Li Jeovae tskʼan ti akʼo spasik li kʼusi laj yalbe sbaik li vinik xchiʼuk ants kʼalal nupunike. Kʼalal laj yakʼ nupunuk li baʼyel vinik xchiʼuk baʼyel antse, xi laj yale: «Li vinique [...] ta xicʼ yajnil.  Li chibic toʼoxe jun noʼox sbecʼtal ta xcʼotic». Kʼalal echʼ xaʼox jayibuk sigloe, li Jesuse la xchaʼal taje xchiʼuk xi to laj yale: «Jaʼ yuʼun ti kʼusi spasoj ta jun li Diose muʼyuk buchʼu xuʼ xchʼak» (Génesis 2:24; Mateo 19:3-6). Kʼuchaʼal chkiltike, li Jeova xchiʼuk Jesuse jaʼ sventa sjunul kuxlejal chilik li nupunele, ti jaʼ noʼox chlaj skʼoplal mi cham junuk yuʼunike (1 Korintios 7:39). Ta skoj ti chʼul chil nupunel li Diose, skʼan me tsotsuk skʼoplal xkiltik. Jech ta melel, li Jeovae tspʼaj ti tsutes-o sbaik kʼalal muʼyuk srasonal chichʼ pasel jech kʼuchaʼal chal li Vivliae (Malaquías 2:15, 16).

¿Kʼusi la srasonal tsots skʼoplal chal Vivlia sventa sutes-o sbaik li nupultsʼakaletike? Veno, li Jeovae yaloj ti tspʼaj tajmek li mulivajele (Génesis 39:9; 2 Samuel 11:26, 27; Salmo 51:4). Solel tspʼaj tajmek, yuʼun chal ti xuʼ sutes-o sbaik kʼalal oy buchʼu chmulivaj junuk yuʼunike. (Ta kapitulo 9, parafo 7, te chichʼ albel skʼoplal kʼusi smakoj batel li mulivajele.) Ta melel, ti buchʼu albil yuʼun Dios ti oy sderecho tsnop mi tsutes-o sbaik o mi moʼoje jaʼ li buchʼu chʼabal smule (Mateo 19:9). Jech oxal chaʼa, mi la snop tsutes-o smalal o yajnil li buchʼu chʼabal smule, muʼyuk kʼusi chopol yakal tspas ti tspʼaj Jeovae. Pe mi junuk buchʼu ta tsobobbail xuʼ xalbe ti akʼo jech spase. Jech, li buchʼu nupunem ti muʼyuk smule xuʼ van tstsak ta venta jlomuk kʼusitik yoʼ snop stuk ti muʼyuk chikta li snup xchiʼile, mas to mi chil ti ta melel sutesoj yoʼontone. Jaʼ yuʼun chaʼa, li buchʼu oy sderecho sventa tsutes-o snup xchiʼil kʼuchaʼal chal li Vivliae, jaʼ me skʼan snop stuk li kʼusi tspase xchiʼuk jaʼ me tsbain li kʼusi chkʼot ta pasel ta skoje (Galatas 6:5).

Pe oy yan kʼusitik ti tsotsik skʼoplal chkʼot ta pasel ti xuʼ tsnop chchʼak sba o tsutes-o snup xchiʼil li jun yajtsʼaklom Kristoe, akʼo mi muʼyuk mulivajem li snup xchiʼile. Kʼalal jeche, li Vivliae chal ti buchʼu tsnop chbate skʼan «mu me xnupun, o mi moʼoje akʼo slajesbe yoʼonton» li snup xchiʼile (1 Korintios 7:11). Kʼalal jech chkʼot ta pasele, li yajtsʼaklom Kristoe muʼyuk bu xokol sventa xlik skʼel yan krixchano yoʼ xnupunik ta tsʼakale (Mateo 5:32). Jkʼeltik jaytosuk kʼusitik tsots chkʼot ta pasel ti jaʼ xuʼ chchʼak sbaik li jlome.

