Kʼalal oy xaʼox ta slajunebal kʼakʼal smuyel batel ta vinajel li Jesuse, laj yakʼ tal li chʼul espiritu ta Pentekostese, vaʼun jaʼ jech jamal vinaj ti yuʼun te oy ta vinajel ta melel li Jesuse. Pe oy to mas sprevail. Xi laj yal li jchankʼop Esteban kʼalal jutuk xaʼox tajek skʼan xakʼbeik ton ta skoj ti jaʼ jun tukʼil testigoe: «¡Kʼelo avilik! Jamal chkil li vinajele xchiʼuk te vaʼal ta sbatsʼikʼob Dios li Xnichʼon krixchanoe» (Echos 7:56).

Te xa oy ta vinajel xchiʼuk Stot li Jesuse, te smalaoj kʼusi ora chkʼot ta pasel jtos ti kʼusi chal Skʼop Dios ta sventae. Yuʼun xi akʼbil snaʼ yuʼun Dios li Davide: «Li Mucʼul Diose jech laj yalbe li Cajvale [li Jesuse]: ‹Chotlan ta jbatsʼicʼob, jaʼ to cʼalal ta xcacʼ atecʼubin li avajcontrataque›». Vaʼun mi tsuts ti kʼu sjalil chchoti ta sbatsʼikʼob Mukʼul Diose, xi ch-albate: «Paso me mantal ta stojol li avajcontrataque» (Salmo 110:1, 2). Pe ¿kʼusi van tspas Jesus ta vinajel ti kʼalal mu to chkʼot yorail stsak ta kʼop li yajkontratake?

Lik ta Pentekostes ta sjabilal 33 ta jkʼakʼaliltik li stsobobbail yajtsʼaklomtak Kristoe. Jaʼ yuʼun te to ta vinajel lik ajvalilajuk tal Jesus ta stojolal li yajchankʼoptak ti tʼujbilik ta chʼul espiritu sventa chbatik ta vinajele (Kolosenses 1:13). La sbeiltas li ta cholmantal tspasike xchiʼuk la xchanubtas ta sventa li kʼusi tspasik ta tsʼakale. ¿Kʼusi ti tspasike? Veno, li buchʼutik tukʼ yoʼonton chakʼ sba ta sjunul xkuxlejalike chichʼik chaʼkuxesel xchiʼuk jmoj ch-ajvalilajik xchiʼuk Jesus li ta Ajvalilal yuʼun Diose.

Jun ti buchʼu chkʼot ta ajvalil ta tsʼakale jaʼ li Sauloe, ti mas ojtikinbil kʼuchaʼal Pabloe, taje jaʼ jun biil ta Roma. Jaʼ jun juda vinik ti oy tajek ta yoʼonton li Mantale, pe lajem ta loʼlael yuʼun li jnitvanejetik ta relijion yuʼun judaetike, jech oxal lek laj yil ti laj yichʼ milel li Estebane. Vaʼun bat ta Damasko li Sauloe, yuʼun «oy to ta yoʼonton tsots tsibtas xchiʼuk tsmil li yajchankʼoptak Kajvaltike». Jaʼ jech, li mero bankilal pale ti Kaifas sbie laj yakʼbe Saulo li svunal ti akʼo xchuk tal li yajchankʼoptak Jesuse xchiʼuk ti akʼo yikʼ sutel tal ta Jerusalene (Echos 7:58; 9:1). Pe kʼalal ta be xa xbate, ta anil noʼox joyobtabil kʼot ta xojobal lus, vaʼun yal ta lum.

 Laj yaʼi ti oy buchʼu xi chale: «Saulo, Saulo, ¿kʼu yuʼun yakal chakontrainun?». Pe mu snaʼ bu chlik tal li yechʼomal eile. Xi la sjakʼ li Sauloe: «¿Buchʼuot Kajval?». Xi la stakʼ li yechʼomal eile: «Voʼon Jesusun, voʼon ti yakal chakontrainune» (Echos 9:4, 5).

