Li Jeovae oy ta yoʼonton ti xkojtikinbetik li yuts’ yalal te ta vinajele. Li yutsʼ yalal te ta vinajele jaʼ «skotol li anjeletike» (Job 38:7). ¿Kʼusi chal Vivlia ta stojolal li anjeletike? ¿Kʼusitik xuʼ spasik li anjeletike? ¿Mi jaʼ yutsʼ yalal Dios skotol li anjeletike?

1. ¿Buchʼutik jaʼ li anjeletike?

Spasoj xa onoʼox anjeletik Jeova kʼalal muʼyuk toʼox spasoj li balumile. Jech kʼuchaʼal mu xvinaj ta kʼelel li Jeovae jaʼ jech mu xvinaj ta kʼelel li anjeletik ti te nakalik ta vinajele (Ebreos 1:14). Ta smiyonal noʼox oy li anjeletike xchiʼuk jelajtik tajek stalelalik ta jujuntal (Apokalipsis 5:11). Li anjeletike jaʼ chchʼunik li kʼusi chal Jeovae (Salmo 103:20). Li ta voʼnee, li Jeovae la stak batel yaj˗anjeltak sventa xalik junuk aʼyej xchiʼuk sventa skolta li steklumale. Li avi eke, li anjeletike tsbeiltasik li yajtsʼaklomtak Kristo sventa staik ta saʼel li krixchanoetik ti tskʼan chojtikinik li Diose.

2. ¿Buchʼu jaʼ li Satanas xchiʼuk li pukujetike?

Junantik anjeletike muʼyuk tukʼ laj yakʼ sbaik ta stojolal li Jeovae. Li buchʼu baʼyel la stoy sbae jaʼ li «Diablo xchiʼuk Satanas akʼbil sbie, ti jaʼ yakal tsloʼla skotol li jnaklejetik ta spʼejel balumile» (Apokalipsis 12:9). Li Satanase oy ox ta yoʼonton tspas ta mantal li krixchanoetike, jaʼ yuʼun oy kʼusi la spas sventa xlik stoy sbaik li Adan xchiʼuk Evae. Ta mas tsʼakale, lik stoy sba yuʼun li yan anjeletik xtoke. Li anjeletik ti la stoy sbaike laj yichʼik ojtikinel kʼuchaʼal pukujetik. Li Jeovae la snutsan lokʼel tal ta vinajel xchiʼuk la sjipan yalel tal ta balumil, vaʼun ta mas jelavele ta xichʼik lajesel (kʼelo Apokalipsis 12:9, 12).

3. ¿Kʼusitik tstunes Satanas xchiʼuk spukujtak sventa sloʼlautike?

Li Satanas xchiʼuk spukujtake tstunesik espiritismo xchiʼuk yan kʼusitik sventa sloʼlaik epal krixchanoetik. Junantike chbatik ta stojolal jkʼel kʼanaletik, j˗espiritistaetik, ta stojolal j˗iloletik xchiʼuk ta j˗akʼchameletik. Junantik xtoke tsaʼik poxtael ta kʼusitik ti mu stakʼ nabel lek skʼoplale (ocultismo). Oy buchʼutik chakʼbeik xchʼun yantik ti xuʼ xchiʼinik ta loʼil li animaetike. Pe xi chpʼijubtasvan li Jeovae: «Mu me xbat asaʼik koltael ta stojolal jun j˗espiritista xchiʼuk mi jaʼuk xbat ajakʼik ta stojolal li buchʼutik chalik li kʼusitik chkʼot ta pasel ta jelavele» (Levitiko 19:31). Tskʼan ti jkʼel jbatik ta stojolal li Satanas xchiʼuk spukujtake, yuʼun xuʼ xakʼ jvokoltik xchiʼuk jaʼ yajkontratak li Diose.

 JCHANTIK TO BATEL MAS

6. Xuʼ me xatsal li Satanas xchiʼuk spukujtake

Jaʼ ventainbilik yuʼun Satanas li pukujetike. Pe li anjeletik ti tukʼ yakʼoj sbaik ta stojolal Diose jaʼ beiltasbilik yuʼun li bankilal anjel Miguel ti jaʼ yan sbi akʼbil li Jesuse. ¿Mi tsots sjuʼel li Miguele? Kʼelik Apokalipsis 12:7-9 xchiʼuk albeik skʼoplal li sjakʼobiltak liʼe:

• ¿Mi jaʼ mas tsots sjuʼel xanaʼ li Miguel xchiʼuk yaj˗anjeltake o mi jaʼ li Satanas xchiʼuk spukujtake?

• Li yajtsʼaklomtak Kristoe, ¿mi skʼan van xiʼik ta stojolal li Satanas xchiʼuk spukujtake?

Xuʼ me xatsal li Satanas xchiʼuk spukujtake. Kʼelik Santiago 4:7 xchiʼuk albeik skʼoplal li sjakʼobil liʼe:

• ¿Kʼuxi xuʼ xachabi aba ta stojolal li Satanas xchiʼuk spukujtake?

 ¿KʼUSI LA ACHAN?

Xuʼ skoltautik li anjeletik ti tukʼ yakʼoj sbaike. Li Satanas xchiʼuk spukujtake jaʼ yajkontratak li Jeovae xchiʼuk tstunesik espiritismo sventa sloʼlaik li krixchanoetike.

Svulesobil ta joltik

• ¿Kʼusi tspasik li lekil anjeletik sventa xojtikinik Jeova li krixchanoetike?

• ¿Buchʼu jaʼ li Satanas xchiʼuk li pukujetike?

• ¿Kʼu yuʼun tsots skʼoplal ti mu xatikʼ aba li ta espiritismoe?