XCHANOBIL 30
¡Chchaʼkuxiik tal li buchʼutik chamem avuʼune!
Solel kʼux tajek chkaʼitik xchiʼuk chakʼ tajek at˗oʼonton kʼalal oy buchʼu chcham kuʼuntike. Jaʼ yuʼun, li Vivliae chal ti jaʼ kajkontratik li lajelale (1 Korintios 15:26). Li ta xchanobil 27, te la achan ti tslajesbe skʼoplal lajelal li Jeovae. Pe ¿kʼusi chkʼot ta stojolal li buchʼutik chamemik xae? Li ta xchanobil liʼe, te chachan li kʼusi oy ta yoʼonton tspas Jeovae: chchaʼkuxes ta smiyonal noʼox krixchanoetik sventa skʼupin xkuxlejalik ta sbatel osil. ¡Ta me xkiltik yan velta li buchʼutik chamemike! ¿Mi melel van taje? ¿Bu van chchaʼkuxiik: mi ta vinajel o ta balumil?
1. ¿Kʼusi oy ta yoʼonton tspas Jeova ta stojolal li buchʼutik chamemike?
Li Jeovae oy tajek ta yoʼonton chakʼbe yan velta xkuxlejal li buchʼutik chamemike. Jun vinik ta voʼne ti Job sbie xchʼunoj lek ti muʼyuk te ch˗iktaat ta Mukinal yuʼun Dios mi chame. Xi laj yalbe li Jeovae: «Voʼot chakʼopoj tal, vaʼun voʼon ta jtakʼbot» (kʼelo Job 14:13-15).
2. ¿Kʼuxi jnaʼojtik ti chchaʼkuxiik li animaetike?
Kʼalal tal ta balumil li Jesuse, li Diose laj yakʼbe sjuʼel sventa xchaʼkuxes li animaetike. Jaʼ yuʼun, li Jesuse la xchaʼkuxes jun uni tseb ti 12 sjabilale xchiʼuk skerem jun ants ti chamem smalale (Markos 5:41, 42; Lukas 7:12-15). Ta mas tsʼakale, cham li yamigo ti Lasaro sbie. Akʼo mi chanib xa ox kʼakʼal xchamel xchiʼuk smukel, li Jesuse la xchaʼkuxes. Kʼalal laj xa ox skʼopon Diose, xi tsots avane: «¡Lasaro, lokʼan tal!». Vaʼun, «li vinik ti chamem toʼoxe» lokʼ tal, yuʼun kuxul xa (Juan 11:43, 44). Ta melel, ¡muyubajik tajek li yutsʼ yalal xchiʼuk yamigotak Lasaroe!
3. ¿Mi chchaʼkuxiik van li buchʼutik chamem kuʼuntike?
Li Vivliae jamal chal ti chchaʼkuxiik li buchʼutik chamemike (Echos 24:15). Li krixchanoetik la xchaʼkuxes Jesuse muʼyuk batik ta vinajel (Juan 3:13). Xmuyubajik tajek ti liʼ ta balumil laj yichʼik chaʼkuxesele. Jech kʼuchaʼal kʼot ta skʼakʼalil Jesuse, jutuk xa tajek skʼan sventa xchaʼkuxes ta smiyonal xa noʼox krixchanoetik sventa skʼupin xkuxlejalik ta sbatel osil kʼalal mi pasem xa ox ta paraiso li balumile. Li Jesuse laj yal ti chchaʼkuxi skotol li buchʼutik oyik ta mukinal sventa svulesobil ta jolile, jaʼ xkaltik, skotol li buchʼutik oy ta snopben li Diose akʼo mi muʼyuk laj kojtikintik li voʼotike (Juan 5:28, 29, tsʼib ta yok vun).
JCHANTIK TO BATEL MAS
Jkʼelbetik sprevailtak ta Vivlia ti ta persa chchaʼkuxiik li animaetike. Jech xtok, jkʼeltik kʼuxi tspat koʼontontik li chaʼkuxesele.
4. Li Jesuse laj yakʼ ta ilel ti xuʼ xchaʼkuxes li animaetike
Kʼelo to avil kʼusi la spas Jesus ta stojolal li Lasaroe. Kʼelik Juan 11:14 xchiʼuk 38-44 xchiʼuk albeik skʼoplal li sjakʼobiltak liʼe:
-
¿Kʼuxi jnaʼojtik ti cham ta melel li Lasaroe? (Kʼelik li versikulo 39).
