Laj xa yoʼonton ta chanubtasvanej ta Vits Olivatik li Jesuse, yuʼun laj xa stakʼ li kʼusi la sjakʼ chanvoʼ yajtakboltak ta sventa ti kʼusi senyail kʼalal liʼ xa oye xchiʼuk ti kʼalal poʼot xa xlaj skotol li kʼusitik oy ta balumile.

¡Toj echʼ xa noʼox ep kʼusi la spasik li ta 11 yuʼun nisane! Yikʼaluk jaʼo xa tsutik echʼel ta Betania ta ikʼ osil kʼalal xi laj yalbe li yajtakboltake: «Li voʼoxuke anaʼojik ti chib xa noʼox kʼakʼal skʼan li skʼakʼalil kʼin Koltaele, vaʼun li Xnichʼon krixchanoe ta xichʼ akʼel ta kʼabal sventa chichʼ milel ta jtel teʼ» (Mateo 26:2).

Xaval yaʼele jun to yoʼonton echʼ yuʼun xchiʼuk yajtakboltak ta yokʼomal li Jesuse, jaʼ xkaltik, li ta mierkolese. Ta martes ti la stsak ta utel li jnitvanejetik ta relijion yuʼun judaetike xchiʼuk ti laj yalbe ta jamal li smulike. Jaʼ yuʼun te satik sventa tskʼel kʼuxi xuʼ smilik. Jech oxal muʼyuk bu xakʼ sba ta ilel ta stojolal krixchanoetik ta 12 yuʼun nisan li Jesuse. Vaʼun jaʼ jech jun yoʼonton chetʼes xchiʼuk yajtakboltak li kʼin Koltael ta yokʼomal kʼalal chʼayem xaʼox batel li Kʼakʼale, ti jaʼo xa chlik li skʼakʼalil 14 yuʼun nisane.

Pe li bankilal paleetik xchiʼuk li moletik ta jteklume muʼyuk bu jun yoʼontonik kʼalal jutuk xa skʼan li kʼin Koltaele. Jech oxal la stsob sbaik ta yamakʼ li mero bankilal pale ti Kaifas sbie. ¿Kʼu yuʼun? Yuʼun ch-ilinik tajek ta skoj ti jamal albat smulik yuʼun Jesuse. Vaʼun «ta mukul la skomon nopik kʼuxi tstsakik xchiʼuk tsmilik». ¿Kʼuxi van tstsakik xchiʼuk kʼusi van ora? Xi laj yalike: «Mu me jpastik ta yorail kʼin sventa mu xlik kʼop li ta jteklume» (Mateo 26:4, 5). Pe chiʼik tajek, yuʼun ep krixchanoetik ti skʼanojik li Jesuse.

Oy buchʼu te kʼot kʼalal yakal tsnop skʼopike. Labal to laj yaʼiik, yuʼun jaʼ te salet kʼotel li Judas  Iskariote ti jaʼ jun yajtakbol Jesuse. ¡Jaʼ tikʼbat ta yoʼonton yuʼun Satanas ti akʼo xakʼ ta kʼabal li Yajchanubtasvaneje! Xi kʼot sjakʼ li Judase: «¿Kʼusi chavakʼbeikun mi laj kakʼ ta akʼobike?» (Mateo 26:15). Toj lek laj yaʼiik, jaʼ yuʼun «laj yalik ti chakʼbeik plata takʼine» (Lukas 22:5). ¿Kʼu yepal? Kʼot ta nopel yuʼunik ti chakʼbeik 30 ta sep plata takʼine. Labal sba ta aʼiel, pe jaʼ jech yepal sbalil chilik li jun mosoile (Éxodo 21:32). Jaʼ jech laj yakʼik ta ilel jnitvanejetik ta relijion ti batsʼi chʼabal sbalil chilik li Jesuse. Vaʼun li Judase «lik saʼilan kʼuxi xuʼ xakʼ ta kʼabal kʼalal jaʼo chʼabal krixchanoetike» (Lukas 22:6).

Jaʼo chlik skʼakʼalil 13 yuʼun nisan kʼalal chʼayem xaʼox batel Kʼakʼal ta skʼakʼalil mierkolese. Svakibal xa akʼobal ti te chvay ta Betania li Jesuse, pe slajeb xa me velta un. Jaʼ xa ta yokʼomal chichʼ tsutsesel ta xchapanel li kʼusitik chtun ta sventa li kʼin Koltaele. Skʼan saʼel jkotuk uni chij sventa xichʼ tuchʼbel snukʼ xchiʼuk ti xichʼ voel kʼalal mi lik xaʼox li 14 yuʼun nisane. ¿Bu van chbat veʼikuk, xchiʼuk buchʼu van tsmeltsan? Muʼyuk bu xchapet xa laj yalbe skʼoplal li Jesuse, jaʼ yuʼun mu snaʼ kʼuxi chakʼ ta skʼob bankilal paleetik Jesus li Judas Iskariotee.

Yikʼaluk van jaʼ xa jueves ti echʼem xa jutuk ta oʼlol kʼakʼale, vaʼun li Jesuse xi laj yalbe Pedro xchiʼuk Juan kʼalal te oyik ta Betaniae: «Batanik, bat chapanik li veʼlil sventa kʼin Koltael yoʼ jlajestike». Xi la stakʼike: «¿Bu chakʼan chbat jchapankutik?». Xi la xchapbe smelolal li Jesuse: «¡Kʼelo avilik!, kʼalal mi la-ochik ta jteklume te chanup abaik ta be xchiʼuk jun vinik ti xkuchoj batel jpʼej kʼib yaʼale. Tsʼakliik batel, jaʼ to te xapajik ti bu ch-och ta jpʼejuk nae. Xi xavalbeik li yajvalnae: ‹Xi chalbot li Jchanubtasvaneje: «¿Bu oy li kuarto sventa jvulaʼaletik yoʼ te jlajes xchiʼuk kajchankʼoptak li veʼlil sventa kʼin Koltaele?»›. Vaʼun li vinik taje chakʼ avilik jkʼol mukʼta kuarto ta akʼol ti chapal xa leke. Jaʼ te xameltsanik» (Lukas 22:8-12).

Jnaʼojtik lek ti jaʼ jun yajchankʼop Jesus li yajval nae. Yikʼaluk van yalojbe xa onoʼox Jesus ti chakʼbe akʼo stunes li sna ta sventa taje. Kʼalal kʼot ta Jerusalen li chaʼvoʼ jtakboletike, jaʼ jech tajek la staik kʼuchaʼal albatike. Jech oxal jaʼ la sbainik smeltsanel li uni chije xchiʼuk ti xchapanik skotol li kʼusitik chtun ta sventa li kʼin Koltael ti chetʼes Jesus xchiʼuk li lajchaʼvoʼ yajtakboltake.