Vaʼun albat yuʼun Jesus ti akʼo x-och batel ta Damasko li Sauloe, yuʼun jaʼ te ch-albat ti kʼusi skʼan spase. Jaʼ noʼoxe skʼan oy buchʼu xnitat batel li ta jteklume, yuʼun maʼsat kom ta skoj li xojobal lus ti ta skʼelobil juʼelal tale. Pe oy te jun yajchankʼop Jesus ta Damasko ti Ananias sbie, vaʼun oy kʼusi akʼbat yil ek. Laje albat ti bu skʼan xbat yoʼ saʼ jun vinik ti Saulo sbie. Mu skʼan lek xbat li Ananiase, pe xi albat yuʼun li Jesuse: «Jaʼ jun tʼujbil vaso kuʼun li vinik leʼe, yuʼun jaʼ chalbe batel jbi li jyanlumetike, li ajvaliletike xchiʼuk li xnichʼnabtak Israele». Vaʼun jam sat li Sauloe. Jech oxal te «lik xchol mantal ta nail tsobobbailetik [ta Damasko] ta sventa li Jesuse, ti jaʼ Xnichʼon Dios li Jesuse» (Echos 9:15, 20).

Koltaatik yuʼun Jesus li Pablo xchiʼuk li yan jcholmantaletik sventa xcholik-o batel li mantale, ti jaʼ la slikes xcholel li Jesuse. Laj yakʼbe sbendision Dios li abtelal tspasike. Kʼalal te xaʼox van 25 jabiluk ti laj yakʼ sba ta ilel Jesus ta stojolal Pablo kʼalal jaʼo chbat ta Damaskoe, xi laj yale: «Laj xa yichʼ cholbel [lekil aʼyejetik] skotol li kʼusitik pasbil ti oy ta yolon vinajele» (Kolosenses 1:23).

Kʼalal echʼem xaʼox jayib jabile, oy kʼusi akʼbat yil yuʼun Dios li jtakbol Juan ti kʼanbil yuʼun Jesuse, ti te ta jtatik ta slivroal Apokalipsise. Te laj yil kʼu yelan tsut tal Jesus kʼalal oy xaʼox sjuʼel ta Ajvalilal yuʼun Diose (Juan 21:22). Te melel, «ta sventa chʼul espiritu [kʼot] ta skʼakʼalil Kajvaltik» li Juane (Apokalipsis 1:10). ¿Bakʼin chkʼot ta pasel taje?

Kʼalal ta jchantik lek li albil kʼopetike, te chkakʼtik venta ti ta jkʼakʼaliltik lik li «skʼakʼalil kajvatike». Jaʼ ta 1914 lik tal, jaʼo kʼalal lik li Baʼyel Mukʼta Paskʼop ta spʼejel Balumile. Jaʼo lik tal mas li paskʼope, li chamele, li viʼnale, li nikele xchiʼuk li yan kʼusitik ti te tsakal skʼoplal «li senyail» laj yalbe yajtakboltak Jesus kʼalal «liʼ xa [oye]» xchiʼuk kʼalal «ta xtal li slajebe» (Mateo 24:3, 7, 8, 14). Maʼuk noʼox, yuʼun yakal xa chichʼ cholel ta spʼejel Balumil li lekil aʼyejetik ta sventa Ajvalilale, maʼuk xa noʼox ti bu kʼalal smakoj li yosilal Romae.

Akʼbat snaʼ yuʼun Dios sventa xalbe smelolal li Juane, xi laj yale: «¡Kʼot xa yorail avi li koltaele, vinaj xa li sjuʼele xchiʼuk och xa ta abtel li Ajvalilal yuʼun Jdiostike xchiʼuk lik xa spas mantal li Skristoe» (Apokalipsis 12:10). Jaʼ jech, ¡li Ajvalilal yuʼun Dios ta vinajel ti laj yalbe skʼoplal Jesuse, yakal xa ch-ajvalilaj ta melel!

Taje jaʼ lekil aʼyejetik chaʼiik skotol li tukʼil yajchankʼoptak Jesuse. Jaʼ jech tsnopik kʼuchaʼal xi laj yal li jtakbol Juan liʼe: «Ta skoj taje ¡kuxetuk me avoʼontonik vinajel xchiʼuk li buchʼutik te nakale! ¡Abol sba li balumil xchiʼuk li nabe! Yuʼun te yalem talel Diablo ti bu oyoxuke, oy tajek skʼakʼal yoʼonton ta skoj ti snaʼoj ti toj komkom xa li yoraile» (Apokalipsis 12:12).

Vaʼun chaʼa, li Jesuse muʼyuk xa bu te chotol ta sbatsʼikʼob Stot sventa tsmala. Moʼoj, yuʼun jaʼ xa jun Ajvalil, poʼot xa slajes li yajkontratake (Evreos 10:12, 13). Vaʼun chaʼa, ¿kʼusitik ti toj lekik jmalaojtik chkʼot ta pasele?