Mu kʼusi xkoʼolaj xkʼuxul ti chichʼ lokʼesel ta tsobobbail junuk kutsʼ kalaltik o junuk kamigotik ta skoj ti mu sutes yoʼontone. Pe ti kʼu yelan chkaʼitik xchiʼuk ta jpastik li kʼusitik chalbutik Vivlia ta sventa taje, chakʼ ta ilel kʼu to yepal jkʼanojtik li Diose xchiʼuk ti bu to kʼalal tukʼ koʼontontik ta stojolal li smantaltake. * Jaʼ yuʼun, jkʼeltik jayibuk kʼusitik xuʼ xkʼot ta pasel.

¿Kʼu yelan skʼan xkil jbatik xchiʼuk li buchʼu lokʼesbil ta tsobobbaile? Xi chal li Vivliae: «Mu xa me xachiʼinik ti buchʼu chal ti jaʼ ermanoe, pe ti jaʼ jmulivajele, o li buchʼu mu x-echʼ yoʼonton ta skʼanel kʼusitike, o li buchʼu chichʼ ta mukʼ santoetike, o li jchopol-loʼiltavaneje, o li jyakubele, o li j-elekʼe, li buchʼu jech taje mi jaʼuk xachiʼinik ta veʼel» (1 Korintios 5:11). Jech noxtok, li Vivliae xi chalbutik mantale: «Skotol li buchʼu [...] mu jechuk-o tspas ti kʼu yelan chanubtasvan li Kristoe [...], mu me xachʼam ta anaik xchiʼuk mu me xakʼoponik jsetʼuk. Yuʼun mi oy buchʼu tskʼopon jutebuke, xkoʼolaj me kʼuchaʼal yakal xa tspas ek li kʼusi toj chopol tspase» (2 Juan 9-11). Li ta revista La Atalaya 15 yuʼun noviembre ta 1981, pajina 19, xi chale: «Mi naka noʼox chkaltik ‹¡Kʼuxi me!›, mi xkutik jun krixchanoe, xuʼ te xlik-o jloʼiltik o xuʼ van jaʼ te xlik-o kamigoin jbatik. ¿Mi ta van jkʼantik jech chlik jpastik ta stojolal junuk buchʼu ti lokʼesbile?». Jaʼ jech taje, kʼalal oy buchʼu chichʼ lokʼesel ta tsobobbaile, mu xa xuʼ jchiʼintik ta jyalel mi jaʼuk xuʼ xijloʼilaj xchiʼuk ta sventa kʼusitik ta mantal.

¿Mi mu xa stakʼ jchiʼintik ta jyalel? Moʼoj, mu xa stakʼ jchiʼintik ta jyalel, yuʼun oy jayibuk srasonal. Li baʼyele jaʼ ti tukʼ koʼontontik ta stojolal Dios xchiʼuk li Skʼope. Jkʼanojtik tajmek li Jeovae, jaʼ yuʼun ta jchʼunbetik li smantale manchuk mi toj vokol chkaʼitik bakʼintik. Jech noxtok, jchʼunojtik ta melel ti tukʼe, ti chkʼanvane xchiʼuk ti jaʼ sventa jlekilaltik skotol li smantaltake (Isaías 48:17; 1 Juan 5:3). Li xchibal srasonale jaʼ ti tsokesvan li jpasmulil  ti muʼyuk sutesoj yoʼontone. Jaʼ yuʼun, kʼalal muʼyuk xa ta jchiʼintike ta jchabi jbatik ta mantal xchiʼuk ta jtalelaltik, jech xtok mu x-och yikʼobal li tsobobbaile xchiʼuk jaʼ jech lek-o skʼoplal kuʼuntik (1 Korintios 5:6, 7). Li yoxibal srasonale jaʼ ti xuʼ tstabe sbalil li jpasmulil kʼalal chichʼ lokʼesele. ¿Kʼuxi? Mi tukʼ koʼontontik ta xchʼunel li beiltaseletik ta Vivliae xchiʼuk mi muʼyuk chopol chkaʼitik li kʼusi kʼot ta nopel yuʼun li komite sventa jchapanvaneje, xuʼ van jtijbetik yoʼonton li jpasmulil sventa stabe sbalil li koltael akʼbat yuʼun moletik ti muʼyuk to xchʼunoje. Ta melel, ti muʼyuk ta jchiʼintike xuʼ xkʼunib-o yoʼonton xchiʼuk xjelbat stalelal. Kʼalal mi laj yakʼ venta ti mu xa xkoʼolaj lek xil sba xchiʼuk li buchʼutik skʼanoje, xuʼ van ‹xvul xchʼulel›, ti xaʼi kʼu to stsatsal li smule xchiʼuk ti spas li kʼusitik skʼan pasel sventa sut tal ta stojolal li Jeovae (Lukas 15:17).

¿A ti mi jaʼ kutsʼ kalaltik li buchʼu yichʼoj lokʼesel une? Li stukʼil koʼontontik ta stojolal Jeovae xuʼ van xichʼ akʼel ta preva mi jaʼ kutsʼ kalaltike. Kʼalal jech taje, ¿kʼu yelan skʼan xkiltik li buchʼu lokʼesbil ta tsobobbaile? Akʼo mi mu xlaj kalbetik skʼoplal skotol li kʼusitik xuʼ xkʼot ta pasele, kalbetik noʼox skʼoplal chaʼtosuk.

Bakʼintike, li buchʼu lokʼesbil ta tsobobbaile jmoj nakal xchiʼuk li yutsʼ yalale. Ta skoj ti mu xjel-o ti yutsʼ yalal sbaike, li yantik ta utsʼ alalile muʼyuk bu chopol chaʼiik ti te oye xchiʼuk ti tspas kʼusitik chichʼ pasel jujun kʼalal ta snaike. Pe ta skoj ti tukʼ yoʼontonik ta stojolal Jeovae, mu xuʼ xal sloʼil kʼalal jmoj tspasik li yichʼel ta mukʼ Jeova ta yutsʼ yalalike, yuʼun jaʼ lokʼ ta yoʼonton stuk ti muʼyuk xa chtun ta stojolal Diose. Xuʼ van te chchiʼinik kʼalal chchan Svivliaik li utsʼ alalile, pe mu xuʼ xakʼ sloʼil. Pe mi kʼox to li buchʼu lokʼesbil li ta tsobobbaile, li totil meʼiletike skʼan me xchanubtasik ta Vivlia, yuʼun oy to ta sbaik ta xchanubtasel xchiʼuk ta stojobtasel li yalab xnichʼnabike (Proverbios 6:20-22; 29:17). *

Pe ¿mi muʼyuk jmoj nakal xchiʼuk stot smeʼ o yalab xnichʼnab li buchʼu lokʼesbil tsobobbail une? Kʼalal jeche, ti bu kʼalal xuʼ yuʼunik li yajtsʼaklomtak Kristo ti tukʼ yoʼontonike mu xa me masuk chchiʼinik ta loʼil, jaʼ noʼox mi toj tsots skʼoplal sventa tskʼelik kʼusiuk  ta yutsʼ yalalike. Mu yolbajuk xa kʼusi tspasik sventa tstsob sbaik. Ta skoj ti tukʼ yoʼontonik ta stojolal Jeova xchiʼuk ta stojolal li s-organisasione, chichʼik ta mukʼ li tojobtasel chakʼ Vivliae. Jaʼ tskʼanik li kʼusi lek ta sventa li yutsʼ yalalike, vaʼun ti jech tukʼ yakʼoj sbaike xuʼ van skoltaik sventa stabe sbalil li tukʼibtasel laj yichʼe (Evreos 12:11). *