XCHANOBIL 34
¿Kʼuxi xuʼ xkakʼbetik yil Jeova ti jkʼanojtike?
¿Mi mas xa nopol chavaʼi aba ta stojolal Dios ti kʼu xa sjalil chachan talel li Vivliae? ¿Mi chakʼan ti masuk to lek xavamigoine? Mi jaʼ jeche, teuk ta ajol ti mas to tskʼanot Jeova xchiʼuk chchabiot mi laj avakʼbe yil ti akʼanoj tajeke. ¿Kʼuxi xuʼ xavakʼbe yil ti akʼanoje?
1. ¿Kʼuxi chkakʼbetik yil Jeova ti jkʼanojtike?
Kʼalal ta jchʼunbetik smantale, jaʼ jech chkakʼbetik yil ti jkʼanojtike (kʼelo 1 Juan 5:3). Pe li stuke muʼyuk buchʼu tsuj sventa xchʼunbat li smantale, yuʼun chakʼ jnop jtuktik mi ta jchʼuntik o mi muʼyuk. ¿Kʼu yuʼun? Yuʼun li Jeovae tskʼan ti ta sjunuluk koʼontontik jchʼunbetik smantale (Romanos 6:17). Tskʼan ti xachʼunbe smantal ta skoj ti akʼanoje, maʼuk ti sujbil chavaʼi abae. Li ta yoxvokʼal xchiʼuk xchanvokʼal li ta livro liʼe, chakʼ avil chaʼtos kʼuxi xuʼ xavakʼbe yil Jeova ti akʼanoje: baʼyel, jaʼ ti xapas li kʼusi lek chile. Li xchibale jaʼ ti mu xapas li kʼusi muʼyuk lek chile.
2. ¿Kʼu yuʼun vokol chkaʼitik ti xkakʼbetik yil Jeova ti jkʼanojtike?
«Toj ep svokol li buchʼu tukʼ yakʼoj sbae» (Salmo 34:19). Jkotoltik jmulavil krixchanoutik. Pe maʼuk noʼox taje, yuʼun xuʼ van chkil jvokoltik ta takʼin, oy buchʼu chopol kʼusi tspasbutik xchiʼuk oy yan kʼusitik ta jnuptantik. Kʼalal oy kʼusitik tsots ta jnuptantike, xuʼ van mas vokol chkaʼitik spasel li kʼusi tskʼanbutik Jeovae, yuʼun mas kʼun chkaʼitik ti mu jchʼunbetik smantale. Pe mi laj avakʼ persa spasel li kʼusi tskʼanbot Jeovae, chavakʼbe yil ti stuk noʼox jech akʼanoje. Jech xtok, chavakʼbe yil ti tukʼ avakʼoj sba ta stojolale. Vaʼun, li Jeovae tukʼ chakʼ sba ta atojolal xchiʼuk muʼyuk bu chiktaot (kʼelo Salmo 4:3).
JCHANTIK TO BATEL MAS
Jkʼeltik batel kʼu yuʼun tsots skʼoplal chil Jeova ti jchʼunbetik smantale xchiʼuk jkʼeltik kʼusi xuʼ skoltautik sventa tukʼ xkakʼ jbatik ta stojolal.
3. Oy kʼusi laj yal Satanas ti ataoj ta makiel eke
Li ta slivroal Jobe, oy kʼusi laj yal Satanas ti mu meleluke. La stikʼbe smul li Jobe xchiʼuk skotol li buchʼutik tskʼan chtunik ta stojolal Jeovae. Kʼelik Job 1:1 xchiʼuk 1:6-2:10 xchiʼuk albeik skʼoplal li sjakʼobiltak liʼe:
-
Jech kʼuchaʼal laj yal li Satanase, ¿kʼu la yuʼun chchʼunbe smantal Jeova li Jobe? (Kʼelik Job 1:9-11).
-
¿Kʼusi laj yal Satanas ta stojolal li krixchanoetik ti te akʼoplal eke? (Kʼelik Job 2:4).
Kʼelik Job 27:5 xchaʼvokʼal xchiʼuk albeik skʼoplal li sjakʼobil liʼe:
-
¿Kʼuxi laj yakʼ ta ilel Job ti skʼanoj ta melel li Jeovae?
Kʼalal tukʼ laj yakʼ sba li Jobe, laj yakʼ ta ilel ti skʼanoj li Jeovae.
