XCHANOBIL 14
¿Kʼu yelan skʼan xkichʼtik ta mukʼ li Diose?
Jech kʼuchaʼal la jchantik li ta xchanobil 13, mu skotoluk relijion lek chil li Diose. Pe oy kʼuxi xuʼ xkichʼtik ta mukʼ ti xuʼ xmuyubaj-o kuʼuntik li Jpasvaneje. ¿Kʼu yelan «li ichʼel ta mukʼ» o «li relijion» ti lek chil Diose? (Santiago 1:27; tsʼib ta yok vun). Jkʼeltik kʼusi chal li Vivliae.
1. ¿Bu chal ti kʼu yelan skʼan xkichʼtik ta mukʼ li Diose?
Te ta jtatik ta Vivlia ti kʼu yelan skʼan xkichʼtik ta mukʼ li Diose. Li Jesuse xi laj yalbe li Diose: «Jaʼ melel li akʼope» (Juan 17:17). Junantik relijione muʼyuk chchʼunik li kʼusi chal Vivliae, yuʼun jaʼ lek chaʼiik spasel li kʼusi nopem xaʼiike xchiʼuk li kʼusi xchanoj stukike. Pe li Jeovae muʼyuk lek chil li buchʼutik mu xchʼunbat smantale (kʼelo Markos 7:9). Kʼalal ta jtsaktik ta venta kʼusi chal li Vivliae xchiʼuk ti chkakʼ ta jkuxlejaltike, chmuyubaj kuʼuntik li Diose.
2. ¿Kʼu yelan skʼan xkichʼtik ta mukʼ li Jeovae?
Ta skoj ti jaʼ Jpasvanej kuʼuntik li Jeovae, sta-o ti jaʼ noʼox xkichʼtik ta mukʼe (Apokalipsis 4:11). Taje jaʼ skʼan xal ti jaʼ noʼox skʼan jkʼantik xchiʼuk ti xkichʼtik ta mukʼe, ti mu xkichʼtik ta mukʼ lokʼoletik xchiʼuk yan kʼusitike (kʼelo Isaias 42:8).
Ti kʼu yelan skʼan xkichʼtik ta mukʼ li Jeovae skʼan chʼuluk xchiʼuk ti xchʼamuke (Romanos 12:1). Taje jaʼ skʼan xal ti skʼan xkakʼ ta jkuxlejaltik li smantaltake. Yuʼun li buchʼutik skʼanojik Jeovae ep sbalil chilik xchiʼuk chchʼunik li mantaletik yakʼoj ta sventa li nupunele. Jech xtok, muʼyuk lek chilik li slajesel drogae, li sbutsʼel sikʼolale xchiʼuk li yakubele. a
3. ¿Kʼu yuʼun skʼan tsobol xkichʼtik ta mukʼ li Jeovae?
Li tsobajel jujun xemanae tskoltautik sventa jkʼupil kʼoptatik Jeova «li ta tsobobbaile» (Salmo 111:1, 2). Jtos ti kʼu yelan xuʼ jkʼupil kʼoptatik li Diose jaʼo kʼalal ta jkʼejintatike (kʼelo Salmo 104:33). ¿Kʼu yuʼun tskʼanbutik Jeova ti jtsob jbatike? Yuʼun skʼanojutik xchiʼuk snaʼoj ti xuʼ jkʼupin-o jkuxlejaltik sbatel osile. Kʼalal ta jtsob jbatike, te ta jpatbe jba koʼontontik ta jujuntal.
JCHANTIK TO BATEL MAS
Jkʼeltik batel kʼu yuʼun mu skʼan Jeova ti jtunestik lokʼoletik sventa xkichʼtik ta mukʼe. Jech xtok, jkʼeltik kʼuxitik xuʼ jkʼupil kʼoptatik li Diose.
4. Muʼyuk me lek ti jtunestik lokʼoletik sventa xkichʼtik ta mukʼ li Diose
¿Kʼuxi xuʼ jnaʼtik ti muʼyuk lek chil Dios ti jtunestik lokʼoletike? Kʼelik li VIDEOE xchiʼuk albeik skʼoplal li sjakʼobil liʼe:
-
Li ta voʼnee, ¿kʼusi kʼot ta stojolal junantik yajtuneltak Dios kʼalal la stunesik jun lokʼol sventa xichʼik ta mukʼ li Jeovae?
