Skarta li Jtsop Jbeiltasvanej yuʼun li Stestigotak Jeovae
Voʼoxuk ti akʼanojik Jeova xchiʼuk li Skʼope:
Xi laj yal li Jesuse: «Chavojtikinik li kʼusi melele xchiʼuk jaʼ chakʼ akolebalik li kʼusi melele» (Juan 8:32). ¿Mi xvul to ta ajol kʼu yelan laj avaʼi aba kʼalal laj avojtikin li kʼusitik melel chchanubtasvan Vivliae? Lijmuyubaj kʼalal laj kiltik ti xuʼ xkojtikintik li kʼusitik melel chal Vivlia akʼo mi kuxulutik ta jun balumil ti nojem ta jutkʼope (2 Timoteo 3:1).
Li Jeovae tskʼan ti xkojtikintik li kʼusi melele. Jkʼanojtik li krixchanoetik eke, jaʼ yuʼun oy ta koʼontontik yalbelik li kʼusitik melele. Pe ¿mi oy kʼusi yan skʼan jpastik sventa xijtun ta stojolal li Diose? Oy, ta skoj ti kichʼojtik ta mukʼ li beiltaseletik yuʼun Diose, skʼan xkakʼ kipaltik sventa xvinaj ta jkuxlejaltik ti jaʼutik yajtsʼaklom Kristoe. Li Jesuse laj yal kʼuxi xuʼ xkakʼbetik yil Jeova ti jkʼanojtike, xi laj yale: «Jkʼanojoxuk-o me mi chachʼunik li jmantaltake, jech kʼuchaʼal skʼanojun-o li Totil ta skoj ti ta jchʼunbe smantaltake» (Juan 15:10).
Li Jesuse tspas skotol li kʼusi ch-albat yuʼun stot ta skoj ti skʼanoj tajeke. Mi chijkuxi jech kʼuchaʼal la spas li Jesuse, ta me skʼanutik li Jeovae xchiʼuk ta me xijmuyubaj ta melel. Xi onoʼox laj yal li Jesuse: «Ta skoj ti anaʼojik xa li kʼusitik taje, xamuyubajik noʼox me mi jech chapasike» (Juan 13:17).
Oy ta koʼontonkutik ti xatabe sbalil li livro liʼe, ti akʼo skoltaot sventa xakuxi jech kʼuchaʼal chal li Vivliae xchiʼuk ti xakʼot ta yamigo li Diose. Ta jkʼankutik ta orasion ti masuk to xakʼan jujun kʼakʼale, ti xakʼan-o li Diose, vaʼun ti xakuxi ta sbatel osile (Judas 21).
Li Jtsop Jbeiltasvanej yuʼun li Stestigotak Jeovae