1, 2. ¿Kʼu yuʼun akʼanoj li Jeovae?

¿MI AKʼANOJ li Diose? Xuʼ van akʼanoj tajek, jech oxal laj avakʼbe li akuxlejale. Xuʼ van jaʼ alekil Amigo chavil. Pe mi xanaʼe, li Jeovae jaʼ xa onoʼox baʼyel la skʼanot, tsʼakal to lik akʼan li voʼote. Li Vivliae chal ti chijkʼanvanutik ta skoj ti «jaʼ la skʼanutik baʼyel li stuke» (1 Juan 4:19).

² ¿Kʼuxi yakʼoj ta ilel ti skʼanojutik li Jeovae? Nopo xa noʼox avaʼi: yakʼojbutik li balumil ti jaʼ li jkʼupil natike xchiʼuk yakʼojbutik skotol li kʼusi chtun kuʼuntik yoʼ xijmuyubajuk noʼox xijkuxie (Mateo 5:43-48; Apokalipsis 4:11). Oy tajek ta yoʼonton ti xkamigointike xchiʼuk laj yakʼbutik skotol li kʼusi chtun sventa xkojtikintike. Kʼalal ta jkʼel Jvivliatike, jaʼ jech chkaʼitik li kʼusi chalbutike. Sventa xaʼibutik ek une, skʼan jpastik orasion (Salmo 65:2). Tsbeiltasutik xchiʼuk chakʼ kipaltik, jaʼ tstunes li xchʼul espiritu ti tsots tajek yipe (Lukas 11:13). Maʼuk noʼox, yuʼun la stak tal li Xnichʼon ti skʼanoj tajek yoʼ spojutik lokʼel li ta mulil xchiʼuk li ta lajelale (kʼelo Juan 3:16; Romanos 5:8).

3. ¿Kʼusi xuʼ jpastik yoʼ lekuk-o xkil jbatik xchiʼuk li Jeovae?

 ³ Nopo ta sventa junuk avamigo ti muʼyuk bu stenojot-o komele, ti te oy-o kʼalal tsots chavil avokole. Ep van kʼusitik avakʼoj avip spasel sventa jechuk-o lek xavil aba xchiʼuke. Jaʼ noʼox jech ek, skʼan oyuk kʼusi xkakʼtik persa spasel yoʼ lekuk xkil jbatik xchiʼuk li Jeovae ti jaʼ li mas lekil Amigoil xuʼ jtatike. Jech xtok, xuʼ jech-o lek xkil jbatik xchiʼuk ta sbatel osil. Sventa spas kuʼuntike, xi chalbutik li Vivliae: «Te xakomik-o li ta kʼanelal yuʼun Diose» (Judas 21). Pe ¿kʼuxi xuʼ spas kuʼuntik taje? Xi tstakʼ li Vivliae: «Liʼe jaʼ smelolal ti jkʼanojtik li Diose: ti jchʼunbetik li smantaltake; mu toj tsotsuk ta chʼunbel li smantaltake» (1 Juan 5:3).

4, 5. ¿Kʼu yuʼun lik akʼan li Jeovae?

⁴ Li ta 1 Juan 5:3, chal ti «jkʼanojtik li Diose». ¿Mi xvul to ta ajol kʼalal lik akʼan li Jeovae?

⁵ Nopbo skʼoplal jlikeluk liʼe: ¿kʼu yelan laj avaʼi aba kʼalal la achan ti oy ta yoʼonton Jeova ti xakuxi ta sbatel osil ta jun achʼ balumile? ¿Kʼu yelan laj avaʼi aba kʼalal la achanbe skʼoplal skotol li kʼusitik spasoj tal yoʼ xkʼot ta pasel yuʼune? Xchiʼuk ¿kʼu yelan laj avaʼi aba kʼalal laj avaʼibe smelolal ti jaʼ mukʼta matanal laj yakʼbot Jeova ti la stak tal ta balumil li Xnichʼone? (Mateo 20:28; Juan 8:29; Romanos 5:12, 18). La stij avoʼonton kʼalal laj avaʼi ti skʼanojot tajek li Jeovae, vaʼun lik akʼan ek (kʼelo 1 Juan 4:9, 10).

6. 1) Kʼalal oy buchʼu jkʼanojtike, ¿kʼuxi chkakʼbetik yil ti jkʼanojtike? 2) ¿Kʼusi apasoj tal ta skoj ti akʼanoj li Jeovae?

