XCHANOBIL 01
¿Kʼuxi xuʼ skoltaot li Vivliae?
Ep kʼusitik ta jakʼbe jbatik li ta jkuxlejaltike, ta sventa li vokoliletike, li lajelale xchiʼuk li kʼusi xuʼ jnuptantik ta jelavele. Chkat-o koʼontontik xtok ta sventa li kʼusi chtun kuʼuntik jujun kʼakʼale o ti junuk noʼox koʼontontik xchiʼuk li kutsʼ kalaltike. Ep krixchanoetike te staojbeik stakʼobil ta Vivlia li kʼusitik tsjakʼbe sbaike xchiʼuk te staojik lekil tojobtaseletik. ¿Mi oy van buchʼu xuʼ xkoltaat xanaʼ li kʼusi chal Vivliae?
1. ¿Kʼusitik chalbutik smelolal li Vivliae?
Li Vivliae chalbutik smelolal liʼe: ¿kʼuxi lik talel li kuxlejale?, ¿kʼu yuʼun ti la spasutik li Kajvaltike?, ¿kʼu yuʼun chkil jvokoltik?, ¿kʼusi chkʼot ta pasel mi lijchame?, ¿kʼu yuʼun oy tajek paskʼop ti jkotoltik ta jkʼantik ti oyuk jun oʼontonale?, ¿mi chichʼ van lajesel li balumile? Ep krixchanoetike te staojbeik stakʼobiltak li ta Vivliae, ¡xuʼ me te xata ek!
2. ¿Kʼuxi xuʼ skoltautik Vivlia yoʼ xijmuyubaj noʼoxe?
Li Vivliae chalbutik lekil mantaletik, yuʼun tey chal kʼuxi xuʼ xijmuyubaj xchiʼuk kutsʼ kalaltik, kʼuxi xuʼ mu xkat tajek koʼontontik xchiʼuk kʼuxi xuʼ jkʼupin li kabteltike. Mi la jchantik batel li vun liʼe, ta kʼunkʼun ta jchanbetik batel skʼoplal taje xchiʼuk yan kʼusitik ti chalbe skʼoplal li Vivliae. Vaʼun, te chavakʼ venta ti toj tunel kuʼuntik skotol li Tsʼibetike, jaʼ xkaltik, li kʼusi chal li Vivliae (2 Timoteo 3:16).
Maʼuk me Vivlia li vun liʼe, pe xuʼ skoltaot sventa xanaʼ lek li kʼusi chal Vivliae. Ta jtijkutik avoʼonton ti xakʼel skotol li tekstoetik ti talem ta jujun xchanobile xchiʼuk kʼelo kʼuxi snitojbe sba skʼoplal li kʼusi yakal chachane.
JCHANTIK TO BATEL MAS
Jkʼeltik kʼuxi skoltaoj yantik li kʼusi chal Vivliae xchiʼuk jkʼeltik batel kʼuxi xuʼ xakʼupin xchanel. Jech xtok, ta jkʼeltik kʼusi sbalil ta jtatik kʼalal oy buchʼu tskoltautik ta xchanele.
3. Tsbeiltasutik li Vivliae
Li Vivliae xkoʼolaj ta jun joko ti xkil-o yuʼun jbetike. Tskoltautik sventa lekuk kʼusi xkʼot ta nopel kuʼuntik xchiʼuk chalbutik kʼusi chkʼot ta pasel ta mas jelavel.
Kʼelik Salmo 119:105 xchiʼuk albeik skʼoplal li sjakʼobiltak liʼe:
-
¿Kʼu yelan laj yil Vivlia li buchʼu la stsʼiba li salmo liʼe?
-
¿Kʼu yelan chavil li Vivlia eke?
4. Li Vivliae tstakʼ li kʼusi ta jakʼbe jbatike
Jun ants la stabe stakʼobil ta Vivlia li kʼusitik toʼox ta sjakʼbe sbae. Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Kʼusitik toʼox tsjakʼbe sba li ants laj kiltik ta videoe?
