XCHANOBIL 09
Li orasione tsnopajesot ta stojolal Dios
¿Mi ta van xakʼan ti oyuk buchʼu skoltaote? ¿Mi oy kʼusitik tsots skʼoplal chajakʼbe aba ti muʼyuk to ataojbe stakʼobile? ¿Mi chakʼan oyuk buchʼu spat avoʼonton? ¿Mi chakʼan ti masuk nopol xavaʼi aba ta stojolal li Jeovae? Mi jech chavaʼi aba taje, xuʼ me skoltaot li orasione. Pe xuʼ van xi chajakʼbe abae: «¿Kʼu yelan skʼan jpas li orasione? ¿Mi chaʼi skotol orasionetik li Diose? ¿Kʼuxi xuʼ jnaʼ mi chchikinta Dios li orasion ta jpase?». Jkʼeltik batel.
1. ¿Buchʼu skʼan jkʼopontik kʼalal ta jpastik orasione xchiʼuk kʼusi xuʼ xkaltik?
Li Jesuse laj yal ti jaʼ noʼox skʼan jkʼopontik li Jtotik ta vinajele. Yuʼun jaʼ jech la spas li stuke. Xi laj yale: «Xi me yelan skʼan xapasik orasione: ‹Jtotik ta vinajel...›» (Mateo 6:9). Mas to me lek chkil jbatik xchiʼuk Jeova mi ta jkʼopontike.
Kʼalal ta jkʼopontik li Diose, xuʼ me kʼusiuk noʼox xkalbetik. Pe mi ta jkʼantik ti tstakʼ j-orasiontike, muʼyuk ta jkʼantik li kʼusi muʼyuk lek chile. Li Vivliae chal ti «kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14). Li Jesuse laj yal li kʼusitik xuʼ jkʼantik ta j-orasiontike (kʼelo Mateo 6:9-13). Mi laj xa ox avalbe Dios li kʼusi oy ta avoʼontone, mu me xchʼay xavaʼi ti xatojbe ta vokol li kʼusi spasoj ta atojolale xchiʼuk albo ti skolta li yan krixchanoetike.
2. ¿Kʼu yelan skʼan jpastik orasion?
Li Vivliae xi chalbutike: «Albo skotol [Dios] li kʼusi oy ta avoʼontonike» (Salmo 62:8). Jaʼ yuʼun, skʼan xlokʼ ta koʼontontik li kʼusi chkalbetik li Diose. Kʼalal ta jkʼopontike, xuʼ me ta koʼontontik noʼox. Jech xtok, mu ventauk mi kejelutik, mi vaʼalutik o mi chotolutik, jaʼ noʼox venta mi chkichʼtik ta mukʼ Jeova kʼalal ta jkʼopontike. Kʼusuk noʼox ora xuʼ jpastik orasion xchiʼuk buyuk noʼox oyutik.
3. ¿Kʼuxi tstakʼ j-orasiontik li Diose?
Ep ta tos kʼu yelan tstakʼ j-orasiontik li Diose. Jutuk mu skotoluk velta te tstakʼbutik ta Vivlia li kʼusi ta jakʼbe jbatike. Li Skʼop Diose xuʼ me spʼijubtas «li buchʼu muʼyuk spʼijile» (Salmo 19:7; kʼelo Santiago 1:5). Kʼalal chkil jvokoltike, xuʼ me xakʼbutik jun oʼontonal li Jeovae. Jech xtok, xuʼ me stijbe yoʼonton yajtuneltak sventa skoltautik kʼalal chtun kuʼuntike.
JCHANTIK TO BATEL MAS
Sventa lekuk xaʼi j-orasiontik li Diose xchiʼuk ti kʼuxi xuʼ jtabetik sbalile, jkʼeltik kʼusi xuʼ jpastik.
4. ¿Kʼusi skʼan jtsaktik ta venta kʼalal ta jkʼopontik li Diose?
¿Kʼusi skʼan jpastik sventa xaʼi j-orasiontik li Diose? Kʼelik li VIDEOE.
Li Jeovae tskʼan ti jaʼuk noʼox stuk jkʼopontike. Kʼelik Salmo 65:2 xchiʼuk albeik skʼoplal li sjakʼobiltak liʼe:
-
¿Mi oy van ta yoʼonton ti xakʼopon Dios ti jaʼ li buchʼu chchikinta orasione? ¿Kʼu yuʼun ti jech chavale?
