XCHANOBIL 55
Xuʼ xakoltavan li ta atsobobbaile
Epal krixchanoetik ta spʼejel balumile jmoj chichʼik ta mukʼ Jeova ta smilal xa noʼox tsobobbailetik. Ep sbalil chilik li mantaletik xchiʼuk li beiltaseletik ch˗akʼbatike, ep kʼutik yelan tskolta sbaik li ta tsobobbaile xchiʼuk ta sjunul yoʼonton jech tspasik. ¿Mi ta sjunul avoʼonton jech chakolta aba ek li ta atsobobbaile?
1. ¿Kʼuxitik xuʼ xatunes akʼakʼal xchiʼuk avipal sventa xakoltavan li ta tsobobbaile?
Jkotoltik xuʼ jkolta jbatik jsetʼ jutebuk li ta tsobobbaile. Jech kʼuchaʼal liʼe, ¿mi oy ermanoetik ta atsobobbail ti oy xa sjabilalik o ti ip chaʼiik ti tskʼanik koltaele? ¿Mi xuʼ van xavikʼ batel li ta tsobajeletike? O ¿mi oy van yan kʼusi xuʼ xapas ta stojolalik jech kʼuchaʼal ti xbat amanbeik tal ta chʼivit li kʼusitik chtun yuʼunike o ti xakolta ta spasel li kʼusitik skʼan pasel ta snaike? (Kʼelo Santiago 1:27). Xuʼ xakolta aba xtok ta xchʼubael o ta skʼelel li Salon sventa Tsobobbaile. Muʼyuk buchʼu tsujutik ta spasel skotol taje, yuʼun chlokʼ ta koʼonton jtuktik ta skoj ti jkʼanojtik Dios xchiʼuk li kermanotaktike (Salmo 110:3).
Li buchʼutik yichʼojik xa voʼe oy yan kʼuxitik xuʼ skolta sbaik. Li ermanoetik ti yakʼoj ta xkuxlejalik li beiltaseletik ta Vivliae xuʼ xkʼotik ta siervo ministerialetik xchiʼuk ta jelavele xuʼ xkʼotik ta moletik. Jech xtok, li ermanoetik xchiʼuk ermanaetike xuʼ xtunik ta prekursor. Maʼuk noʼox, yuʼun junantike xuʼ xkoltavanik ta svaʼanel salonetik, Salonetik sventa Asamblea o yan naetik sventa yichʼobil ta mukʼ Jeova o xuʼ xbatik ta yan tsobobbail ti chtun yuʼunik koltaele.
2. ¿Kʼuxi xuʼ jtunes jtakʼintik o kʼusitik x˗ayan kuʼuntik yoʼ xijkoltavan li ta tsobobbaile?
Xi chal li Vivliae: «Jaʼuk xavichʼ-o ta mukʼ Jeova li kʼusitik ep sbalil avuʼune» (Proverbios 3:9). Jaʼ jun mukʼta matanal chkaʼikutik ti xuʼ jtunes jtakʼinkutik xchiʼuk kʼusitik x˗ayan kuʼunkutik sventa jkoltakutik li tsobobbaile xchiʼuk ti jkolta jbakutik yoʼ xichʼ cholel ta spʼejel balumil li mantale (kʼelo 2 Korintios 9:7). Kʼalal chkakʼkutik matanal takʼin xtoke, jaʼ sventa xichʼik koltael li ermanoetik ti chil svokolike. Ep buchʼutik nopem xaʼiik ti parte chakʼik ti kʼu yepal chakʼik li matanal takʼine (kʼelo 1 Korintios 16:2). Li takʼine xuʼ te jtikʼtik li ta xkaxail matanal takʼin li ta salonetik o Salonetik sventa Asambleae o ta jpajinakutik ta donate.pr418.com. Li Jeovae oy ta yoʼonton ti xkakʼbetik li kʼusi oy kuʼuntik sventa xkakʼbetik ta ilel ti jkʼanojtike.
JCHANTIK TO BATEL MAS
Jkʼeltik batel kʼuxitik xuʼ xakoltavan li ta tsobobbaile.
3. Xuʼ xavakʼ li kʼusitik oy avuʼune
Li Jeova xchiʼuk Jesuse skʼanojik li buchʼutik ta sjunul yoʼonton chakʼik li kʼusitik oy yuʼunike. Li Jesuse ep tajek sbalil laj yil ti laj yakʼ skotol yuni takʼin li jun povre ants ti chamem smalale. Kʼelik Lukas 21:1-4 xchiʼuk albeik skʼoplal li sjakʼobiltak liʼe:
-
¿Mi persa van skʼan xkakʼtik epal matanal takʼin sventa xmuyubaj li Jeovae?
