XCHANOBIL 16
¿Kʼusitik la spas Jesus kʼalal ay ta balumile?
Kʼalal oy buchʼutik tsnopbeik skʼoplal Jesuse, chtal ta sjolik jun uni neneʼ, jun pʼijil profeta o jun vinik ti yakal chil svokol xchiʼuk ti poʼot xa xchame. Pe ¿mi mu jechuk ti mas to chkojtikintik mi la jchanbetik lek skʼoplal kʼu yelan echʼ xkuxlejal liʼ ta balumile? Li ta xchanobil liʼe, ta jkʼeltik junantik li kʼusitik mas tsots skʼoplal la spas Jesuse xchiʼuk ti kʼuxi xuʼ xatabe sbalile.
1. ¿Kʼusi ti mas tsots skʼoplal la spas Jesuse?
Li kʼusi mas tsots skʼoplal la spas Jesuse jaʼ ti la xchol ‹li lekil aʼyejetik ta sventa li Ajvalilal yuʼun Diose› (kʼelo Lukas 4:43). Laj yalbe skʼoplal ti tsvaʼan jun Ajvalilal li Diose o jun Ajvalil ti jaʼ tslajesbe skʼoplal skotol li kʼusi chil˗o svokol li krixchanoetike. a Li Jesuse oxib jabil xchiʼuk oʼlol laj yakʼ persa yalbel krixchanoetik li lekil aʼyejetike (Mateo 9:35).
2. ¿Kʼusi laj yakʼ ta ilel Jesus kʼalal oy kʼusitik labalik sba la spase?
Li Vivliae chal ti Diose la stunes Jesus sventa «spas skʼelobiltak juʼelal xchiʼuk kʼusitik labalik sba» (Echos 2:22). Ta skoj ti akʼbat yip yuʼun Dios li Jesuse, la spajes jun tsatsal ikʼaloʼ, la smakʼlin ta smilal noʼox krixchanoetik, la xpoxta jchameletik xchiʼuk la xchaʼkuxes junantik animaetik (Mateo 8:23-27; 14:15-21; Markos 6:56; Lukas 7:11-17). Kʼalal oy kʼusitik labalik sba la spas li Jesuse, jamal vinaj ti jaʼ takbil tal yuʼun li Diose. Jech xtok, te vinaj ti oy sjuʼel Jeova sventa slajesbe skʼoplal skotol li jvokoltike.
3. ¿Kʼusi chakʼ jchantik ti kʼu yelan echʼ xkuxlejal li Jesuse?
Skotol ora la xchʼunbe smantal Jeova li Jesuse (kʼelo Juan 8:29). Ti kʼu sjalil kuxi ta balumile tukʼ˗o laj yakʼ sba xchiʼuk la spasbe li kʼusi tskʼan yoʼonton Stote akʼo mi oy buchʼutik pajesvanik. Taje chakʼ jchantik ti xuʼ xijtun ta stojolal Dios akʼo mi tsots tajek jvokoltik. Li Jesuse laj yakʼbe yil yajtsʼaklomtak kʼuxi xuʼ stsʼakliik «batel lek li yav yoke» (1 Pedro 2:21).
JCHANTIK TO BATEL MAS
Jkʼeltik avil kʼuxi laj yal batel lekil aʼyejetik li Jesuse xchiʼuk kʼalal la spas milagro o kʼusitik labalik sbae.
4. Laj yal lekil aʼyejetik li Jesuse
Li Jesuse mu xa noʼox albajuk kʼu snamal xanav sventa xalbe lekil aʼyejetik li krixchanoetike. Kʼelik Lukas 8:1 xchiʼuk albeik skʼoplal li sjakʼobiltak liʼe:
-
¿Mi jaʼ noʼox la xcholbe mantal Jesus li buchʼutik chtal kʼelatuke?
-
¿Kʼusi la spas Jesus sventa xchiʼin ta loʼil li krixchanoetike?
Li Diose yaloj xa onoʼox ti chal lekil aʼyejetik li Mesiase. Kʼelik Isaias 61:1, 2 xchiʼuk albeik skʼoplal li sjakʼobiltak liʼe:
-
¿Kʼuxi jnaʼojtik ti kʼot ta stojolal Jesus li kʼusi chal li teksto liʼe?
-
¿Mi skʼan van xaʼiik xanaʼ lekil aʼyejetik li krixchanoetik avi eke?