Mi ta jkʼantik ti xchikinta j-orasiontik li Diose, skʼan xkakʼtik persa xchʼunbel li smantaltake. Kʼelik Mikeas 3:4 xchiʼuk 1 Pedro 3:12 xchiʼuk albeik skʼoplal li sjakʼobil liʼe:
-
¿Kʼusi skʼan mu jpastik sventa xchikinta j-orasiontik li Diose?
Chaʼvokʼ soltaroetik tskʼanbeik Dios ti xkuch yuʼunik li paskʼope. ¿Mi chtakʼbatik van s-orasionik yuʼun li Diose?
5. Skʼan xlokʼ ta koʼontontik li kʼusi chkalbetike
Ep krixchanoetik chanubtasbilik ti skʼan skomes ta sjolik li kʼusi skʼan xal ta s-orasionike. Pe ¿mi lek van chil Dios taje? Kʼelik Mateo 6:7 xchiʼuk albeik skʼoplal li sjakʼobil liʼe:
-
¿Kʼusi skʼan jpastik sventa mu jchaʼalilantik li kʼusi chkal ta j-orasiontike?
Nopbo skʼoplal jujun kʼakʼal li kʼusi lekik kʼotem ta akuxlejale, vaʼun tojbo ta vokol li Jeovae. Mi jech la apas junuk xemanae, vuktos to me jelajtik kʼusi chaval li ta a-orasione.
Li lekil totil meʼiletike tskʼan tsnaʼik ti kʼu yelan chaʼi sbaik li yalab xnichʼnabike. Li Jeova eke tskʼan ti xlokʼ ta koʼontontik li kʼusi chkalbetike.
6. Li orasione jaʼ jun matanal yakʼojbutik li Diose
¿Kʼuxi xuʼ skoltautik orasion kʼalal tsots chkil jvokoltike? Kʼelik li VIDEOE.
Li Vivliae chal ti xuʼ xakʼbutik jun oʼontonal li orasione. Kʼelik Filipenses 4:6, 7 xchiʼuk albeik skʼoplal li sjakʼobiltak liʼe:
-
Akʼo mi mu xchʼayesbe skʼoplal skotol jvokoltik li orasione, ¿kʼuxi xuʼ skoltautik?
-
¿Kʼusi oy ta avoʼonton chaval li ta a-orasione?
¿Mi chakʼan to chachan mas?
Li jpʼel kʼop amén xie jaʼ skʼan xal «jechuk». Li ta voʼnee, ta xalik amén kʼalal mi tsuts li s-orasionike (1 Kronikas 16:36).
7. Mu me xchʼay xavaʼi xapas orasion
Ta skoj ti mu noʼox xijxokobe, bakʼintike chchʼay xkaʼitik ti jpastik orasione. ¿Mi tsots skʼoplal laj yil Jesus li spasel orasione? Kʼelik Mateo 14:23 xchiʼuk Markos 1:35 xchiʼuk albeik skʼoplal li sjakʼobiltak liʼe:
-
¿Kʼusi ora nopem xaʼi tspas orasion li Jesuse?
-
¿Bakʼin van xuʼ xapas orasion?
JUNANTIKE XI CHALIKE: «Jecheʼ ta jpas orasion, yuʼun muʼyuk tstakʼ li Diose».
-
¿Mi jech chanop ek?
¿KʼUSI LA ACHAN?
Kʼalal jamal chkalbetik Dios li kʼusi oy ta koʼontontike, mas chijnopaj ta stojolal. Jech xtok, li orasione chakʼbutik jun oʼontonal xchiʼuk kipaltik sventa jpastik li kʼusi tskʼanbutik Jeovae.
Svulesobil ta joltik
-
¿Buchʼu skʼan jkʼopontik kʼalal ta jpastik orasione?
-
¿Kʼu yelan skʼan jpastik li orasione?
-
¿Kʼuxi tskoltautik li orasione?
XUʼ TO XAKʼEL LIʼE
Kʼelavil stakʼobil li kʼusi tsjakʼbe sbaik epal krixchanoetik ta sventa li orasione.
«Vuktos kʼusitik skʼan xa naʼ ta sventa li orasione» (Li Jkʼel-osil ta toyole, enero-marso ta 2011)
Kʼelavil kʼu yuʼun tsots skʼoplal ti xapas orasione xchiʼuk ti kʼuxi kʼupiluk sba xapase.
«¿Kʼu yuʼun tsots skʼoplal ti jpastik orasione?» (Xuʼ te xata ta jw.org)
Kʼelavil kʼusi chal Vivlia ti buchʼu skʼan jkʼopontik kʼalal ta jpastik orasione.
¿Mi ta buyuk noʼox xuʼ jpastik orasion? Kʼelavil li video ti oy smusikaile.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
