XCHANOBIL 05
Li Diose yakʼojbutik li Skʼope
Li Jeovae yakʼojbutik jun mukʼta matanal ti jaʼ li Vivliae, yichʼoj tal 66 bikʼtal livroetik. Pe xuʼ van xi chajakʼbe abae: «¿Bu lik talel li Vivliae? ¿Buchʼu la stsʼiba?». Sventa jnaʼtike, jkʼeltik kʼuxi vul talel li Vivliae.
1. Mi viniketik la stsʼiba li Vivliae, ¿kʼu yuʼun chkaltik ti te likem talel ta stojolal Diose?
Te van 40 viniketik la stsʼibaik li Vivliae, jelajtik echʼ xkuxlejalik. Junantike jkʼulejetik xchiʼuk lek chanunajemik, pe li yantike mu jechuk. Li Vivliae lik yichʼ tsʼibael ta sjabilal 1513 kʼalal muʼyuk toʼox talem Jesuse xchiʼuk tsuts ta sjabilal 98 kʼalal talem xa ox Jesuse. Jaʼ yuʼun, te van 1,600 jabil laj yichʼ sventa stsuts stsʼibaele. Akʼo mi jelajtik li buchʼutik la stsʼibaike, koʼol li kʼusi laj yalike. ¿Kʼuxi ti jech pas yuʼunike? Yuʼun te likem tal ta stojolal Dios li Vivliae (kʼelo 1 Tesalonisenses 2:13). Li viniketik taje maʼuk la stsʼibaik li kʼusi tsnop stukike. Moʼoj, «yuʼun likem talel ta stojolal Dios li kʼusi laj yal li viniketik kʼalal tijbat yoʼontonik yuʼun li chʼul espiritue» (2 Pedro 1:21). a Sventa jaʼuk stsʼibaik li kʼusi tsnop Diose, jaʼ tijbat yoʼontonik yuʼun li chʼul espiritue (2 Timoteo 3:16).
2. ¿Buchʼutik xuʼ xchanik li Vivliae?
Li lekil aʼyejetik chal Vivliae xuʼ xaʼiik «ta skotol lumetik, nitilulaletik, jeltos kʼopetik xchiʼuk ta skotol jteklumetik» (kʼelo Apokalipsis 14:6). Jaʼ yuʼun, li Vivliae oy xa ta jeltos kʼopetik. Jutuk mu skotoluk li krixchanoetike xuʼ xchanik li Vivliae, mu ventauk bu nakalik o kʼusi kʼopal chkʼopojik.
3. ¿Kʼuxi xchabioj tal Vivlia li Jeovae?
Kʼalal laj yichʼ tsʼibael li Vivliae, laj yichʼ tunesel snukulil chonbolom o yan kʼusitik ti chlaj noʼoxe. Pe oy junantik viniketik ti skʼanojik tajek li Vivliae la spasbeik ep skopiail, jech tajek la stsʼibaik kʼuchaʼal tsʼibabil onoʼoxe o li ta orijinale. Oy ajvaliletik xchiʼuk jnitvanejetik ta relijion ti tskʼan ox chchʼaybeik skʼoplal li Vivliae, pe oy buchʼutik laj yakʼ ta vokol xkuxlejalik sventa mu teuk xchʼay skʼoplale. Ta skoj ti jaʼ noʼox xuʼ te xalbutik kʼusi tskʼan yoʼonton li Jeovae, xchabioj talel li Skʼope. Xi chal li Vivliae: «Li skʼop Jdiostike te oy-o sbatel osil» (Isaias 40:8).
JCHANTIK TO BATEL MAS
Jkʼeltik batel kʼuxi koltaatik yuʼun Dios junantik viniketik sventa xichʼ tsʼibael li Vivliae, ti mu xchʼay skʼoplale xchiʼuk ti xchan ta skʼop stukik li krixchanoetike.
4. ¿Buchʼu laj yakʼ ta naʼel li Vivliae?
Kʼelik li VIDEOE. Laje kʼelik 2 Timoteo 3:16 xchiʼuk albeik skʼoplal li sjakʼobiltak liʼe:
-
Mi viniketik la stsʼibaik li Vivliae, ¿kʼu yuʼun chkaltik ti jaʼ Skʼop Diose?
-
Li kʼusi la stsʼibaik ta Vivlia li krixchanoetike, ¿mi achʼunoj ta melel ti jaʼ Dios laj yakʼanbe snaʼe?
Li sekretarioe jaʼ noʼox tstsʼiba li kʼusi ch-albat yuʼun yajval yabtele. Jaʼ jech li Vivlia eke, akʼo mi krixchanoetik la stsʼibaik, jaʼ laj yakʼ ta naʼel li Diose.
