Kʼalal laj yakʼbe slikeb utsʼ alalil li Jeovae, laj yal ti jaʼ tsbain skʼelel yalab xnichʼnab li totil meʼiletike (Kolosenses 3:20). Voʼot me oy ta aba ta xchanubtasel li avalab anichʼnab sventa skʼanik ta sjunul yoʼontonik li Jeovae xchiʼuk ti spasik ta tukʼil vinik o antse (2 Timoteo 1:5; 3:15). Skʼan me xakʼel li kʼusi oy ta yoʼontonike. Pe li kʼusi toj tsots skʼoplale jaʼ ti lekuk ta chanel atalelal xilike. Jaʼ yuʼun chaʼa, sventa xkʼot ta yoʼontonik Skʼop Dios li avalab anichʼnabe skʼan me xavakʼ baʼyuk ta avoʼonton voʼot (Salmo 40:8).

LI KʼUSI CHAL VIVLIAE: «Oyuk ta avoʼontonik xchikintael, nopik me lek kʼalal chakʼopojike» (Santiago 1:19). Stalel onoʼox ti ta jkʼantik ti akʼo xchiʼinutik ta loʼil li kalab jnichʼnabtike. Pe sventa junuk yoʼonton xtal xchiʼinutik ta loʼil une, skʼan me xkakʼtik ta ilel ti oy ta koʼontontik ta xchikintabel li yuni loʼilike. Jaʼ yuʼun, skʼan me chʼabaluk utbail yoʼ junuk noʼox yoʼonton xal li sloʼilike (Santiago 3:18). Yikʼaluk me mu skʼan xal kʼusi oy ta yoʼontonik mi ta jchopol kʼoptatik chilike o mi snaʼojik ti xuʼ tsots jtakʼbetike. Jaʼ yuʼun, oyuk me smalael kuʼuntik xchiʼuk nopajtikuk noʼox me xkalbetik ti jkʼanojtike (Mateo 3:17; 1 Korintios 8:1).

LI KʼUSI SKʼAN XAPASE:

• Chʼakbo me yorail sventa xavaʼi li kʼusi tskʼan chalbot avalab anichʼnabe

• Nopolik noʼox me xachiʼin ta loʼil li avalab anichʼnabe, maʼuk to me kʼalal oy svokolike

LI KʼUSI CHAL VIVLIAE: «Li bochʼo chaʼay lec chanubtasele lec chbat» (Proverbios 16:20). Sventa xavaʼibe lek smelolal li kʼusi oy ta yoʼontonike skʼan me maʼuk noʼox xavaʼi li kʼusi chalike. Yuʼun nopem xaʼiik kerem tsebetik ti chbatik ta mas ta sventa li kʼusi chalike o ti mu jechuk tsnopik li kʼusi chalike. Yuʼun xi chal li Vivliae: «Li bochʼo tstacʼ noʼox ta anil loʼil cʼalal muc to chaʼibe smelole jaʼ bol chcʼot» (Proverbios 18:13). Jaʼ yuʼun mu me xa-ilin ta anil (Proverbios 19:11).

LI KʼUSI SKʼAN XAPASE:

• Akʼo persa ti mu me xatuchʼ ta be kʼalal yakal chkʼopoje xchiʼuk mu me chopoluk xavaʼi ta anil li kʼusi chal akʼo mi muʼyuk lek chavaʼie

• Vuleso ta ajol kʼu yelan la avaʼi aba ek xchiʼuk kʼusi ti mas tsots skʼoplal la avaʼie

LI KʼUSI CHAL VIVLIAE: «Jnichʼon, aʼyo me lec avaʼay cʼu xʼelan chaxchanubtasot li atote; mu me xabaj li bijubtasel chayacʼbot ameʼe» (Proverbios 1:8). Yakʼoj avabtelik li Jeovae, yuʼun voʼoxuk oy ta abaik spasel ta mantal li avalab anichʼnabike. Jaʼ yuʼun, skʼan me xachanubtasik ti akʼo x-ichʼvanik ta mukʼe xchiʼuk ti akʼo xchʼunik mantale (Efesios 6:1-3). Xilik me kʼalal mu «jmojuk [ti] kʼu yelan chanopike» (1 Korintios 1:10). Jech oxal, kʼalal mu jmojuk kʼusi chanopike, mu me teuk xlik akʼopik ta satik, yuʼun xuʼ jaʼ mu xa xichʼoxuk-o ta mukʼ.

LI KʼUSI SKʼAN XAPASE:

• Jmojuk me xanopik ti kʼu yelan chavakʼbeik mantal li avalab anichʼnabike

• Mi mu jmojuk ti kʼu yelan chachanubtas li avalab anichʼnabike, akʼbo yipal ta yaʼibel smelolal li kʼusi tsnop anup achiʼile

LI KʼUSI CHAL VIVLIAE: «Chanubtasic lec avalab anichʼnabic ti bu beal [skʼan stam] batele» (Proverbios 22:6). Mi chakʼan ti lekuk xtojob batel li avalab anichʼnabe mu me jaʼuk to xachanubtas kʼalal chtal ta ajole. Skʼan me xapasbe svunal ti kʼusi chavakʼbe xchane xchiʼuk ti kʼusi mantalil chavakʼbee (Salmo 127:4; Proverbios 29:17). Kʼalal chkakʼbetik mantale maʼuk noʼox skʼan xal ti chkakʼbetik kastigoe, yuʼun jaʼ skʼan xal ti ta jkoltatik sventa xaʼibeik smelolal li mantal chkalbetike (Proverbios 28:7). Skʼan me xachanubtas ti akʼo skʼanik li Skʼop Dios xtoke xchiʼuk ti akʼo yakʼik venta ti oy beiltaseletik tee (Salmo 1:2). Jaʼ jech lek tukʼ sjol yoʼonton chchʼiik tal (Evreos 5:14).

LI KʼUSI SKʼAN XAPASE:

• Chanubtaso avalab anichʼnab ti bu kʼalal xuʼ avuʼun sventa kuxuluk xilik li Diose yoʼ spat yoʼontonik ta stojolal

• Koltao avalab anichʼnab sventa mu spasik li kʼusi tsokes jtalelaltike, jech kʼuchaʼal li kʼusitik chlokʼ ta Internete o ti chchiʼin sbaik ta loʼil ta Internete (red social). Chanubtaso sventa mu xlajik ta loʼlael yuʼun li buchʼutik tskʼan chchiʼinvanik ta vayele