Li Pabloe ventainbil yuʼun chʼul espiritu kʼalal laj yalbe skʼoplal ti skʼan smak sjol bakʼintik li ants yajtsʼaklom Kristo sventa tspasbe yabtel li Jeovae. ¿Bakʼin jech skʼan spas xchiʼuk kʼu yuʼun? Jchanbetik skʼoplal li kʼusi laj yal jtakbol ta 1 Korintios 11:3 kʼalal ta 16 sventa jkʼeltik jaytosuk kʼusitik chichʼ pasel sventa chichʼ ichʼel ta mukʼ li Diose. Li Pabloe chal oxtos kʼusitik ti skʼan jtsaktik ta ventae: 1) li kʼusitik chichʼ pasel ti persa skʼan smak sjolike; 2) ti butik chichʼ pasele xchiʼuk 3) ti kʼu yuʼun skʼan jech xichʼ pasele.

Li kʼusitik chichʼ pasele. Li Pabloe chalbe skʼoplal chaʼtos kʼusitik: spasel orasion xchiʼuk li yalel albil kʼope (versikulo 4, 5). Kʼuchaʼal jnaʼojtike, li orasione jaʼ jtos ti kʼu yelan chkichʼtik ta mukʼ li Jeovae. Li yalel albil kʼope, jaʼ chalbe skʼoplal avi li chanubtasel ta Vivlia tspasik li ermanoetik xchiʼuk li ermanaetike. Vaʼun chaʼa, ¿mi jaʼ van skʼan xal ti skotol xa noʼox ora skʼan smak sjol li ermanaetik kʼalal tspasik orasion o chchanubtasvanik ta Vivliae? Moʼoj. Yuʼun skʼan xichʼ tsakel ta venta li bu chichʼ pasele.

Ti butik chichʼ pasele. Li jtakbole chalbe skʼoplal chaʼtos: ta kutsʼ kalaltik xchiʼuk ta tsobobbail. Xi la stsʼibae: «Li sjol antse jaʼ li vinike; [...] chakʼ ta kʼexlal sjol kʼalal muʼyuk bu smakoj sjol tspas orasion o kʼalal chal albil kʼop li antse» (versikulo 3, 5). Li ta utsʼ alalile, li Jeovae chal ti malalile jaʼ jolil kʼotem yuʼun li antse. Jaʼ  yuʼun, ¿kʼusi van chkʼot ta pasel mi jaʼ tspas junuk ants li kʼusitik jaʼ noʼox akʼbil akʼo spas yuʼun Jeova li viniketike? Mi mu xichʼbe ta mukʼ yabtel li smalale, chakʼ ta kʼexlal. Jkʼelbetik jayibuk skʼelobil. Jun ermanae chakʼ chanubtasel ta Vivlia, pe te oy li smalale, jech oxal skʼan smak sjol sventa chakʼ ta ilel ti chichʼ ta mukʼ ti jaʼ jolil li smalale. Manchuk mi yichʼoj voʼ o mi moʼoj, yuʼun jaʼ jolil li ta utsʼ alalile. * ¿Ati mi tskʼopon Dios jun ermana o chchanubtasvan pe jaʼo te oy jun sbikʼit kerem ti yichʼoj xa voʼe? Akʼo mi maʼuk jolil li ta utsʼ alalile, skʼan me smak sjol xtok li meʼile. ¿Kʼu yuʼun? Yuʼun yichʼoj ta mukʼ li abtelal yichʼoj li viniketik ta tsobobbail ti yichʼojik voʼe.

Li Pabloe chalbe skʼoplal li xchaʼtosale, li ta tsobobbaile, xi la stsʼibae: «[Mi] oy junuk vinik ti chal ti mu persauk smak sjol li antse, akʼo mi jech, taje mu jechuk li kʼusi nopem xkaʼitik spasele xchiʼuk mu jechuk nopem xaʼiik spasel ek li stsobobbailtak Diose» (versikulo 16). Li ta tsobobbaile, li Jeovae svaʼanoj viniketik ti yichʼojik voʼe (1 Timoteo 2:11-14; Evreos 13:17). Jaʼ yuʼun jaʼ noʼox chakʼ akʼo xichʼ biiltasel ta mol o ta jtuneletik li viniketik sventa xchabibeik li xchijtak Diose (Echos 20:28). Pe bakʼintike persa tspas jun ermana li kʼusi jaʼ noʼox akʼbil ta sba jun vinik ti yichʼoj voʼ xchiʼuk ti xtojobe. Jech kʼuchaʼal liʼe, xuʼ van skʼan xetʼes li tsobajel sventa xlokʼik ta cholmantal ta skoj ti chʼabal junuk ermano ti xtojobe. Li tsobajel taje jaʼ yan kʼuxi chchanubtasvan xtok li tsobobbaile, jech oxal jaʼ skʼan xetʼes jun ermano. Jaʼ jech xtok mi chakʼ jun chanubtasel ta Vivlia jun ermana ti te xchiʼuk jun ermano ti yichʼoj voʼe. * Jaʼ yuʼun, skʼan smak sjol sventa chakʼ ta ilel ti jaʼ yakal tspas jun abtelal ti jaʼ sbainoj jun vinike.

