XCHANOBIL 2
¿Buchʼu jaʼ li Diose?
1. ¿Kʼu yuʼun skʼan xkichʼtik ta mukʼ li Diose?
Li Diose jaʼ spasoj skotol li kʼusitik oye. Li stuke muʼyuk slikeb xchiʼuk muʼyuk slajeb (Salmo 90:2). Jaʼ yakʼoj ta naʼel li lekil aʼyejetik ti te oy ta Vivliae (1 Timoteo 1:11). Skʼan stuk noʼox xkichʼtik ta mukʼ xchiʼuk xijtun ta stojolal, yuʼun jaʼ yakʼoj li jkuxlejaltike. Kʼelo Apokalipsis 4:11.
2. ¿Kʼu yelan li Diose?
Muʼyuk buchʼu yiloj li Diose, yuʼun jaʼ jun kuxlejal ti mu xvinaj ta kʼelele xchiʼuk jaʼ mas mukʼ kʼuchaʼal voʼotik ti oy jbekʼtaltik xchiʼuk jbakiltike (Juan 1:18; 4:24). Akʼo mi jech, xuʼ xkojtikintik kʼu yelan stalelal mi la jkʼeltik lek li kʼusitik spasoje. Kʼalal ta jkʼeltik li jeltos sat teʼetik xchiʼuk li nichimetik spasoje, te chkakʼtik venta ti skʼanojutike xchiʼuk ti toj pʼije. Jech xtok, ti kʼu smukʼul spasoj li vinajel balumile chakʼ ta ilel ti toj echʼem sjuʼele. Kʼelo Romanos 1:20.
Yan ti kʼuxi xuʼ xkojtikintik li Diose jaʼo kʼalal ta jkʼeltik li Vivliae. Yuʼun te chal kʼu yelan chil li krixchanoetike, li kʼusi lek chile xchiʼuk li kʼusi chopole, te chal xtok kʼu yelan chaʼi sba kʼalal oy kʼusitik chkʼot ta pasele. Kʼelo Salmo 103:7-10.
3. ¿Mi oy sbi li Diose?
Li Jesuse xi laj yale: «Jtotik ta vinajel, akʼo yichʼ chʼultajesel li abie» (Mateo 6:9). Akʼo mi ep kʼu yelan chichʼ albel sbi li Diose, oy sbi stuk. Jeltos kʼu yelan chichʼ alel ta jujutos kʼop. Li ta tsotsile ta xichʼ alel Jeova, bakʼintike ta xichʼ alel Yahweh. Kʼelo Salmo 83:18.
Ta epal Vivliaetike slokʼesojik li biil Jeovae, sjelojik ta Dios o Kajvaltik. Pe kʼalal laj yichʼ tsʼibael li Vivliae, yichʼoj toʼox jutuk mu vukmiluk ta velta li biil Jeovae. Kʼalal la xchanubtas krixchanoetik ta sventa Dios li Jesuse, nopolik noʼox la stunesbe li sbi Diose. Kʼelo Juan 17:26.
Kʼelo li video ¿Mi oy sbi li Diose?
4. ¿Mi oyutik ta yoʼonton li Diose?
Jech kʼuchal li jkʼanvanej totil liʼe, li Diose oy ta yoʼonton li kʼusi chkʼot ta jtojolaltik ta jelavele
Mi skʼanojutik ta melel li Jeovae, ¿kʼu yuʼun yakʼoj to permiso ti oyuk li vokolile? Jlom krixchanoetike tsnopik ti yuʼun la ch-akʼvan ta prevae. Pe taje mu meleluk. Kʼelo Santiago 1:13.
Li Jeovae chakʼ jtʼujtik li kʼusi ta jkʼan ta jpas ta jkuxlejaltike. Pe li kʼusi mas leke jaʼ ti xijtun ta stojolale (Josue 24:15). Akʼo mi jech, oy epal krixchanoetik ti jaʼ tspasik li kʼusitik chopole, jaʼ yuʼun oy ep vokolil. Li Jeovae chat-o yoʼonton ti jech chkʼot ta pasele. Kʼelo Jenesis 6:5, 6.
Li Jeovae skʼanojutik xchiʼuk oy ta yoʼonton ti jkʼupin li jkuxlejaltike, jaʼ yuʼun poʼot xa slajes li vokolile xchiʼuk li choplejale. Pe yoʼ to mu xkʼot skʼakʼalile, li Jeovae oy lek srasonal yuʼun ti yakʼoj to permiso ti oy vokolile. Li ta xchanobil 8 te chichʼ albel smelolal. Kʼelo 2 Pedro 2:9; 3:7, 13.
5. ¿Kʼuxi xuʼ xijnopaj ta stojolal li Diose?
Li Jeovae chakʼ nopajkutik ta stojolal mi ta jpastik orasione. Li stuke oyutik ta yoʼonton ta jujuntal (Salmo 65:2; 145:18). Jech xtok, oy ta yoʼonton chakʼutik ta perton xchiʼuk oy sbalil chil kʼalal chkakʼbetik yipal spasel li kʼusi tskʼane akʼo mi mu skotoluk velta spas kuʼuntik. Akʼo mi jsaʼmulilutik, xuʼ xijkʼot ta yamigo. Kʼelo Salmo 103:12-14; Santiago 4:8.
Ta skoj ti jaʼ yakʼoj jkuxlejaltik li Diose, jaʼ noʼox stuk skʼan jkʼantik (Markos 12:30). Chkakʼtik ta ilel ti jkʼanojtik kʼalal chkojtikintik batele xchiʼuk kʼalal ta jchʼunbetik smantaltake. Kʼalal jech ta jpastike, mas to chijnopaj ta stojolal. Kʼelo 1 Timoteo 2:4; 1 Juan 5:3.
