Kʼalal chaʼkuxiem xaʼox li Jesuse, laj yalbe li buluchib yajtakboltak ti te tsta sbaik ta vits Galileae. Te oy yantik jchankʼopetik ek, te van voʼobuk sien, ti jaʼik junantik ti mu toʼox xchʼunike (Mateo 28:17; 1 Korintios 15:6). Pe li kʼusi te chal Jesuse jaʼ chkoltaatik sventa xchʼunik ti yuʼun kuxul ta melele.

Laj yal Jesus ti akʼbil sventain yuʼun Dios skotol li kʼusitik ta vinajel xchiʼuk ta sba balumile. Xi laj yale: «Jaʼ yuʼun chaʼa, batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ ta sbi Totil, Nichʼonil xchiʼuk chʼul espiritu, chanubtasik ta xchʼunel skotol li kʼusitik laj kalboxuke» (Mateo 28:18-20). Jaʼ jech, maʼuk noʼox ti kuxul li Jesuse, yuʼun oy ta yoʼonton xtok ti akʼo xichʼ cholel li lekil aʼyejetike.

Skotol li yajtsʼaklomtak Jesuse, viniketik, antsetik xchiʼuk ololetik, skʼan xbat spasik ta yajchankʼop Jesus li krixchanoetike. Akʼo mi tskʼan tspajesik cholmantal xchiʼuk chanubtasel chakʼ Jesus li jkontrainvanejetike, xi albatik yuʼun Jesus li jchankʼopetike: «Akʼbil jventain skotol li kʼusitik ta vinajel xchiʼuk ta sba balumile». ¿Kʼu yelan skʼan xaʼibeik smelolal taje? Xi albatike: «¡Kʼelo avilik!, te ta jchiʼinoxuk-o skotol kʼakʼal jaʼ to kʼalal poʼot xa xlaj skotol li kʼusitik oy ta balumile». Muʼyuk bu xal Jesus ti xuʼ yuʼun ta spasel skʼelobiltak juʼelal skotol li buchʼutik chchol mantale. Akʼo mi jech, jaʼ chkoltaatik yuʼun li chʼul espiritue.

Ti kʼu sjalil laj yakʼ sba ta ilel ti chaʼkuxiem xa li Jesuse jaʼ 40 kʼakʼal ta skotol. Ep ta velta laj yichʼ sbekʼtal sventa «[chakʼ] sba ta ilel ta stojolalik, ep sprevailtak laj yakʼ ta ilel ti kuxule», la xchanubtas yajchankʼoptak ta sventa «li Ajvalilal yuʼun Diose» (Echos 1:3; 1 Korintios 15:7).

Kʼalal te to oyik ta Galilea li jtakboletike, albatik yuʼun Jesus ti akʼo sutik batel ta Jerusalene. Vaʼun xi albatik kʼalal te xa tsobolik ta Jerusalene: «Mu me xalokʼik batel li ta Jerusalene, jaʼ lek malaik chavichʼik li kʼusi yaloj onoʼox Totile, jaʼ li kʼusi laj avaʼiik laj kale; yuʼun li Juane chaʼa, laj yakʼ ichʼvoʼ, yan li voʼoxuke poʼot xa chavichʼik voʼ ta chʼul espiritu» (Echos 1:4, 5).

Ta mas tsʼakale, la stsob sba yan velta xchiʼuk yajtakboltak li Jesuse. Laj yikʼ batel «kʼalal ta Betania», ti te xkom ta slokʼeb Kʼakʼal ta Vits Olivatike (Lukas 24:50). Akʼo mi ep xa ta velta laj yal Jesus ti chbate, yokel-o tsnopik ti liʼ ch-ajvalilaj ta balumile (Lukas 22:16, 18, 30; Juan 14:2, 3).

Xi la sjakʼbeik Jesus li jtakboletike: «Kajval, ¿mi yuʼun yakal xa chchaʼta yav avuʼun li ajvalilal ta Israel avie?». Muʼyuk kʼusi mas laj yal li Jesuse, jaʼ noʼox xi la stakʼe: «Jaʼ noʼox li Totil te oy ta vinajel ti xuʼ xal kʼusi ora chkʼot ta pasel li kʼusitike, li voʼoxuke mu persauk xanabeik li yorail taje». Vaʼun sventa svulesbe ta sjol li abtelal skʼan spasike, xi to laj yale: «Chavichʼ atsatsalik kʼalal mi vul ta atojolalik li chʼul espiritue, vaʼun chavalik batel jkʼoplal ta Jerusalen, ta sjunul Judea, ta Samaria xchiʼuk kʼalal to ta namal balumil» (Echos 1:6-8).