⁶ Pe li kʼusi laj avaʼi ta avoʼontone jaʼ to noʼox  slikeb. ¿Kʼuxi taje? Veno, kʼalal oy buchʼu jkʼanojtike, maʼuk noʼox «jkʼanojot» xkutik, moʼoj, yuʼun lek chkaʼitik spasel xtok li kʼusi tskʼupine. Jaʼ noʼox jech ek, kʼalal lik akʼan li Jeovae, lik apas li kʼusitik lek chile. Kʼalal mas to la akʼane, lokʼ ta avoʼonton laj avakʼbe li akuxlejale xchiʼuk laj avichʼ voʼ. Kʼalal laj avakʼbe akuxlejal li Jeovae, laj avalbe ta jamal ti chatun-o ta stojolal sbatel osile (kʼelo Romanos 14:7, 8). ¿Kʼusi van xuʼ skoltaot yoʼ spas avuʼun li kʼusi laj avalbe ta jamale?

7. 1) ¿Kʼusi ta jpastik mi jkʼanojtik li Jeovae? 2) ¿Kʼusi mantaletik yakʼojbutik li Jeovae?

⁷ ¿Kʼuxi chkakʼbetik yil Jeova ti jkʼanojtike? Jaʼo kʼalal ta «jchʼunbetik li smantaltake». Li Jeovae te chalbutik ta Vivlia ti kʼu yelan skʼan xijkuxie. Jech kʼuchaʼal liʼe, chalbutik mantal ti mu stakʼ xijyakube, ti mu xij-elkʼaje, ti mu jutik kʼope, ti mu jchiʼintik ta vayel li buchʼu maʼuk jnup jchiʼiltike xchiʼuk ti mu lekuk mi yan-o kʼusi chkichʼtik ta mukʼe o ti jpas ta jdiostik junuk krixchanoe (1 Korintios 5:11; 6:18; 10:14; Efesios 4:28; Kolosenses 3:9).

8, 9. Kʼalal muʼyuk junuk mantal ta Vivlia ta sventa li kʼusi ta jpastike, ¿kʼuxi xuʼ jnaʼtik ti kʼusi lek chil Jeovae? Albo junuk skʼelobil.

⁸ Pe sventa lek xilutik li Jeovae, maʼuk noʼox skʼan jchʼuntik li mantaletik yakʼojbutike. Yuʼun muʼyuk bu yakʼojbutik junuk lista ti bu chal skotol li kʼusi skʼan jpastik ta jujutos li kʼusi ta jnuptantike. Jaʼ yuʼun, bakʼintike, muʼyuk me ta jtatik junuk mantal ta Vivlia ti jamal chal kʼusi skʼan jpastike. Vaʼun chaʼa, ¿kʼuxi xuʼ lek xkʼot ta nopel kuʼuntik li kʼusi ta jpastike? (Efesios 5:17). Li Jeovae yakʼojbutik beiltaseletik ti jaʼ li kʼusi  chal Vivlia ti tsotsik skʼoplal ti jaʼ chakʼ kiltik li kʼusi tsnope. Kʼalal ta jkʼel Jvivliatike, chkiltik kʼu yelan stalelal li Jeovae. Chkiltik li kʼusi lek chile, li kʼusi tspʼaje xchiʼuk ta jtatik ta ilel li kʼusi tsnop ta sventa jeltos kʼusitike (kʼelo Salmo 97:10; Proverbios 6:16-19. Kʼelo nota 1, beiltaseletik).

⁹ Jech kʼuchaʼal liʼe, ¿kʼuxi xuʼ jnaʼtik mi lek chil Jeova li kʼusi ta jkʼeltik ta television o ta Internete? Muʼyuk bu chalbutik ta jamal kʼusi skʼan jpastik. Pe yakʼojbutik li beiltaseletike. Jutuk mu skotoluk li kʼusitik chlokʼ ta television o ta Internete jaʼ sventa mulivajel, majbail o saʼkʼop. Li ta Vivliae, chal ti Jeovae «spʼajoj li buchʼutik skʼanojik saʼkʼope» xchiʼuk chchapan li jmulivajeletike (Salmo 11:5; Ebreos 13:4). ¿Kʼuxi xuʼ skoltautik yoʼ lekuk kʼusi xkʼot ta nopel kuʼuntik li beiltaseletik taje? Tskoltautik ta yaʼibel smelolal ti skʼan jpʼajtik ek li kʼusi spʼajoj Jeovae o li kʼusi chopol chile.

10, 11. ¿Kʼu yuʼun ta jchʼunbetik smantal li Jeovae?