Mu skʼan smakʼlin yutsʼ yalal. Oy malaliletik ti mu skʼan xakʼbe li kʼusitik mas chtun yuʼun li yutsʼ yalalike, pe maʼuk ti yuʼun  mu xuʼ yuʼunike, yuʼun mu skʼanik; vaʼun ta skoj taje chil-o svokol li yutsʼ yalale. ¿Kʼusi chal Vivlia ta stojolalik taje? «Mi oy buchʼu mu xakʼbe kʼusi chtun yuʼun li buchʼutik [...] te oyik ta snae, laj xa spʼaj li xchʼunel oʼontonale, mas to me chopol chkʼot, jaʼ mu sta li buchʼu chʼabal xchʼunel yoʼontone.» (1 Timoteo 5:8.) Mi oy jun malalil mu skʼan sjel stalelale, li ajnilale skʼan me snop mi persa ta xchʼak sba ti lek pasbil svunal ta stojolal ajvalil sventa slekilal li yalab xchiʼuk li stuke. Pe kʼalal jech chichʼ tikʼbel smul jun yajtsʼaklom Kristoe, li moletik ta tsobobbaile ta me skʼelbeik lek skʼoplal, yuʼun jaʼ jun srasonal ti xuʼ xichʼ lokʼesel ta tsobobbaile.

Majel ti ch-echʼ ta mase. Oy buchʼutik toj simaronik ti chakʼbe ta vokol slekilal o xkuxlejal li xchiʼilik ta nupunele. Mi jaʼ yajtsʼaklom Kristo li jmajvaneje, li moletike skʼan me skʼelik lek taje, yuʼun li kʼakʼetel oʼontonale xchiʼuk li majvaneje jaʼ srasonal sventa chichʼ lokʼesel ta tsobobbail li buchʼu jech tspase (Galatas 5:19-21).

Kʼalal tsots ch-akʼbat svokol ta skoj ti tspasbe yabtel Diose. Oy viniketik o antsetik ti solel mu xakʼ akʼo xtunik ta stojolal Jeova li snup xchiʼilike o ti tsujik tajmek sventa mu xchʼunik li mantaletik ta Vivliae. Kʼalal jech taje, li malalil o ajnilal yajtsʼaklom Kristoe skʼan snop mi persa skʼan xchʼak sba sventa jaʼ xchʼunbe «smantal kʼuchaʼal ajvalil li Diose, maʼuk li krixchanoetike» (Echos 5:29).

Ta skotol li kʼusitik tsots xa tajmek chkʼot ta pasel jech kʼuchaʼal laj xa kaltike, skʼan me mu xkalbetik akʼo xchʼak sba o teuk-o xchiʼuk snup xchiʼil li buchʼu chʼabal smule. Akʼo mi xuʼ xkoltavanik o chakʼik tojobtasel ta Vivlia li moletik o yan ermanoetik ti yijik ta mantale, skʼan me xakʼ ta yoʼontonik ti jaʼ xojtikin stuk Jeova li kʼusi chkʼot ta pasel ta snupunel li vinik xchiʼuk antse. Mi oy jun yajtsʼaklom Kristo (mi vinik o ants) ch-echʼ xa ta mas ti kʼu yelan tsloʼilta li skʼop ta snupunelik sventa noʼox ta xchʼak sbae, muʼyuk me bu yakal chichʼ ta mukʼ li nupunele mi jaʼuk li Diose. Jech xtok, li Jeovae snaʼoj mi oy buchʼu naka noʼox ta smanyail ti jech tspase, akʼo mi lek snopoj ti kʼu yelan tspase. Ta melel, «lek chajal ta sat xchiʼuk xil skotol li buchʼu ta persa ta jchapbetik li kʼusi ta jpastike» (Evreos 4:13). Pe mi oy kʼusi toj xibal sba yakal chkʼot  ta pasele, ti persa skʼan xchʼak sba ta skoj ti mu xa kʼusi yan stakʼ pasele, muʼyuk buchʼu xuʼ tslaban. «Yuʼun te vaʼal chijkʼot jkotoltik ta chapanobbail yuʼun Dios.» (Romanos 14:10-12.)