Li buchʼutik jaʼ to chnupunike oy ta yoʼontonik ti jechuk˗o xmuyubajik ti kʼu sjalil kuxulike. Ta melel xuʼ xmuyubajik˗o, yuʼun jaʼ jech yiloj ta xkuxlejalik li buchʼutik ep xa jabil nupunemike xchiʼuk ti yakʼoj ta xkuxlejalik li tojobtaseletik chakʼ Vivliae.

1. ¿Kʼusi tojobtasel chal Vivlia ta sventa li malalile?

Li Jeovae laj yakʼ kʼotuk ta jolil ta yutsʼ yalal li malalile (kʼelo Efesios 5:23). Li Jeovae tskʼan ti jaʼuk snop malalil li kʼusitik skʼan spasike xchiʼuk ti stabeuk sbalil li yutsʼ yalale. Li Vivliae xi chalbe mantal li malaliletike: «Jechuk-o me xakʼan avajnilik» (Efesios 5:25). ¿Kʼusi skʼan xal taje? Li malalil ti skʼanoj yajnile lek chkʼuxubin akʼo mi ta stuk oyik o mi te skʼeloj yantik. Chchabi, chakʼ persa ti xmuyubajuk noʼox yuʼune xchiʼuk chakʼbe skotol li kʼusitik chtun yuʼune (1 Timoteo 5:8). Jech xtok, jaʼ oy ta sba ti xlokʼ ta yoʼonton stuk ti xakʼbe li kʼusitik chtun yuʼun ta mantal li yajnile (Mateo 4:4). Jech kʼuchaʼal liʼe, xuʼ jmoj spasik orasion xchiʼuk jmoj tskʼel Svivliaik. Mi lek chkʼuxubin yajnil li malalile, lek˗o me chil sba xchiʼuk li Jeovae (kʼelo 1 Pedro 3:7).

2. ¿Kʼusi tojobtasel chal Vivlia ta sventa li ajnilale?

Li Vivliae chal ti skʼan xichʼ «lek ta mukʼ smalal li ajnilale» (Efesios 5:33). ¿Kʼuxi xuʼ jech spas taje? Xuʼ jaʼ snopbe skʼoplal li kʼusitik lekik tspas smalale, ti yakʼoj tajek persa sventa xchabiat xchiʼuk li yalabe. Jech xtok, chakʼ ta ilel ti yichʼoj ta mukʼ smalal kʼalal tskolta mi oy kʼusi kʼot ta nopel yuʼune. Ta slekil yoʼonton tskʼopon xchiʼuk lek chalbe skʼoplal manchuk mi jelel srelijionik.

3. ¿Kʼusi skʼan spasik sventa skʼanojuk˗o sbaike?

Li Vivliae xi chal ta sventa li buchʼutik nupunemike: «Tspas ta jun sbekʼtalik li chaʼvoʼike» (Mateo 19:5). Taje jaʼ skʼan xal ti skʼan skʼel sbaik ti muʼyukuk kʼusi xnamajesatike. Jaʼ yuʼun, skʼan ti oyuk kʼusi koʼol spasike, ti xalbe sbaik li kʼusi tsnopike xchiʼuk ti xakʼbe sbaik ta ilel ti skʼanoj sbaike. Li kʼusi mas tsots skʼoplal skʼan xil ta xkuxlejalike jaʼ li snup xchiʼilike, pe jaʼ mas tsots skʼoplal skʼan xilik xtok li Jeovae. Xchaʼvoʼalik skʼan skʼel tajek sbaik ti muʼyukuk buchʼu yan xlik skʼanike.

 JCHANTIK TO BATEL MAS

4. Malalil, kʼano xchiʼuk chabio li avajnile

5. Ajnilal, kʼano xchiʼuk ichʼo ta mukʼ li amalale

Li Vivliae chal ti skʼan xichʼ ta mukʼ smalal li ajnilale mu ventauk mi jaʼ yajtunel Jeova o mi maʼuk. Kʼelik 1 Pedro 3:1, 2 xchiʼuk albeik skʼoplal li sjakʼobiltak liʼe:

• Mi muʼyuk chichʼ ta mukʼ Jeova li amalale, oy ta avoʼonton ti jechuk xlik spase. Pe ¿kʼusi xuʼ xapas? ¿Mi jaʼ ti skotol kʼakʼal chacholbe mantale o mi jaʼ ti xavakʼ ta ilel alekil talelal xchiʼuk ti xavichʼ ta mukʼe? ¿Kʼu yuʼun ti jech chavale?

Xuʼ me koʼol kʼusi snop spasik li malalil xchiʼuk li ajnilale. Pe bakʼintike, li ajnilale muʼyuk lek chaʼi li kʼusi chkʼot ta nopel yuʼun smalale. Mi jaʼ jeche, xuʼ onoʼox xalbe smalal ta slekil yoʼonton li kʼusi tsnope xchiʼuk skʼan x˗ichʼvan ta mukʼ. Pe teuk ta sjol ti maʼuk tspas mantal li ajnilale, yuʼun li  Jeovae jaʼ yakʼojbe ta sba malalil ti jaʼ tsnop li kʼusi mas lek ta sventa li yutsʼ yalale. Jech xtok, skʼan xakʼ persa skolta sba ta sventa li kʼusi chkʼot ta nopel yuʼun smalale. Mi jaʼ jech tspase, xmuyubaj noʼox li yutsʼ yalale. Kʼelik 1 Pedro 3:3-5 xchiʼuk albeik skʼoplal li sjakʼobil liʼe:

• ¿Kʼu van yelan chaʼi sba Jeova kʼalal chil ti yichʼoj ta mukʼ smalal li ajnilale?

6. Xuʼ me stsal avuʼunik li vokoliletik chanuptanike

 ¿KʼUSI LA ACHAN?

Mi skʼanoj sbaik li nupultsʼakaletike, mi chichʼ sbaik ta mukʼ xchiʼuk mi chakʼ ta xkuxlejalik li beiltaseletik ta Vivliae, xmuyubajik noʼox me.

Svulesobil ta joltik

• ¿Kʼusi skʼan spas li malalil sventa xmuyubaj noʼox xchiʼuk li yajnile?

• ¿Kʼusi skʼan spas li ajnilal sventa xmuyubaj noʼox xchiʼuk li smalale?

• Mi nupunemote, ¿kʼusi beiltasel ta Vivlia xuʼ skoltaot sventa stsatsub li anupunele?