Te oyik ta Vits Olivatik xchiʼuk Jesus li jtakboletik kʼalal lik muyuk batel ta vinajel li Jesuse. Ta anil noʼox mak batel ta tok. Jaʼ jech, kʼalal chaʼkuxiem xaʼoxe, oy sbekʼtal xchiʼuk sbakil laj yakʼ sba ta ilel. Pe li avie muʼyuk xa sbekʼtal xchiʼuk sbakil, yuʼun xkoʼolaj kʼuchaʼal jun kuxlejal ti mu xvinaj ta kʼelel muy batel ta vinajele (1 Korintios 15:44, 50; 1 Pedro 3:18). Kʼalal te skʼelojik muyel li tukʼil jtakboletike, te «kʼot chaʼvoʼ viniketik ta xokonik ti sak skʼuʼ spokʼ slapojike». Jaʼik anjeletik ti yichʼoj sbekʼtalike, xi la sjakʼike: «Viniketik ta Galilea, ¿kʼu yuʼun liʼ vaʼaloxuk akʼelojik muyel vinajele? Li Jesuse laj yichʼ ikʼel lokʼel ta atojolalik ti muy batel ta vinajele, jaʼ jech tsut tal kʼuchaʼal laj avilik muy batel ta vinajele» (Echos 1:10, 11).

Muʼyuk kʼusi labal sba la spas Jesus kʼalal muy batel ta vinajele, yuʼun kʼajomal noʼox laj yilik li tukʼil yajtsʼaklomtake. ‹Jaʼ jech tsut tal kʼuchaʼal muy  batel ta vinajele›, mu toj labaluk xa sba xtok, yuʼun kʼajomal noʼox chakʼik venta li tukʼil yajtsʼaklomtak kʼalal liʼ xa oy kʼuchaʼal Ajvalil ti oy sjuʼele.

Laje sutik batel ta Jerusalen li jtakboletike. Vaʼun te lik stsobilan sbaik xchiʼuk li yan jchankʼopetike, ti te kapal skʼoplal li «Maria smeʼ Jesuse xchiʼuk li yitsʼinabtake» (Echos 1:14). Mu xlubtsajik ta spasel orasion li jtsop jchankʼopetik taje. Jtos ti kʼusi tskʼan ta s-orasionike jaʼ ti stabeik xkʼexol li Judas Iskariotee, sventa xkʼotik ta lajchaʼvoʼ yan velta (Mateo 19:28). Tskʼanik junuk jchankʼop ti yilojuk li kʼusitik la spas Jesuse xchiʼuk ti yilojuk ti chaʼkuxie. Liʼ une jaʼ xa slajeb velta chal Vivlia ti laj yakʼik suerte sventa xilik li kʼusi tskʼan Diose (Salmo 109:8; Proverbios 16:33). Jaʼ laj yichʼ tʼujel Matias sventa «[xkʼot] ta xchiʼilik li buluchvoʼ jtakboletike», taje jaʼ te lokʼ li ta 70 la stak batel Jesuse (Echos 1:26).

Kʼalal lokʼ xaʼox lajuneb kʼakʼal smuyel batel ta vinajel li Jesuse, kʼot skʼakʼalil li kʼin yuʼun judaetike, jaʼ li skʼinal Pentekostes ta sjabilal 33 ta jkʼakʼaliltike. Te van 120 yajtsʼaklomtak Jesus te tsobolik ta kuarto ta akʼol ta jpʼej na ta Jerusalen. Jaʼ to chaʼiike, tsots tajek xjumumet jech kʼuchaʼal tsatsal ikʼ, jaʼ jech laj yaʼiik ta spʼejel na. Oy kʼusi laj yilik ti xkoʼolaj kʼuchaʼal okʼiletik o leb kʼokʼe, te kʼot ta sbaik ta jujuntal. Vaʼun lik kʼopojikuk ta yan kʼopetik skotolik. ¡Taj une jaʼ me li chʼul espiritu ti albat onoʼox ch-akʼbatike! (Juan 14:26.)