Junantik krixchanoetike mas nopol chaʼi sbaik ta stojolal Dios kʼalal tstunesik lokʼol sventa xichʼik ta mukʼe. Pe ¿mi jaʼ to van chichʼik ta mukʼ li Diose? Kʼelik Eksodo 20:4-6 xchiʼuk Salmo 106:35, 36 xchiʼuk albeik skʼoplal li sjakʼobiltak liʼe:
-
¿Kʼusitik aviloj tstunes krixchanoetik sventa xichʼik ta mukʼ li Diose?
-
¿Kʼu yelan ta xil Jeova ti chichʼ tunesel lokʼoletike?
-
¿Kʼu yelan chavil ek li stunesel lokʼoletike?
5. Mi jaʼ noʼox chkichʼtik ta mukʼ li Jeovae, muʼyuk chijlaj ta loʼlael
Mi chkichʼtik ta mukʼ Jeova jech kʼuchaʼal tskʼane, muʼyuk me chijlaj ta loʼlael yuʼun li kʼusitik jecheʼ chʼunbile. Jkʼeltik avil kʼu yuʼun ti jech chkaltike. Kʼelik li VIDEOE.
Kʼelik Salmo 91:14 xchiʼuk albeik skʼoplal li sjakʼobil liʼe:
-
Mi chkakʼtik ta ilel ti jkʼanojtik li Jeovae xchiʼuk mi jaʼ noʼox chkichʼtik ta mukʼe, ¿kʼusi tspas ta jtojolaltik?
6. Chkichʼtik ta mukʼ Dios li ta tsobajeletike
Kʼalal chijkʼejin xchiʼuk chkakʼ jloʼiltik li ta tsobajeletike, jaʼ jech ta jkʼupil kʼoptatik li Jeovae xchiʼuk ta jpatbe jba koʼontontik ta jujuntal. Kʼelik Salmo 22:22 xchiʼuk albeik skʼoplal li sjakʼobiltak liʼe:
-
¿Mi chakʼupin kʼalal chakʼ sloʼil li ermanoetik ta tsobajele?
-
¿Mi chakʼan chavakʼ junuk aloʼil ek li ta tsobajele?
7. Li Jeovae lek chil kʼalal chkalbetik yantik li kʼusi ta jchantike
Ep ta tos kʼu yelan xuʼ xkalbetik yantik li kʼusi chakʼ ta chanel Vivliae. Kʼelik Salmo 9:1 xchiʼuk 34:1 xchiʼuk albeik skʼoplal li sjakʼobil liʼe:
-
Skotol li kʼusi achanoj xa ta Vivliae, ¿kʼusi chakʼan chavalbe li yantike?
JUNANTIKE XI CHALIKE: «Mu ventauk kʼu yelan chkichʼ ta mukʼ li Diose, jaʼ noʼox venta mi muʼyuk kʼusi chopol ta jpase».
-
Voʼote, ¿kʼusi chanop?
¿KʼUSI LA ACHAN?
Kʼalal jaʼ noʼox ta xkichʼtik ta mukʼ li Jpasvanej kuʼuntike, ti ta jkʼupil kʼoptatik ta tsobajeletike xchiʼuk ti chkalbetik yantik li kʼusi jchanojtike, ta me xmuyubaj kuʼuntik.
Svulesobil ta joltik
-
¿Bu chal ti kʼu yelan skʼan xkichʼtik ta mukʼ li Diose?
-
¿Kʼu yuʼun jaʼ noʼox skʼan xkichʼtik ta mukʼ li Jeovae?
-
¿Kʼu yuʼun skʼan tsobol xkichʼtik ta mukʼ li Jeovae?
XUʼ TO XAKʼEL LIʼE
Kʼelavil sloʼil xkuxlejal jun ants ti laj yikta komel li lokʼoletike, «Maʼuk xa smosoun li santoetike».
«Jelbat-o xkuxlejalik yuʼun li Vivliae» (Li Jkʼel-osil ta toyole, xchanobil)
Kʼelavil kʼuxi xuʼ xavakʼ aloʼil li ta tsobajeletike.
«Kichʼtik ta mukʼ Jeova li ta tsobobbaile» (Li Jkʼel-osil ta toyole, enero ta 2019)
Kʼelavil kʼuxi koltaat yuʼun tsobajel jun kerem ti vokol toʼox chaʼi sventa xbate.
Jutuk mu skotoluk li krixchanoetike jaʼ jchʼunolajel chilik li buchʼu tstunes kruse, pe ¿mi skʼan van jtunestik sventa xkichʼtik ta mukʼ li Diose?
«¿Kʼu yuʼun muʼyuk tstunesik li kruse?» (Xuʼ te xata ta jw.org)
a Taje te to ta jkʼelbetik skʼoplal ta yan xchanobiltak.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