Pe li ants yajtsʼaklom Kristoe mu persauk smak sjol li ta yantik kʼusitik sventa chichʼ ta mukʼ li Diose. Jech kʼuchaʼal liʼe, kʼalal chakʼ sloʼil ta tsobajeletik, chchol mantal ta jujupʼej na (akʼo  mi jaʼ xchiʼuk smalal o mi yan ermano ti yichʼoj voʼe) xchiʼuk kʼalal tspas orasion o kʼalal chchanunaj xchiʼuk yalabtak ti muʼyuk yichʼoj voʼe. Pe ¿kʼusi xuʼ spas mi oy bu jtosuk mu snaʼ kʼusi tspase? Baʼyel, skʼan snopbe lek skʼoplal. * Pe mi te xnaʼete, mu chopoluk ti smak sjol kʼuchaʼal chkiltik li ta lokʼole.

Ti kʼu yuʼun skʼan jech xichʼ pasele. Li ta versikulo 10 te ta jtatik chib srasonal ti chtijbat yoʼonton ermanaetik ta spasel li kʼusi chichʼ kʼanel liʼe: «Skʼan oyuk svinajeb ta sjol ti ventainbil li antse, taje jaʼ sventa li anjeletike». Li baʼyel srasonale jaʼ li bu chal «ti ventainbil» ti xie. Jech, li pokʼ ti chpix-o sjol li ermanae jaʼ jun senyail ti yichʼojbe ta mukʼ yabtel akʼbil yuʼun Jeova li viniketik ta tsobobbail ti yichʼojik voʼe. Jech oxal chaʼa, jaʼ jech chakʼ ta ilel ti skʼanoj xchiʼuk ti tukʼ yoʼonton ta stojolal li Diose. ¿Kʼusi jaʼ li xchibal srasonale? Jech kʼuchaʼal chal li versikulo laj kaltike, «jaʼ sventa li anjeletike». Pe ¿kʼusi van sbalil tsta li anjeletik ti tsmak sjol li antse?

Li anjeletike yilojik skotol li buchʼutik teik ta s-organisasion Jeovae, ta vinajel xchiʼuk ta Balumil, yakʼojik lek venta ti kʼu yelan chichʼik ta mukʼ li pasmantal yuʼun li Diose. Ta melel tstabeik sbalil, jaʼ ti lek ta chanbel stalelal chilik kʼalal chchʼunik mantal li jmulavil krixchanoetike. Yuʼun li anjeletik eke skʼan xakʼik ta ilel ti bikʼit chakʼ sbaik ta sventa ti kʼu yelan xchapanoj kʼusitik li Diose, ti mu skotoluk jech la spasik ta voʼnee (Judas 6). Li avie toj lek kʼusi xuʼ xchanik li anjeletik kʼalal ta sjunul yoʼonton chchʼunbe smantal jun ermano ti yichʼoj voʼe, manchuk mi jaʼ mas chanem, mas xojtikin o ti mas pʼij li antse. Mas to me toj labal chilik mi jaʼ jech tspas jun ermana ti tʼujbil chbat ta vinajele. ¿Kʼu yuʼun? Yuʼun li ermana taje jmoj ch-ajvalilaj xchiʼuk li jtsop buchʼutik jmoj ch-ajvalilajik xchiʼuk Kristo ta vinajele, ti jaʼ mas to tsots skʼoplal yabtelike, ti jaʼ  mu sta li anjeletike. Kʼuchaʼal chkiltike, li antsetik yajtsʼaklomtak Kristoe oy jun mukʼta matanal staojik ta melel. Kʼalal tukʼ stalelalik xchiʼuk ti tspasik li kʼusi ch-albatike, chakʼbeik yil epal miyon anjeletik ti kʼu yelan ta chʼunel mantal xchiʼuk ti bikʼit chakʼ sbaike.