-
¿Kʼuxi koltaat kʼalal la xchan li Vivliae?
Li Vivliae chal ti lek kʼalal oy kʼusi ta jakʼtike. Kʼelik Mateo 7:7 xchiʼuk albeik skʼoplal li sjakʼobiltak liʼe:
-
¿Mi xuʼ van te xatabe stakʼobil ta Vivlia li kʼusi chajakʼbe abae? ¿Kʼusitik ti chajakʼbe abae?
5. Xuʼ me xakʼupin xchanel li Vivliae
Ep buchʼutik tskʼupinik xchanel li Vivliae xchiʼuk tstabeik sbalil. Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Kʼusi laj yalik li kerem tsebetik ta video kʼalal chchanik junuk livro o yan kʼusitike?
-
Pe ¿kʼu yuʼun jaʼ tskʼupinik skʼelel li Vivliae?
Li Vivliae tstsatsubtas koʼontontik xchiʼuk chakʼ spatobil koʼontontik. Kʼelik Romanos 15:4 xchiʼuk albeik skʼoplal li sjakʼobil liʼe:
-
¿Mi chakʼan chanaʼ kʼuxi tstsatsubtas koʼontontik xchiʼuk tspat koʼontontik li Vivliae?
6. Xuʼ skoltautik yantik sventa xkaʼibetik smelolal li Vivliae
Ep buchʼutik staojbeik sbalil kʼalal oy buchʼu chkoltaatik ta xchanel li Vivliae, jaʼ mu jechuk kʼalal chchan stukike. Kʼelik Echos 8:26-31 xchiʼuk albeik skʼoplal li sjakʼobil liʼe:
-
¿Kʼuxi xuʼ xkaʼibetik mas smelolal li kʼusi chal Vivliae? (Kʼelik li versikulo 30 xchiʼuk 31).
Li j-etiopia vinike oy buchʼu koltaat sventa xaʼibe smelolal li kʼusi chal Vivliae. Li avi eke, ep buchʼutik staojbeik sbalil kʼalal oy buchʼu chkoltaatik ta xchanele.
JUNANTIKE XI CHALIKE: «Jecheʼ chʼay kʼakʼal li xchanel Vivliae».
-
¿Mi jech chanop taj eke? ¿Kʼu yuʼun un?
¿KʼUSI LA ACHAN?
Li Vivliae tskoltautik ta jkuxlejaltik, tstakʼbutik li kʼusitik ta jakʼbe jbatike, tstsatsubtas koʼontontik xchiʼuk chakʼ spatobil koʼontontik.
Svulesobil ta joltik
-
¿Kʼusi mantaletik chal li Vivliae?
-
¿Kʼusitik tstakʼbutik li Vivliae?
-
¿Kʼusi to mas chakʼan chachan li ta Vivliae?
XUʼ TO XAKʼEL LIʼE
Xuʼ te xata lekil mantaletik ta Vivlia ti tskoltautik avie.
«Mu xlaj-o skʼoplal li kʼusi chal Vivliae» (Li Jkʼel-osil ta toyole, num. 1 2018)
Kʼelavil kʼuxi koltaat yuʼun Vivlia jun vinik ti chopol toʼox kʼusi tsnop ta stojolal stuk kʼalal bikʼit toʼoxe.
Kʼelavil kʼuxi xuʼ skoltaot Vivlia yoʼ xamuyubaj li ta avutsʼ avalale.
«¿Kʼuxi xuʼ xamuyubaj xchiʼuk avutsʼ avalal?» (¡Vikʼiluk me jsatik!, num. 2 2018)
Kʼelavil kʼusi chal Vivlia ta sventa ti buchʼu oy ta skʼob ta melel li balumile.
¿Kʼu yuʼun skʼan jchantik li Vivliae? (video ti mas nate) (3:14)
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
