¿Mi oy buchʼu chamem avuʼun ti akʼanoj tajeke? Kʼalal jaʼo jech kʼot ta atojolale, xuʼ van toj kʼux laj avaʼi xchiʼuk xi la ajakʼbe abae: «¿Kʼusi chkʼot ta jtojolaltik mi lijchame? ¿Mi xuʼ to van xkil yan velta li buchʼutik chamem kuʼune?». Li ta xchanobil liʼe xchiʼuk li ta yan chtale, ta jkʼeltik kʼusi chalbutik Vivlia ti tspat koʼontontike.

1. ¿Kʼusi chkʼot ta jtojolaltik mi lijchame?

Li Jesuse la skoʼoltas ta vayel kʼalal chijchame. ¿Kʼu yuʼun ti jech chkaltike? Kʼalal oy buchʼu batem tajek xchʼulel ta vayele, mu snaʼ li kʼusi chkʼot ta pasel ta spat xokone. Jaʼ jech kʼalal chijchamutik eke, muʼyuk xa kʼusi kʼux chkaʼitik mi jaʼuk chkil jvokoltik. Xi chal li Vivliae: «Li buchʼutik chamemike mu xa kʼusi snaʼik jsetʼuk» (kʼelo Eklesiastes 9:5).

2. ¿Kʼuxi ta jtabetik sbalil mi jnaʼojtik kʼu yelan oy li animaetike?

Ep buchʼutik chiʼik˗o li lajelale xchiʼuk chiʼik˗o li animaetike. Mi oy jech chavaʼi abae, li kʼusi chal Vivlia ta sventa li lajelale xuʼ me spat avoʼonton. Xi laj yal li Jesuse: «Jaʼ chakʼ akolebalik li kʼusi melele» (Juan 8:32). Mu xkoʼolaj xchiʼuk li kʼusi chakʼik ta chanel junantik relijionetike, yuʼun li Vivliae chal ti muʼyuk kʼusi kuxul chkom kuʼuntik kʼalal mi lijchame. Jaʼ yuʼun, muʼyuk chkil jvokoltik mi lijchame. Ta skoj ti mu xa kʼusi snaʼik jsetʼuk li animaetike, muʼyuk kʼusi chopol xuʼ spasbutik. Jech oxal, mu persauk jkʼopontik mi jaʼuk jlechanbetik sveʼelik sventa mu kʼusi chopol spasbutik o ti xkichʼtik˗o ta mukʼe.

Oy buchʼutik chalik ti xuʼ la xchiʼinik ta loʼil li animaetike, pe taje mu meleluk. Jech kʼuchaʼal laj xa jchantike, li buchʼutik chamemike mu xa kʼusi snaʼik jsetʼuk. Li buchʼutik tskʼoponik yaloj li yanimaike xuʼ me jaʼ yakal tskʼoponik li pukujetik ti jaʼ xa yileluk li buchʼutik chamem yuʼunike. Jaʼ yuʼun, kʼalal chkaʼibetik smelolal kʼu yelan oy li animaetike, tskoltautik sventa mu xilbajinutik li pukujetike. Li Jeovae tspʼijubtasutik ti mu jkʼopontik li kanimatike, yuʼun snaʼoj ti xuʼ jta˗o jvokoltik mi la jkʼopontik li pukujetike (kʼelo Deuteronomio 18:10-12).

3. Kʼelavil kʼu yelan oy li animaetike

Ta spʼejel balumile ep kʼusi chʼunbil ta sventa li lajelale. Pe mu skotoluk melel li kʼusi chʼunbile.

• Li krixchanoetik ti bu nakalutike, ¿kʼusi xchʼunojik ta sventa li animaetike?

 4. Ta jtabetik sbalil kʼalal ta jnaʼtik kʼu yelan oy li animaetike

Kʼalal ta jchantik kʼu yelan oyik ta melel li animaetike, muʼyuk xa ta jxiʼtatik. Kʼelik Eklesiastes 9:10 xchiʼuk albeik skʼoplal li sjakʼobil liʼe:

• ¿Mi xuʼ van oy kʼusi chopol spasbutik li animaetike?

Kʼalal chkiltik li kʼusi chal ta melel Vivlia ta sventa ti kʼu yelan oy li animaetike, tskoltautik xtok sventa mu jkʼopontik xchiʼuk ti mu jlechanbetik sveʼelik sventa xkichʼtik˗o ta mukʼ li animaetike. Kʼelik Isaias 8:19 xchiʼuk Apokalipsis 4:11 xchiʼuk albeik skʼoplal li sjakʼobil liʼe:

• ¿Kʼu van yelan chaʼi sba xanaʼ Jeova kʼalal oy buchʼu chichʼ ta mukʼ li animaetike o ti jaʼ tskʼanbeik koltaele?

5. Tspat koʼontontik kʼalal ta jnaʼtik kʼu yelan oyik li animaetike

Ep buchʼutik chanubtasbilik ti chichʼik kastigo ta skoj li kʼusitik chopol la spasik kʼalal kuxulik toʼoxe. Pe tspat tajek koʼontontik kʼalal chkaʼibetik smelolal ti muʼyuk chil svokol li buchʼu chchame akʼo mi chopol tajek li kʼusi la spase. Kʼelik Romanos 6:7 xchiʼuk albeik skʼoplal li sjakʼobil liʼe:

• Li Vivliae chal ti tupʼbil xa smul chkom li buchʼu chchame. Vaʼun chaʼa, ¿mi ta to van xichʼik kastigo xanaʼ ta skoj li kʼusitik chopol la spasike?

Kʼalal mas to chkojtikintik li Jeovae, chkakʼtik venta ti muʼyuk onoʼox bu chakʼbe kastigo li animaetike. Kʼelik Deuteronomio 32:4 xchiʼuk 1 Juan 4:8 xchiʼuk albeik skʼoplal li sjakʼobiltak liʼe:

• Li teksto la jkʼeltike chalbe skʼoplal li stalelaltak Diose. Ta skoj taje, ¿mi ta van xakʼbe kastigo li buchʼutik chamemike?

• ¿Mi ta van spat koʼontontik ti jnaʼojtik xa kʼu yelan oyik li animaetike? ¿Kʼu yuʼun ti jech chavale?

 ¿KʼUSI LA ACHAN?

Kʼalal oy buchʼu chchame, mi jsetʼuk xa kʼusi snaʼ. Li animaetike muʼyuk chil svokolik mi jaʼuk xuʼ xakʼbeik svokol li yantike.

Svulesobil ta joltik

• ¿Kʼusi chkʼot ta jtojolaltik mi lijchame?

• ¿Kʼuxi ta jtabetik sbalil kʼalal jnaʼojtik kʼu yelan oy li animaetike?

• ¿Kʼuxi tspat koʼontontik kʼalal ta jnaʼtik kʼu yelan oyik li animaetike?