5. Muʼyuk chʼay skʼoplal yuʼunik li Vivliae
Ta skoj ti te likem talel ta stojolal Dios li Vivliae, la xchabi talel. Voʼne xa onoʼox ti oy ajvaliletik tskʼan tslajesbeik skʼoplal li Vivliae. Oy jnitvanejetik ta relijion xtok ti mu xakʼbeik skʼel Vivlia li krixchanoetike. Akʼo mi ep buchʼutik kontrainvanik xchiʼuk tskʼan ox chmilvanik, oy buchʼutik laj yakʼ ta vokol xkuxlejalik sventa mu teuk xchʼay skʼoplal li Vivliae. Jkʼeltik junuk ti buchʼu laj yakʼ ta vokol xkuxlejale. Kʼelik li VIDEOE xchiʼuk albeik skʼoplal li sjakʼobiltak liʼe:
-
Ti anaʼoj xa ti oy buchʼutik laj yakʼ ta vokol xkuxlejalik sventa mu xchʼay skʼoplal li Vivliae, ¿mi mas xa oy ta avoʼonton skʼelel? ¿Kʼu yuʼun?
Kʼelik Salmo 119:97 xchiʼuk albeik skʼoplal li sjakʼobil liʼe:
-
¿Kʼu yuʼun toj ep buchʼutik laj yakʼ ta vokol xkuxlejalik sventa sjelubtasik xchiʼuk spukik batel li Vivliae?
6. Li Vivliae jaʼ sventa skotol krixchanoetik
Li Vivliae jaʼ li livro mas ep jelubtasbil tal ta jeltos kʼopetik xchiʼuk pukbil ta spʼejel balumil. Kʼelik Echos 10:34, 35 xchiʼuk albeik skʼoplal li sjakʼobiltak liʼe:
-
¿Kʼu yuʼun tskʼan Dios ti xichʼ jelubtasel ta yan kʼopetik li Vivliae xchiʼuk ti xichʼ pukel ta epal lumetike?
-
¿Kʼusi ti labal sba chavil ta sventa li Vivliae?
Ta spʼejel balumile
jutuk mu
skotoluk krixchanoetik
xuʼ xchan ta skʼop stukik li Vivliae
Oy mas ta
oxmil kʼopetik
ta sliklej o jvokʼ noʼox
Li Vivliae pasbil imprimir te van
voʼmil miyon
ti jaʼ mu sta li yan livroetike
JUNANTIKE XI CHALIKE: «Li Vivliae jaʼ jun voʼneal livro xchiʼuk snopben noʼox krixchanoetik».
-
¿Mi jech chanop taj eke?
-
¿Kʼusi sprevail chakʼ iluk ti jaʼ Skʼop Dios li Vivliae?
¿KʼUSI LA ACHAN?
Li Vivliae jaʼ Skʼop Dios, jaʼ yuʼun yakʼoj ti oyuk yuʼun skotol li krixchanoetike.
Svulesobil ta joltik
-
¿Kʼu yuʼun chkaltik ti jaʼ yakʼoj ta naʼel Dios li Vivliae?
-
¿Kʼusi labal sba la avil ti ep ox buchʼu tskʼan chchʼaybe skʼoplal li Vivliae? ¿Kʼu yelan chavil xtok ti jelubtasbil ta jeltos kʼopetik xchiʼuk ti ep tajek pukbile?
-
¿Kʼu yelan chavaʼi aba ta stojolal Dios ti yakʼojbot Skʼop sventa xchiʼinot ta loʼile?
XUʼ TO XAKʼEL LIʼE
Kʼelavil kʼuxi vul talel ta jkʼobtik li voʼneal tsʼibetike.
«¿Kʼuxi vul ta jkʼobtik li Vivliae?» (¡Vikʼiluk me jsatik!, noviembre ta 2007)
Kʼelavil kʼu yuʼun muʼyuk chʼayem skʼoplal li Vivliae.
«Muʼyuk chʼayem-o talel skʼoplal li Vivliae» (Li Jkʼel osil ta toyole, num. 4 2016)
Kʼelavil kʼusi la snuptanik junantik li buchʼutik la sjelubtasik ta yan kʼop li Vivliae.
Yichʼoj jelubtasel ta jeltos kʼopetik li Vivliae xchiʼuk oy ep skopiailtak, ¿kʼuxi xuʼ xanaʼ ti muʼyuk jelem li kʼusi yakʼoj ta naʼel Diose?
«¿Mi oy kʼusi laj yichʼ jelel o tupʼel li ta Vivliae?» (Xuʼ te xata ta jw.org)
a Li chʼul espiritue jaʼ li sjuʼel Diose, te to ta jkʼelbetik skʼoplal ta xchanobil 07.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
