Ta 1 Korintios 6:1 kʼalal ta 8, li jtakbol Pabloe laj yalbe skʼoplal li kʼopetik te chlik yuʼunik li ermanoetike. Baʼyel, laj yakʼ ta ilel ti chopol chil ti oy jlom yajtsʼaklom Kristo ta Korinto ti mu xkʼexav chbatik «ta nail chapanobbail te ta stojolal viniketik ti muʼyuk tukʼike» (versikulo 1). Vaʼun, laj yal ti akʼo xchapanik te noʼox ta tsobobbail li kʼopetike, ti akʼo mu xbatik ta stojolal jchapanvanejetike. Jkʼelbetik jlomuk srasonal ti kʼu yuʼun tsots skʼoplal ti jech laj yal ta skartae, vaʼun ta jkʼeltik jlomuk kʼusitik ti mu toj persauk xichʼ tsakel ta venta li kʼusi laj yal Pabloe.

Kʼalal chlik kʼop ta skoj pʼolmal yuʼun li yajtsʼaklomtak Kristoe, li Jeovae tskʼan ti akʼo jchapantik kʼuchaʼal tskʼan stuke, maʼuk ti kʼu yelan tskʼan koʼontontike (Proverbios 14:12). Jech kʼuchaʼal laj yal Jesuse, jaʼ lek ti xichʼ chapanel ta orae, mu xkakʼtik ti sok batel mase (Mateo 5:23-26). Kʼux ta alel, pe jlom yajtsʼaklomtak Kristoe tskʼan tsaʼik kʼop, vaʼun ch-ikʼvanik batel ta stojolal jchapanvanejetik. Pe li Pabloe laj yakʼ ta ilel ti ‹tsalbilik xa ti kʼalal chbat yakʼik ta chapanel li yermanotakike›. ¿Kʼu yuʼun? Li kʼusi mas chopole jaʼ ti xuʼ tsokesbe skʼoplal li sbi Diose xchiʼuk li slekil kʼoplal tsobobbaile. Sventa mu jechuk xkʼot ta pasele, skʼan jchʼuntik li kʼusi laj yal li jtakbol liʼe: «¿Kʼu yuʼun mu xatsʼikik li kʼusitik muʼyuk tukʼ chapasbatike?» (versikulo 7).

Li Pabloe laj yakʼ ta ilel xtok ti Diose yakʼoj jtos kʼusi toj lek ti chkoltavan ta xchapanel epal kʼopetike. Chal ti ta tsobobbailetike oy viniketik ti staoj lek spʼijilik koliyal ti chchanik li Vivliae. Jech ta melel, li moletik ta tsobobbaile «pʼij [...] sventa xuʼ xchapanvan ta stojolal li ermanoetike», jech xuʼ «[xchapanik] li kʼusitik sventa kuxlejal liʼe» (versikulo 3-5). Jaʼ noʼox jech ek, li Jesuse laj yal ti sventa chichʼ chapanel kʼopetik ta skoj tsatsal vulbaile —kʼuchaʼal chopol kʼoptael, loʼlael ta takʼin o ta yan kʼusitik— oy oxtos kʼusitik chichʼ pasel. Li baʼyele, jaʼ ti jchapan jtuktik xchiʼuk li buchʼu oy jkʼoptik xchiʼuke; mi mu xchapaj tee, li xchibale, jaʼ ti oyuk jun  o chib testigo kʼalal ta jtsob jbatike; mi mu xchapaj te xtoke, li slajeb xa kʼusi xuʼ jpastike, jaʼ ti xijbat ta stojolal li tsobobbaile, jaʼ xkaltik, ta stojolal li moletike (Mateo 18:15-17).

Ta melel, li moletike maʼuk abogadoetik o ti chbeiltasvanik sventa li pʼolmajele xchiʼuk mu me lekuk ti jech xa spas sbaik kʼuchaʼal taje. Muʼyuk chalik xtok kʼuxi ta pasel sventa xchapaj skʼopik li ermanoetik ta sventa spʼolmalike. Moʼoj, yuʼun li yabtelike jaʼ ti tskolta xchaʼvoʼalik sventa tspasik batel jech kʼuchaʼal chal li beiltaseletik ta Vivliae xchiʼuk ti junuk yoʼonton xkomike. Mi toj tsots chilik li kʼope, xuʼ van sjakʼbeik li jkʼelvanej ta sirkuitoe o sjakʼbeik batel Betel. Pe oy jayibuk kʼusitik chkʼot ta pasel ti mu toj persauk xichʼ tsakel ta venta li kʼusi laj yal Pabloe. Jkʼeltik jaytosuk.

Oy mu chopoluk ti chijbat ta stojolal li ajvalile. Xuʼ van skʼan jech xichʼ pasel ta skoj ti jech yaloj li ajvalile o jaʼ ti persa skʼan jech xichʼ pasel sventa lek noʼox xchapaj li kʼusitike. Jech kʼuchaʼal liʼe, xuʼ van toj jtunel sventa sutes-o sbaik li nupultsʼakale, ti buchʼu ta sba chkom li ololetike, skʼanbel stojol sveʼeb li ololetike, skʼanel seguro, xkichʼtik sutesbel li jtakʼintik ti kakʼojtik ta chʼamunele o ta jchapan jtestamentotik ta stojolal ajvalil. Jech xtok, li jun yajtsʼaklom Kristoe xuʼ van tsnop tspoj sba ta jun demanda kʼalal tstikʼbe batel junuk demanda li buchʼu baʼyel la stikʼe. *

Li yajtsʼaklom Kristo ti chbat skʼan parte ta stojolal ajvalil kʼalal jech chkʼot ta pasele, muʼyuk tskontrain li kʼusi akʼbat snaʼ yuʼun Dios li Pabloe, jaʼ noʼox venta mi maʼuk oy ta yoʼonton li saʼ kʼope. * Mu me xchʼay ta joltik li kʼusitik mas tsots skʼoplal chkaʼitike: xchʼultajesbel sbi li Jeovae xchiʼuk ti oyuk noʼox lekilal xchiʼuk ti jmojuk noʼox oyutik li ta tsobobbaile. Li kʼusi chkichʼtik-o ojtikinel li yajtsʼaklomutik Kristoe jaʼ «li kʼanelale», jaʼ li kʼusi mas tsots skʼoplal ta skotole, yuʼun «maʼuk tsaʼ li kʼusi lek chaʼi stuke» (1 Korintios 13:4, 5; Juan 13:34, 35).