-
¿Kʼu yelan chaʼi sba Jeova xchiʼuk Jesus kʼalal ta sjunul koʼonton chkakʼtike?
Sventa xanaʼ kʼuxi chichʼ tunesel li matanal takʼine, kʼelik li VIDEOE. Mi laje, albeik skʼoplal li sjakʼobil liʼe:
-
¿Kʼuxi tstabeik sbalil tsobobbailetik ta spʼejel balumil li matanal takʼin chkakʼtike?
4. Lokʼuk ta avoʼonton xakoltavan
Li yajtuneltak Jeova ta voʼnee maʼuk noʼox ta takʼin koltavanik, yuʼun ta sjunul yoʼonton la skʼelik xtok ti butik chichʼ ichʼel ta mukʼ Jeovae. Kʼelik 2 Kronikas 34:9-11 xchiʼuk albeik skʼoplal li sjakʼobil liʼe:
-
¿Kʼusi la spas j˗israeletik sventa skʼelik o smeltsanik li sna Jeovae?
Sventa xavakʼ venta ti jaʼ jech tspasik ek li stestigotak Jeovae, kʼelik li VIDEOE. Mi laje, albeik skʼoplal li sjakʼobiltak liʼe:
-
¿Kʼu yuʼun skʼan lekuk noʼox oy xchiʼuk sakuk li jsalontike?
-
¿Kʼuxi van xuʼ xakoltavan ek?
5. Li ermanoetike xuʼ me oy kʼusi mas sbainik spasel li ta tsobobbaile
Li Vivliae tstijbe yoʼonton ermanoetik ti xchʼiik batel ta mantale, vaʼun jaʼ jech xuʼ xkoltavanik mas li ta tsobobbaile. Sventa xavojtikin jun ermano ti jech la spase, kʼelik li VIDEOE. Mi laje, albeik skʼoplal li sjakʼobil liʼe:
-
¿Kʼusitik la spas Ryan sventa xchʼi ta mantal xchiʼuk ti xkoltavan mas li ta tsobobbaile?
Li Vivliae chal kʼusitik skʼan spas li ermanoetik sventa xkʼotik ta siervo ministerialetik o ta moletike. Kʼelik 1 Timoteo 3:1-13 xchiʼuk albeik skʼoplal li sjakʼobiltak liʼe:
-
¿Kʼusi skʼan spasik li ermanoetik ti tskʼan chkʼotik ta siervo ministerialetik xchiʼuk ta moletike?
-
¿Kʼusi skʼan spasik li yajnil xchiʼuk xnichʼnabike? (Kʼelik li versikulo 4 xchiʼuk 11).
-
¿Kʼusi sbalil tstabe tsobobbail mi laj yakʼik persa xchʼiik ta mantal li ermanoetike?
JUNANTIKE XI TSJAK’IKE: «¿Bu xa noʼox tstaik takʼin li stestigotak Jeova sventa spas li yabtelike?».
-
¿Kʼusi chatakʼ yaʼel ti jech xavichʼ jakʼbele?
¿KʼUSI LA ACHAN?
Li Jeovae ep tajek sbalil chil ti ta xkakʼ kiptik, jkʼakʼaltik xchiʼuk kʼusitik oy kuʼuntik sventa xijkoltavan li ta tsobobbaile.
Svulesobil ta joltik
-
¿Kʼuxi xuʼ jtunes jkʼakʼaltik xchiʼuk kipaltik sventa xijkoltavan li ta tsobobbaile?
-
¿Kʼuxi xuʼ jtunes kʼusi x˗ayan kuʼuntik yoʼ xijkoltavan li ta tsobobbaile?
-
¿Kʼusitik oy ta avoʼonton chapas yoʼ xakoltavan li ta tsobobbaile?
XUʼ TO XAKʼEL LIʼE
Kʼelavil kʼu yuʼun muʼyuk xa tskʼanbe diesmo yajtuneltak li Diose.
«¿Kʼusi chal Vivlia ta sventa li diesmoe?» (Xuʼ te xata ta jw.org)
Kʼelavil kʼusi la skʼan laj yal Pablo li ta 1 Timoteo 3:1.
Kʼelavil kʼusitik yakʼojik persa spasel junantik ermanoetik sventa xichʼbeik batel vunetik li yermanotakike.
Kʼelavil ti mu xkoʼolaj kʼuchaʼal yan relijionetik li stestigotak Jeova ta sventa ti kʼuxi tstaik li takʼin chtun yuʼunike.
«¿Bu chataik li takʼin chtun avuʼunike?» (Xuʼ te xata ta jw.org)
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