Kʼalal tukʼ chkakʼ jbatike, chkakʼbetik yil Jeova ti jkʼanojtike.
4. ¡Muyubajuk avuʼun li Jeovae!
Kʼelik Proverbios 27:11 xchiʼuk albeik skʼoplal li sjakʼobiltak liʼe:
-
¿Kʼu yelan chaʼi sba Jeova kʼalal chachʼunbe smantal xchiʼuk kʼalal lekik kʼusi chkʼot ta nopel avuʼune? ¿Kʼu yuʼun ti jech chavale?
5. Xuʼ tukʼ xavakʼ aba ta stojolal Jeova
Kʼalal jkʼanojtik tajek li Jeovae xchiʼuk mi tukʼ chkakʼ jbatik ta stojolale, jaʼ tstij koʼontontik sventa xkalbetik yantik li kʼusi jchanojtik xa ta stojolale akʼo mi vokol chkaʼitik bakʼintik. Kʼelik li VIDEOE xchiʼuk albeik skʼoplal li sjakʼobiltak liʼe:
-
¿Mi vokol chavaʼi yalbel yantik li kʼusi achanoj ta stojolal Jeovae?
-
Jech kʼuchaʼal laj kiltik ta videoe, ¿kʼusi koltaat˗o Grayson sventa stsal yuʼun li xiʼele?
Mas kʼun chkaʼitik sventa tukʼ xkakʼ jbatik ta stojolal Jeova kʼalal lek chkiltik li kʼusi lek chile xchiʼuk kʼalal chopol chkiltik li kʼusi chopol chile. Kʼelik Salmo 97:10 xchiʼuk albeik skʼoplal li sjakʼobiltak liʼe:
-
Ta skotol li kʼusi achanoj xa tale, ¿mi xuʼ xaval junchibuk li kʼusi lek chil Jeovae? Xchiʼuk ¿kʼusitik ti chopol chile?
-
¿Kʼuxi xuʼ xlik akʼan li kʼusi leke xchiʼuk ti xapʼaj li kʼusi chopole?
6. Oy sbalil mi ta jchʼunbetik smantal li Jeovae
Ta jtabetik sbalil kʼalal ta jchʼunbetik smantal li Jeovae. Kʼelik Isaias 48:17, 18 xchiʼuk albeik skʼoplal li sjakʼobiltak liʼe:
-
¿Kʼuxi jnaʼojtik ti jaʼ sventa jlekilaltik li kʼusi chalbutik Jeovae?
-
Ti kʼu xa sjalil yakal chachan Vivlia xchiʼuk ti yakal chavojtikin li Jeovae, ¿kʼuxi skoltaojot talel?
JUNANTIKE XI CHALIKE: «Mu kʼusi sventa˗o Dios li kʼusi ta jpase, kuʼun jtuk».
-
¿Kʼusi van tekstoal chatunes sventa xavakʼ ta ilel ti xuʼ xat˗o yoʼonton Jeova o ti xuʼ xmuyubaj ta skoj li kʼusi ta jpastike?
¿KʼUSI LA ACHAN?
Chavakʼbe yil Jeova ti akʼanoj kʼalal chachʼunbe smantal xchiʼuk kʼalal tukʼ chavakʼ aba akʼo mi oy kʼusitik chanuptane.
Svulesobil ta joltik
-
¿Kʼusi chakʼ achan li kʼusi la spas Jobe?
-
¿Kʼuxi xuʼ xavakʼbe yil Jeova ti akʼanoje?
-
¿Kʼusi xuʼ skoltaot sventa tukʼuk˗o xavakʼ aba ta stojolal li Jeovae?
XUʼ TO XAKʼEL LIʼE
Kʼelavil kʼuxi xuʼ tukʼ xavakʼ aba ta stojolal Jeova xchiʼuk li ta tsobobbaile.
«Tucʼ cʼusi chapasbe ec li bochʼo tucʼ cʼusi tspase» (16:49)
Chanbo mas skʼoplal li kʼusi mu meleluk laj yal Satanase.
«Tukʼ chakʼ sba li Jobe» (Li Vivliae, ¿kʼusitik chalbe skʼoplal?, xchanobil 6)
Kʼelavil ti xuʼ xakʼik ta ilel ti skʼanojik Jeova li uni ololetike.
¿Kʼuxi xuʼ tukʼ xakʼ sbaik ta stojolal Dios li kerem tsebetik akʼo mi xichʼik sujel yuʼun li yantike?
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