¹⁰ ¿Kʼu yuʼun ta jchʼunbetik smantal li Jeovae? Maʼuk ta skoj ti mu jkʼantik kastigoe o ti mu jkʼan jta jvokoltik ta skoj li kʼusitik muʼyuk lek ta jpastike (Galatas 6:7). Moʼoj, ta jchʼunbetik smantal ta skoj ti jkʼanojtike. Jechutik kʼuchaʼal jun uni olol ti chchʼunbe smantal stot ta skoj ti tskʼan xmuyubaj yuʼune. Li voʼotik eke ta jkʼantik ti xkuxetuk yoʼonton kuʼuntik li Jtotik ta vinajele. Mu kʼusi xkoʼolaj-o chkaʼitik kʼalal jnaʼojtik ti lek chilutik li Jeovae (Salmo 5:12; Proverbios 12:2. Kʼelo nota 2, xchʼunel mantal).

¹¹ Maʼuk noʼox ta jchʼunbetik smantal kʼalal jaʼo kʼun  ta pasel chkaʼitike o kʼalal mu xa kʼusi stakʼ pasel chkiltike. Mu tʼujbiluk noʼox ta jchʼuntik li smantaltake (Deuteronomio 12:32). Mu jechuk ta jpastik, yuʼun ta jchʼunbetik skotol li smantaltake. Jech chkaltik kʼuchaʼal li jtsʼibajom yuʼun salmo ti xi laj yale: «Jkʼanoj li amantaltake, jech xkal, jkʼanoj» (Salmo 119:47; Romanos 6:17). Jech ta jkʼan ta jpastik xtok kʼuchaʼal li Noee, yuʼun laj yakʼ ta ilel ti skʼanoj li Jeovae, ¿kʼuxi? Jaʼ ti la spas skotol li kʼusi albate. Xi ch-albat skʼoplal li ta Vivliae: «Jech tajek la spas kʼuchaʼal albate» (Jenesis 6:22). ¿Mi mu tauk xakʼan ti jech cha-albat akʼoplal yuʼun li Jeova eke?

12. ¿Kʼuxi xuʼ xmuyubaj kuʼuntik li Jeovae?

¹² Xkuxet ta jyalel yoʼonton Jeova kʼalal ta jchʼunbetik li smantaltake (Proverbios 11:20; 27:11). ¡Taje toj labal sba ta aʼiel!, yuʼun xuʼ xmuyubaj kuʼuntik li buchʼu la spas vinajel balumile. Li stuke laj yakʼ ti xuʼuk jnop jtuktik li kʼusi ta jkʼantike. Muʼyuk bu tsujutik sventa jchʼunbetik li smantaltake. Yuʼun laj yakʼ ti xuʼuk jtʼuj jtuktik mi jaʼ ta jpastik li kʼusi leke o mi jaʼ li kʼusi chopole. Li kʼusi tskʼan Jeovae jaʼ ti lekuk kʼusitik xkʼot ta nopel kuʼuntik ta skoj ti jkʼanojtike, vaʼun ti jech lek xbat li jkuxlejaltike (Deuteronomio 30:15, 16, 19, 20; kʼelo nota 3, xuʼ jnop jtuktik).

13, 14. ¿Kʼu yuʼun xuʼ jchʼuntik ti mu toj tsotsuk ta chʼunbel li smantaltak Jeovae? Albo junuk skʼelobil.

¹³ Pe xuʼ van xi xkaltike: «Solel tsots ta chʼunel li smantaltake» o «Toj chukulun-o chkaʼi». Pe ¿mi jech van? Xi chalbutik li Vivliae: «Mu toj tsotsuk ta chʼunbel li smantaltake» (1 Juan 5:3). Kʼalal «mu toj tsotsuk»  xi li ta griego kʼope, jaʼ skʼan xal ti «mu oluke». Jech, li smantaltak Jeovae mu olikuk, jaʼ xkaltik, mu toj tsotsikuk ta chʼunel. Oy noʼox lek spʼisol skotol li kʼusitik tskʼan akʼo jpastik li Jeovae.

¹⁴ Xi jkoʼoltastike: nopo avaʼi ti chbat saʼ tal siʼ jun totil xchiʼuk yun kʼoxe. Li totile muʼyuk bu chakʼbe tal xkuch ep siʼ li xkʼoxe, yuʼun snaʼoj ti mu xlik yuʼune xchiʼuk ti xuʼ stsikʼ-oe. Li Jeovae jaʼ jech kʼuchaʼal li lekil totil taje. Muʼyuk onoʼox bu chakʼ jpastik li kʼusi toj vokolik ti mu spas kuʼuntike (Deuteronomio 30:11-14). Li stuke xojtikin ti kʼu kelantike, «yuʼun snaʼoj lek ti kʼu yelan pasbilutike xchiʼuk te ta sjol ti lumutik noʼoxe» (Salmo 103:14).