-
Ti batuk ta vinajel li Lasaroe, ¿mi laj van xchaʼikʼ sutel tal ta balumil jechuk li Jesuse?
5. ¡Ep buchʼutik chchaʼkuxiik!
Kʼelik Salmo 37:29 xchiʼuk albeik skʼoplal li sjakʼobil liʼe:
-
¿Bu van chnakiik skotol li buchʼutik chchaʼkuxiik tale?
Li Jesuse maʼuk noʼox chchaʼkuxes li buchʼutik laj yichʼik ta mukʼ Jeovae, yuʼun chchaʼkuxes yan krixchanoetik. Kʼelik Echos 24:15 xchiʼuk albeik skʼoplal li sjakʼobil liʼe:
-
¿Buchʼu oy ta avoʼonton ti xchaʼkuxi tale?
Nopbo avaʼi skʼoplal liʼe: li Jesuse mu vokoluk chaʼi xchaʼkuxesel li krixchanoetike jech kʼuchaʼal li jun totil ti tstij likel li skereme.
6. Tspat koʼontontik li chaʼkuxesele
Li sloʼil xkuxlejal stseb Jairoe spatojbe yoʼonton epal krixchanoetik ti oy buchʼu chamem yuʼunike. Kʼelik li sloʼil xkuxlejal ta Lukas 8:40-42 xchiʼuk 49-56.
Kʼalal skʼan toʼox xchaʼkuxesbe stseb Jairo li Jesuse, xi laj yalbee: «Mu xavat avoʼonton, jaʼ noʼox skʼan oyuk xchʼunel avoʼonton» (kʼelik li versikulo 50). Li chaʼkuxesele, ¿kʼuxi tspatbot avoʼonton...
-
... mi oy buchʼu cham avuʼune?
-
... mi oy ta vokol akuxlejale?
Kʼelik li VIDEOE xchiʼuk albeik skʼoplal li sjakʼobil liʼe:
-
¿Kʼuxi patbat yoʼonton stot smeʼ Phelicity li chaʼkuxesele?
JUNANTIKE XI CHALIKE: «Mu jchʼun chkaʼi ti chchaʼkuxiik tal ta balumil li animaetike».
-
¿Kʼusi chanop li voʼote?
-
¿Kʼusi van tekstoal chatunes sventa xavakʼ ta ilel ti oy chaʼkuxesel ta balumile?
¿KʼUSI LA ACHAN?
Li Vivliae jamal chal ti chchaʼkuxiik tal ta smiyonal noʼox krixchanoetike. Li Jeovae oy ta yoʼonton ti xchaʼkuxiik yan veltae, jaʼ yuʼun yakʼojbe sjuʼel Jesus sventa xchaʼkuxes li animaetike.
Svulesobil ta joltik
-
¿Kʼuxi jnaʼojtik ti tskʼan chchaʼkuxes animaetik li Jeova xchiʼuk Jesuse?
-
¿Bu chnakiik li buchʼutik chchaʼkuxiike: mi ta vinajel o ta balumil? ¿Kʼu yuʼun ti jech chavale?
-
¿Kʼu yuʼun achʼunoj ti chchaʼkuxiik tal li buchʼutik chamem avuʼune?
XUʼ TO XAKʼEL LIʼE
Kʼelavil kʼusi xuʼ xapas sventa xkuch batel avuʼun xkʼuxul kʼalal oy buchʼu chcham avuʼune.
«¿Kʼusitik xuʼ spas li buchʼu chamem yutsʼ yalale?» (¡Vikʼiluk me jsatik!, num. 3 2018)
Li kʼusi chal Vivliae, ¿mi xuʼ van skoltautik kʼalal oy buchʼu chcham kuʼuntike?
Kʼelavil kʼusi xuʼ xkoltaat jun uni olol mi oy buchʼu chamem yuʼune.
¿Mi oy buchʼu chchaʼkuxi ti chbat ta vinajele? ¿Mi oy van buchʼu ti muʼyuk chchaʼkuxi tale?
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