5. Li Jesuse oy kʼusitik tsots skʼoplal laj yakʼ ta chanel
Maʼuk noʼox laj yalbe skʼoplal lekil aʼyejetik sventa Ajvalilal yuʼun Dios li Jesuse, yuʼun oy kʼusitik laj yakʼ ta chanel ti jtunel kuʼuntike. Jkʼeltik avil junantik li kʼusi laj yal kʼalal jaʼo te oy ta jun vitse. Kʼelik Mateo 6:14, 34 xchiʼuk 7:12 xchiʼuk albeik skʼoplal li sjakʼobiltak liʼe:
-
¿Kʼusitik laj yal Jesus ti toj tunel kuʼuntike?
-
Li kʼusi laj yal Jesuse, ¿mi chtun van yuʼun li krixchanoetik avi eke?
6. Oy kʼusitik labalik sba la spas li Jesuse
Li Jeovae laj yakʼbe sjuʼel Jesus sventa oyuk kʼusitik labalik sba spas. Sventa xakʼelik junuk skʼelobile, kʼelik Markos 5:25-34 o kʼelik li VIDEOE. Mi laje, albeik skʼoplal li sjakʼobiltak liʼe:
-
Jech kʼuchaʼal laj avil ta videoe, ¿kʼusi xchʼunoj lek li antse?
-
¿Kʼusi lek laj avilbe li kʼusi labal sba la spas Jesuse?
Kʼelo Juan 5:36 xchiʼuk albeik skʼoplal li sjakʼobil liʼe:
-
¿Kʼusi chakʼ ta ilel li kʼusitik labalik sba la spas Jesuse?
¿Mi chak’an to chachan mas?
Jutuk mu skotoluk li kʼusi jnaʼojtik ta stojolal Jesuse xuʼ te jtatik li ta chanib livro ta Vivlia ti Evanjelio sbie. Li buchʼutik la stsʼibaike jaʼik Mateo, Markos, Lukas xchiʼuk Juan ti jelajtik kʼusi laj yalik ta stojolal li Jesuse. Mi la jchantik li chanib livroe, te chkakʼtik venta skotol li kʼusi la spas Jesuse.
-
MATEO
Jaʼ li buchʼu la stsʼiba li baʼyel Evanjelioe. Li kʼusi mas chalbe skʼoplale jaʼ li chanubtaseletik laj yakʼ Jesuse, pe mas to laj yalbe skʼoplal li Ajvalilal yuʼun Diose.
-
MARKOS
Jaʼ la stsʼiba li Evanjelio ti mas jutebe xchiʼuk li kʼusitik labalik sba kʼot ta pasele.
-
LUKAS
Laj yal ti toj tsots skʼoplal li orasione xchiʼuk ti la xkʼuxubin antsetik li Jesuse.
-
JUAN
La stsʼiba ti kʼu yelan la xchiʼin ta loʼil yamigotak li Jesuse xchiʼuk ti kʼu yelan la skʼopon li yan krixchanoetike.
JUNANTIKE XI CHALIKE: «Li Jesuse jaʼ li Dios ti skotol xuʼ yuʼune».
-
¿Mi jech chanop taj eke?
¿KʼUSI LA ACHAN?
Laj yalbe skʼoplal Ajvalilal yuʼun Dios li Jesuse, oy kʼusitik labalik sba la spas xchiʼuk jech˗o la xchʼunbe smantal li Jeovae.
Svulesobil ta joltik
-
¿Kʼusi ti mas tsots skʼoplal la spas Jesus kʼalal tal ta balumile?
-
¿Kʼusi te vinaj kʼalal oy kʼusitik labalik sba la spas li Jesuse?
-
¿Kʼusitik laj yakʼ ta chanel Jesus ti jtunel kuʼuntike?
XUʼ TO XAKʼEL LIʼE
¿Kʼusi mas laj yalbe skʼoplal li Jesuse?
Kʼelavil kʼu yuʼun chkaltik ti kʼot ta pasel li kʼusitik labalik sba la spas Jesuse.
Kʼelavil kʼuxi jelbat xkuxlejal jun vinik kʼalal la xchan ti muʼyuk bu tsots skʼoplal laj yaʼi sba li Jesuse.
«Solel jaʼ toʼox ta jsaʼ li kʼusi ta jkʼan jtuke» (Li Jkʼel˗osil ta toyole, 1 yuʼun oktuvre ta 2014)
Kʼelavil li kʼusitik mas tsots skʼoplal la spas li Jesuse xchiʼuk ti kʼu yelan xcholet chal li kʼusitik la spase.
a Li ta xchanobil 31 kʼalal ta 33, te to chalbe mas smelolal kʼusi jaʼ li Ajvalilal yuʼun Diose.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
