ¿Buchʼutik liʼ chnakiike, xchiʼuk kʼu yelan xkuxlejalik? Jaʼ la stakʼ Jesus maʼ taje. Kʼalal laj yal jun lokʼolkʼop ta sventa li chijetik xchiʼuk tentsunetike, te laj yal kʼusi tstaik li tukʼil krixchanoetik ti xkoʼolaj kʼuchaʼal chijetike, ti chchʼunbeik smantal li yermanotak Jesuse xchiʼuk ti lek kʼusitik tspasbeike. Pe jech xtok un, laj yal kʼusi tstaik li buchʼutik xkoʼolaj kʼuchaʼal tentsunetike, ti mu xchʼunik mantale. Xi laj yale: «[Li tentsunetik] taje chtuchʼbat skʼoplalik sbatel osil, yan li buchʼutik tukʼike [li chijetike] tsta xkuxlejalik sbatel osil» (Mateo 25:46).

Ti kʼusi tskoltautik ta yaʼibel smelolale jaʼ li kʼusi laj yalbe j-elekʼ ti te jokʼol ta jtel teʼ ta xokon li Jesuse. Li kʼusi laj yal chakʼbee mu xkoʼolaj xchiʼuk li kʼusi laj yal chakʼbe li yajtakboltak ti  tukʼ yoʼontonike, ti ch-ajvalilajik xchiʼuk li ta Ajvalilal ta vinajele. Moʼoj, yuʼun xi laj yalbe li j-elekʼ ti xa sutesoj yoʼontone: «Ta melel chkalbot avaʼi li avie: te chachiʼinun ta Paraiso» (Lukas 23:43). Jech oxal chaʼa, ta Paraiso smalaoj chkuxi li vinik taje, ta jun kʼupil sba nichimaltik. Jaʼ yuʼun, li buchʼutik «tsta xkuxlejalik sbatel osil» xchiʼuk ti jechik kʼuchaʼal li uni chije ta Paraiso chnakiik ek.

Xi laj yalbe skʼoplal jtakbol Juan ek ti kʼu yelan li balumil kʼalal mi pasem xaʼox ta Paraisoe: «Te oy ta stojolal krixchanoetik li skarpana Diose, vaʼun te chchiʼinatik ta naklej, jaʼ chkʼotik ta steklumal. Jech oxal te chchiʼinatik ta naklej yuʼun li Diose. Tskusbat skotol yaʼlel satik yuʼun li Diose, muʼyuk xa lajelal, muʼyuk xa at-oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux ta aʼiel. Jelav xa skʼoplal skotol li kʼusitik oy toʼoxe» (Apokalipsis 21:3, 4).

Sventa xkuxi ta Paraiso li j-elekʼe skʼan xichʼ chaʼkuxesel. Pe maʼuk noʼox me stuk un. Yuʼun xi jamal laj yal li Jesuse: «Chkʼot yorail ti skotol li buchʼutik oy ta smukinalike chaʼibeik yechʼomal ye, vaʼun chlokʼik tal, chchaʼkuxiik sventa kuxlejal li buchʼutik lek kʼusitik la spasike xchiʼuk chchaʼkuxiik sventa chapanel li buchʼutik toj chopol kʼusitik la spasike» (Juan 5:28, 29).

Pe ¿kʼusi tstaik li tukʼil jtakboletik xchiʼuk li buchʼutik chbatik ta vinajel xchiʼuk Jesus ti mu masuk epike? Xi chal li Vivliae: «Chkʼotik ta yajpaletak Dios xchiʼuk Kristo xchiʼuk jmoj ch-ajvalilajik jmil jabil» (Apokalipsis 20:6). Li buchʼutik ch-ajvalilajik xchiʼuk Kristoe jaʼik viniketik xchiʼuk antsetik ti nakiik ta balumile. Jaʼ yuʼun kʼalal ch-ajvalilajik xaʼox ta vinajele chkʼuxubaj ta yoʼontonik xchiʼuk chaʼibeik smelolal kʼu yelan chaʼi sba li krixchanoetike (Apokalipsis 5:10).

Li krixchanoetike tstabeik sbalil ti laj yakʼ ta matanal xkuxlejal li Jesuse, ti jaʼ chkoltaatik lokʼel li ta mulil xkuchojike. Li Jesus xchiʼuk xchiʼiltak ta ajvalile jaʼ chkoltavanik sventa xtukʼib li krixchanoetike. Jaʼ jech, li krixchanoetike ta me skʼupinik li kuxlejal laj yalbe Adan xchiʼuk Eva ti akʼo x-epajik xchiʼuk snojesik li balumile. Vaʼun ti chijcham ta skoj smul li Adane, ¡chlaj skʼoplal!

Jaʼ jech chkʼot ta pasel yuʼun Jesus skotol li kʼusi kʼanbat yuʼun Jeovae. Vaʼun mi laj xaʼox li Ajvalilal ta Jmil Jabil yuʼun li Jesuse, chakʼbe ta skʼob Stot li Ajvalilale xchiʼuk li tukʼil krixchanoetike. Xi laj yal Pablo ta sventa ti labal xa noʼox sba kʼu yelan bikʼit yakʼoj sba li Jesuse: «Kʼalal mi akʼbat xaʼox ta yok skʼob skotol li kʼusitike, li Nichʼonil eke chakʼ sba ta ventainel ta stojolal li Buchʼu akʼbat ta yok skʼob skotol li kʼusitike, sventa stuk xa noʼox chkʼot ta Ajvalil ta skotol kʼusitik li Diose» (1 Korintios 15:28).

Ta melel, toj tsots me skʼoplal li kʼusi tspas Jesus sventa xkʼot ta pasel li kʼusitik yaloj tspas Dios ti toj echʼ xa noʼox lekike. Vaʼun kʼalal kʼunkʼun chkʼot pasel ta sbatel osil li kʼusitik tskʼan Diose, jaʼ me jech-o li Jesus kʼuchaʼal xi yaloje: «Voʼon li beune, voʼon li melelune xchiʼuk voʼon li kuxlejalune» (Juan 14:6).