Ta spʼejel balumile, li krixchanoetike jelel kʼusi tsnopik ta sventa li poxe. Junantike chuchʼik bakʼintik xchiʼuk yamigotakik. Yantik xtoke muʼyuk chuchʼik li kʼusi yichʼoj jutebuk poxe. Pe yan xtoke chyakubik˗o. ¿Kʼusi chal Vivlia ta sventa li poxe?

1. ¿Mi chopol ti xkuchʼtik poxe?

Li Vivliae muʼyuk chal ti chopole. Kʼalal chalbe skʼoplal li kʼusitik lekik yakʼojbutik Jeovae, te chalbe skʼoplal li «vino sventa xmuyubaj yoʼonton li krixchanoe» (Salmo 104:14, 15). Jech xtok, li Vivliae chalbe skʼoplal yajtuneltak Dios ta voʼne ti laj yuchʼik vino o poxe (1 Timoteo 5:23).

2. ¿Kʼusi skʼan stsak ta venta li buchʼu tsnop chuchʼ poxe?

Li Jeovae maʼuk noʼox chopol chil li yakubele, yuʼun chopol chil xtok mi ch˗echʼ ta mas kuʼuntik yuchʼele (Galatas 5:21). Xi chal li Vivliae: «Mu xakap aba xchiʼuk li buchʼutik muʼyuk spʼisol chuchʼik vinoe» (Proverbios 23:20). Jaʼ yuʼun, mi la jnop chkuchʼtik pox ta jtuktik o xchiʼuk yantike, skʼan xkichʼ jpʼijiltik ti mu x˗echʼ kuʼuntik ta mas ti stsinet xa chkaʼitik o ti xjimet xa joltike, ti mu xa xkichʼ jmeloltik kʼusi ta jpastik o chkaltike. Jech xtok, mi chbat ta mas yuchʼel kuʼuntike, xuʼ xij˗ipaj˗o yuʼun. Pe mi mu jnaʼtik jpajtsan jbatike, jaʼ mas lek ti mu xkuchʼtik jsetʼuke.

3. ¿Kʼuxi chkakʼtik ta ilel ti ta jtsaktik ta venta li kʼusi tsnop yantike?

Ta jujuntal ta jnoptik mi chkuchʼtik pox o mi muʼyuk. Mu me chopoluk kʼusi jnoptik ta stojolal li buchʼutik ta smelol noʼox chuchʼik poxe xchiʼuk skʼan mu jsujtik li buchʼu snopoj ti muʼyuk chuchʼe (Romanos 14:10). Jech xtok, mi oy buchʼu chopol chil ti chkuchʼtike, muʼyuk me chkuchʼtik (kʼelo Romanos 14:21). Yuʼun li yajtsʼaklomutik Kristoe jaʼ ta jpastik li kʼusi lek chaʼi yantike, maʼuk li kʼusi lek chkaʼi jtuktike (kʼelo 1 Korintios 10:23, 24).

 JCHANTIK TO BATEL MAS

4. Nopo mi chavuchʼ o mi muʼyuk

¿Kʼu yelan laj yil Jesus li yuchʼel poxe? Sventa jnaʼtike, jkʼeltik li baʼyel milagro o li kʼusi labal sba la spase. Kʼelik Juan 2:1-11 xchiʼuk albeik skʼoplal li sjakʼobiltak liʼe:

• Jech kʼuchaʼal chal li tekstoe, ¿kʼu yelan laj yil Jesus li poxe xchiʼuk li buchʼutik laj yuchʼike?

• Mi muʼyuk chopol laj yil Jesus li yuchʼel poxe, ¿kʼu yelan skʼan xkiltik mi oy buchʼu tsnop chuchʼe?

Akʼo mi xuʼ xuchʼ pox li jun yajtsʼaklom Kristoe, skʼan xichʼ spʼijil, yuʼun maʼuk skʼan xal ti skotol ora xuʼ xuchʼe. Kʼelik Proverbios 22:3 xchiʼuk albeik skʼoplal mi stakʼ uchʼel pox:

• Kʼalal chatsʼot akarro o chapik junuk makinae.

• Kʼalal xchiʼuk yol jun antse.

• Kʼalal chalbot doktor ti mu stakʼ xavuchʼ poxe.

• Kʼalal vokol chavaʼi spajtsanel aba ta yuchʼel poxe.

• Kʼalal chal ajvalil ti mu stakʼ uchʼel poxe.

• Kʼalal te achiʼuk li buchʼu muʼyuk chuchʼ pox ta skoj ti vokol kom yuʼune.

¿Mi xuʼ van xavakʼ pox ta junuk kʼin nupunel o kʼalal chatsob abaike? Sventa xanaʼe, kʼelik li VIDEOE.

Kʼelik Romanos 13:13 xchiʼuk 1 Korintios 10:31, 32. Kʼelik ta jujun li tekstoe, mi laje albeik skʼoplal li sjakʼobil liʼe:

• Li beiltaseletik chal liʼe, ¿kʼuxi tskoltaot sventa lekuk kʼusi xkʼot ta nopel avuʼun ti chmuyubaj-o li Jeovae?

 5. Nopo kʼu yepal chavuchʼ

Li Jeovae muʼyuk chopol chil mi chkuchʼtik li poxe, pe mi la anop chavuchʼe, teuk me ta ajol ti chopol chil mi bat ta mas avuʼune. ¿Kʼu yuʼun? Kʼelik Oseas 4:11, 18 xchiʼuk albeik skʼoplal li sjakʼobil liʼe:

• ¿Kʼusi xuʼ xlik spas li buchʼu ch˗echʼ ta mas yuchʼel yuʼun poxe?

¿Kʼusi xuʼ skoltautik sventa mu xbat ta mas yuchʼel kuʼuntike? Jaʼ ti bikʼituk xkakʼ jbatike, ti jnaʼtikuk kʼu yepal x˗uchʼ kuʼuntik sventa mu stsinetuk xa chkaʼitik o ti xjimet xa joltike. Kʼelik Proverbios 11:2 xchiʼuk albeik skʼoplal li sjakʼobil liʼe:

• ¿Kʼu yuʼun skʼan oyuk lek spʼisol avuʼun ti kʼu yepal chavuchʼ poxe?

6. Xuʼ xakol lokʼel ta yok skʼob li poxe

 ¿KʼUSI LA ACHAN?

Jaʼ matanal yakʼoj Jeova li vino o li poxe, pe chopol chil li yakubele xchiʼuk mi ch˗echʼ ta mas kuʼuntik yuchʼele.

Svulesobil ta joltik

• ¿Kʼusi chal Vivlia ta sventa li poxe?

• ¿Kʼusi xuʼ xkʼot ta jtojolaltik mi echʼ ta mas kuʼuntik yuchʼel li poxe?

• ¿Kʼuxi xuʼ jtsaktik ta venta li kʼusi tsnop yantik ta sventa li yuchʼel poxe?