15. ¿Kʼu yuʼun xuʼ jchʼuntik ti jaʼ sventa jlekilaltik li mantaletik yakʼojbutik Jeovae?

¹⁵ Li Moisese laj yalbe j-israeletik ti jaʼ sventa slekilalik li smantaltak Jeovae xchiʼuk ti jaʼ sventa xkuxiik-o mi la xchʼunike (Deuteronomio 5:28-33; 6:24). Jaʼ jech li avi eke. Skotol li kʼusi tskʼan akʼo jpastik li Jeovae jaʼ sventa jlekilaltik (kʼelo Isaias 48:17). Li Jtotik Jeovae snaʼoj lek li kʼusitik jaʼ sventa jlekilaltike (Romanos 11:33). Jech xtok, li Vivliae chal ti «jaʼ kʼanelal li Diose» (1 Juan 4:8). Taje jaʼ skʼan xal ti jaʼ ta skoj ti skʼanojutik kʼalal oy kʼusi chalbutike o kʼalal oy kʼusi tspase.

16. Akʼo mi chopol tajek li balumile xchiʼuk ti jpasmulilutike, ¿kʼusi tskoltautik yoʼ jchʼunbetik li smantaltak Diose?

¹⁶ Pe bakʼintike, vokol chkaʼitik xchʼunbel smantal li Diose. ¿Kʼu yuʼun? Yuʼun li Diabloe jaʼ tspas mantal li ta balumile xchiʼuk tstijbe yoʼonton krixchanoetik yoʼ jaʼuk spasik li kʼusi chopole (1 Juan 5:19). Jech  xtok, jpasmulilutik. Jaʼ yuʼun, jech-o skʼan xkakʼtik persa sjipel lokʼel ta jnopbentik li kʼusi chopole xchiʼuk skʼan jpastik ta mantal li koʼontontik sventa mu jaʼuk jpastik li kʼusi muʼyuk lek chil Diose (Romanos 7:21-25). Ta skoj ti jkʼanojtik li Jeovae, jaʼ tstij koʼontontik ta spasel li kʼusi leke. Li stuke ep sbalil chil ti chkakʼtik persa xchʼunbel li smantaltake xchiʼuk tskoltautik ta xchʼul espiritu ti tsots tajek sjuʼele (1 Samuel 15:22, 23; Echos 5:32). Li chʼul espiritue chlekub-o yuʼun li jtalelaltike, jaʼ tskoltautik yoʼ xchʼun kuʼuntik li smantaltak Diose (Galatas 5:22, 23).

17, 18. 1) ¿Kʼusi ta jchantik batel li ta livro liʼe? 2) ¿Kʼusi ta jkʼeltik li ta yan kapituloe?

¹⁷ Li ta livro liʼe, ta jchantik batel li kʼusitik tskʼan Dios akʼo jpastike. Ta jchantik kʼuxi xuʼ xkakʼ ta jkuxlejaltik li beiltaseletik yuʼune xchiʼuk li mantaletik yuʼun yoʼ jnaʼtik kʼu yelan skʼan jtalelaltike. Teuk me ta ajol ti muʼyuk bu tsujutik ta xchʼunel li Jeovae. Pe mi jaʼ la jnop ta jchʼunbetik smantaltake, ximuyubaj noʼox me xchiʼuk oy me kʼusitik lek ta jtatik li ta tsʼakale. Pe ti kʼusi mas to tsots skʼoplale jaʼ ti jaʼ jech chkakʼbetik yil Jeova ti jkʼanojtik ta jyalele (kʼelo nota 4, mantaletik yoʼ jnaʼtik kʼu yelan skʼan jtalelaltik).

¹⁸ ¿Kʼusi yakʼojbutik Jeova sventa jnaʼtik li kʼusi lek xchiʼuk li kʼusi chopole? Yakʼojbutik li jol koʼontontike. Mi lek la jchanubtastike, ta me skoltautik ta xchʼunbel li smantaltak Jeovae. Pe ¿kʼusi jaʼ li jol koʼontontike xchiʼuk kʼuxi xuʼ jchanubtastik? Jaʼ ta jkʼeltik li ta yan kapituloe.